Слава Тебѣ, Господи Боже мой, яко сподобилъ мя еси видѣти день преславнаго воскресенiа Твоего, въ онь же свободилъ еси сущая во адѣ связаныя праведныхъ душа! Тоя свободы, Владыко, и азъ желаю: разрѣши [3] мя связана суща многыми грѣхи, да возсiаетъ свѣтъ Твоея благодати въ омраченнѣй души моей. Вѣдѣ бо бесчисленыа Твоа щедроты и не изреченное Твое человѣколюбiе: яко отъ небытiя мя [4] въ бытiе привелъ еси и своего образа подобiемъ украси мя, словесемь же и разумомъ превыше скота възнесе мя и твари всей владыку устроилъ мя еси. Съвѣдый времена и лѣта живота [5] моего, отъ юности моея и донынѣ пекыйся много, да быхъ спасенъ былъ, и прекраснаго лика Твоихъ Ангелъ соглагольника [6] имѣти хотя, заповѣдь далъ ми еси и духовное дѣло въ чистотѣ совершити повелѣлъ ми еси; [7] азъ же, окаанный, запятъ быхъ умомъ къ своему хотѣнiю, любленiемъ плотнымъ [8] въвергохъ себе въ срамную тину [9] грѣховную и далече сотворихъся отъ Твоея благодати. Твой сынъ бывъ порожденiемъ купѣли духовныа, нынѣ же рабъ грѣховный. И того ради стеню изъ глубины сердечныа и слезю болезненною ми душею: [10] судный часъ помышляю и весь изнемогаю. Како убо обрящуся тамо? Кое ли слово изреку за грѣхы моя? Каковъ ли отвѣтъ будетъ ми отъ Судiи? Гдѣ ли скрыю безаконiй моихъ множество? Яко нѣсть помогающаго, ни избавляющаго. И что сътворю Господи мой, Господи! Не вѣдѣ, кому ся приближу, да спасена ми будетъ душа. Время живота моего мало, и поне [11] отнынѣ пригвозди страсѣ твоемъ плоть мою; да не нагъ обрящуся отъ добрыхъ дѣлъ, смѣхъ быхъ демономъ. Се бо, яко дѣтище, запятъ бывъ отъ врага моего, въ послѣднюю впадохъ погыбель. Инъ человѣкъ не бысть грѣшенъ якоже азъ: злыхъ бо моихъ ради дѣлъ прогнахъ [12] хранителя души моея Ангела и прiяхъ губителя, не подобна възлагающа на мое сердце. Но не остави мене до конца погибнути Iсусе, благое имя! Отъ земля создавый мя и животъ даровавый ми, призри на смиренiе мое: аще бо и безъ числа съгрѣшихъ но не въздѣхъ рукы моеа къ Богу чюжему, ни отчаяхся отъинудь, [13] помышляя образъ Твоего человѣколюбiа, иже [14] показа на согрѣшившихъ прежде. Поминаю Давыда, иже по дарѣ пророчестѣмъ, [15] въ ровъ любодѣянiя впадъ и покаявся Тебѣ Богу и Творцу достоинъ бысть Твоеа благодати. [16] И за Ахава Самъ слово Пророку вѣщаеши глаголя: не имамъ сътворити прежь реченнаго [17] зла, яко видѣхъ его, како сѣтуя ходитъ, печалуя [18] о своихъ грѣсѣхъ. Ей, Владыко мой, и еще приложю, [19] плачяся предъ Тобою великыхъ и неудобь цѣлимыхъ моихъ язвъ. Како Манассiа беззаконьствова много, [20] всего Израиля осквернивъ и Тя, Бога отецъ своихъ, [21] прогнѣвавъ, преданъ бысть иноплеменнику въ казнь, его же въ сосудѣ мѣдянѣ заключиша и яко скотъ травою питаху: и видѣвъ же свою погибель и помянувъ преже сотвореныя своа грѣхы, възопи изъ среды узъ къ Тебѣ Богу Творцу и чрезъ надежу изятъ бысть оттуду преславно. Такоже и азъ, вся злая въ животѣ моемъ съдѣяхъ и недостойна себе сътворихъ твоеа милости. И како на высоту къ Тебѣ възъзрю скверныма очима? како явлюся лицу Твоему, раздравъ первую боготканную ми одежу и осквернивъ плоти моея ризу? Но очисти мя, яко Спасъ, и прости ми, яко Богъ. Призри на смиренiе мое и не помяни злобы грѣховъ, яже сътворихъ на убогую ми душу. Надѣю бо ся Твоея милости и въпiю къ Тебѣ воплемъ великымъ: помяни, Господи, пречистыхъ Твоихъ устъ глаголы, [22] яже рече: ищите, обрящете, просите и дасться [23] вамъ: не пришелъ бо еси звати праведныхъ, но грѣшныхъ на покаянiе, отъ нихъ же пръвый есмь азъ. И нынѣ исповѣдаю на ся безаконiа моя: и аще мнѣ молчащу, но Ты, Господи, съвѣси сiя. Но, о Премилостиве, прiими мя, яко разбойника и мытаря и блудницу и блуднаго сына: тiи бо бѣша всѣми отчаеми; Ты же прiятъ я и раю сътвори жителя. Прiими мое покаянiе не достойнаго раба Твоего. Господи Iсусе Христе! Словомъ очистивъ прокаженыа, очисти скверну души моея и буди ми помощникъ: силою [24] креста Твоего огради мя и Духомъ Святымъ Твоимъ утверди мя, и возврати посрамлены, борющаяся со мною. Да исповѣдаютъ уста моя множество милости Твоея: яко бысть помощникъ мой во всякой скорби [25] и утѣшитель въ день печали моея. И нынѣ не отверзи моленiа раба Твоего (имя рекъ), но спаси острастованную [26] ми душу и вся Христiяны помилуй, молитвами Пречистыя Ти Матери Владычица нашея Госпожи Богородица. Яко Ты еси Богъ нашъ и Тебѣ мили ся дѣемъ: [27] Отче и Сыне и Святый Душе, помилуй насъ [28] въ вѣкы. Аминь.

Боже всемогый безначальный Господи, высокый и славный Царю, владѣя всею тварiю видѣмою и не видѣмою, сѣдяй на Херувимѣхъ, поемый отъ Серафимъ, [30] молимъ отъ Ангелъ и отъ всѣхъ небесныхъ силъ покланяемь! Тебѣ служать горнiи чинове тысящами и нижняя тварь съ страхомъ трепещетъ: Ты еси Богъ единъ безгрѣшенъ! Не презри мене, молящаго Ти ся въ годину шестую сего дне, въ нюже явися Апостоломъ Своимъ, по воскресенiи, печалнымъ сущемъ, и премѣни скорбь ихъ на радость показанiемъ пречистою Ти руку и ребръ. Премѣни и мою скорбь душевную, [31] обдержащую мя нынѣ и печали избави грѣховныа. Не презри мене, Владыко, [32] въ сiй часъ, въ онь же рече Закхееви, днесь спасенiе дому твоему бысть; Ты же нынѣ, святъ еси, [33] дажь спасенiе душевному ми дому: зане же осквернихъ душевную [34] сiю храмину и нѣсть прiяти достоинъ пречистаго Твоего тѣла. Но, яко благъ и человѣколюбецъ, прiими бесѣду молитвы моеа въ сiй часъ, въ оньже бесѣдовавъ съ женою Самарянынею и тайная сердца еа рекъ, велѣше просити животные воды. Ей Господи Боже мой! Ты съвѣси тайная сердца моего: даждь ми каплю милости Твоея, яко у Тебе есть источникъ животу, угаси изгорѣвшую ми душю грѣховнымъ пламенемъ; устави жажду сердца моего и даждь ми радостно преити день сiй, въ онь же дасться огнецъ Аврааму въмѣсто Исаака на жертву, прообразуя за весь миръ Твое заколенiе. Iсусе Благодателю, Агнце Божiй! Призри на смиренiе мое и исправи молитву [35] раба Твоего (имя рекъ) и прiими словесную сiю жертву отъ устъ грѣшенъ. Аще бо нечистъ и весь скверненъ есмь, но на Твое надѣюся милосердiе: понеже не отверже двою мѣдницу вдовици оноя, но паче всѣхъ похвали ю, и мытаря, съ вздыханiемъ молящася, оправда. И мене не уничижи, просяща [36] съгрѣшенiемъ прощенiя, но, яко разбойника и блуднаго, помилуй кающася о своихъ съгрѣшенiихъ. Яко благословенъ еси съ Отцемъ и съ Святымъ Духомъ и нынѣ, присно и въ вѣки вѣкомъ. Аминь.

Благословлю [38] Тя, Господи Боже мой, и пѣнiе не достойно приношю Ти изъ устъ сквененъ и отъ сердца нечиста. Прославляю святое имя Твое, яко о мнѣ грѣшнемъ всегда печешися и долготерпиши, ожидаа моего покаанiа; азъ же присно прогнѣваю Тя, преступаа божественныа [39] Твоа заповѣди. И что реку предъ славою Твоею Господи! Ты бо свѣси безумiе мое и грѣси мои отъ Тебе не утаишася. И нынѣ не отверзи мене отъ лица Твоего, не чистѣ устнѣ имуща и дерзающа на славословiе Твоего Божества и вечернюю нынѣ молитву къ Тебѣ приносяща, Его же [40] всяко дыханiе и вся тварь съ страхомъ славитъ: яко отъ Тебе всяко дыханiе благо подаваеться. [41] Ей Господи Боже, прiимый грѣхы всего мира, и моя безчисленныа и не свѣдомыя [42] безаконiа потреби, въ послѣднiй часъ [43] пришедшаго дне сего, отъ суеты возбнувша [44] и твоеа помощи и заступленiа взыскающаго: Твое бо не побѣдимое человѣколюбiе. Иже во единунадесять годину пришедшаго прiятъ и равна сотворилъ еси всего дне труды понесшихъ и мене такоже прiими не сего токмо единаго дне лѣностiю изнурша, но и все время живота моего празднолюбно пребывающа и дѣла духовна николиже сътворша. Не осуди мене, Владыко, яко и преже званыхъ на Твою вечерю и отрекшихся своимъ жестокосердiемь, но взыщи мене на житiйстѣмъ распутьи блудящаго и Твоеа душекормныа вечеря възискающаго. [45] Се бо и день уже преклонился есть, и солнце варяетъ годину вечернюю, и мудрiи своа свѣтильникы готовять, да, въ полунощи пришедшу Ти, съ собою въведеши я въ чертогъ царства небеснаго, его же и мене причастника сътвори, не поминая множества грѣховъ моихъ, но обычною си милостiю помиловавъ. Не дай же въ смерть уснути ми, но утверди уды телесе моего, яже разслабѣхъ грѣхьми; укрѣпи душю мою колеблющуся нечаянiемь [46] и отжени помыслы скверныя отъ сердца моего и просвѣти умъ, иже омрачися злымъ похотѣнiемъ, [47] да и нощныя молитвы въздамъ Тебѣ. Господи Iсусе Христе! Приклони ухо Твое къ моленiю моему и отпусти вся грѣхы моя; конець благъ даруй ми и тако отпусти отъ телесе моего и Ангела мирна подаждь ми, отъ воздушныхъ князь избавляющаго мя, молитвами и моленiемъ Пресвятыа Богородица и святыхъ небесныхъ Силъ, [48] Михáила и Гаврiила, Урiила и Рафаила и всѣхъ Святыхъ Твоихъ, отъ вѣка угодившихъ Ти. Яко благословенъ еси всегда съ Отцемъ, и съ святымъ Духомъ, въ безконечныа вѣкы. Аминь.

Яко первыя Свѣтлости пресвѣтло предстоящи, свѣтила огнеобразная, во мракъ соблажненый обхожаема, молитвами Вашими озарите мя, яко свѣтила трисолнечна богосiянiя суще прiималища пребогатая. Се бо Вамъ нынѣ предстахъ, тяжкой сонъ отгнавше: не тще надежа покажите. Ангельскiя силы небесныя, видящи душа смиренiе, милостивно молитву прiимите. Не имамъ кътому прилепляющеся добродѣтели: отъ нея удалѣешися душе по неразумъствiю смертнаго существа вещи. [50] Плотiю же пекыйся, радуюся, хотящею въ персть преставитися. Почтенъ во образъ Создавшаго, скотiю жизнь возлюбивши, причастихся достоанiа безсловеснаго, стремленiю повинувся. Живота моего конець насталъ, и злыхъ отверженiа не сотворихъ. Сего ради, припадая, молю Вы, Вашего прося милосердiя, Архангелъ множество безплотныхъ и Ангельстiи чины: огня гееньскаго избавите мя, отъ страстей ми воздерьжатися помолитеся. Власти, чинове святiи покорите мя закономъ Божественнымъ. Силы вышняя, сотворите мя сильна на врага видимаго и невидимаго. Молитвами Вашими увѣтлива сотворите мене нынѣ Зиждителеви, яко хощетъ человѣческаго покаянiа, имъ же плотiю человѣкъ бысть. Со спасшимся ликомъ причтите, Михáиле и Гаврiиле, начальная Ангеломъ архистратига: не угасающаго пламени избавите мя, яко заступника мiру. Безплотныя Начала и Власти и Господьства не отрините мене не достойнаго: къ Вамъ, окаянный, прибѣгохъ, яко заступникомъ сущимъ. Избавите мя отъ работы: Вы бо стяжахомъ заступникы къ Богу и ходатая Архангелы. Тому подобаетъ слава и хваленiе Отцу и Сыну и Святому Духу и нынѣ и присно и въ вѣкы вѣкомъ. Аминь.

Примѣчанiя:
При изданіи молитвъ св. Кирилла, были использованы:

Три рукописи Соловецкой библіотеки
а) сборникъ подъ № 802, состоящій изъ статей разнаго содержанія, написанныхъ въ XV и XVI в., въ 4-ю долю, на 202 стр; здѣсь помѣщены 21 молитва св. Кирилла на л. 171-201: всѣ молитвы названы именемъ Кирилла Туровскаго, или Кирилла преподобнаго, Кирилла священноинока;
б) Большой Требникъ дачи Новгор. Митроп. Макарія подъ № 1085, написаный въ 1505 г., въ листъ, на 712 листахъ: молитвы св. Кирилла, въ числѣ 21, занимаютъ здѣсь 684-712 стр;
в) Слѣдованная Псалтырь, принадлежавшая св. Филиппу Митрополиту, написанная въ XVI в. въ 4 долю на 547 стр: здѣсь помѣщены четыре молитвы св. Кирилла: по одной молитвѣ послѣ каждаго молебнаго канона Святой Троицѣ, св. Крестителю, св. Апостоламъ и всѣмъ Святымъ;

Двѣ рукописи Волоколамскаго Монастыря
г) Сборникъ подъ № 109, состоящій изъ разныхъ молитвъ и написанный въ концѣ XV или началѣ XVI в., въ 4 долю, на 258 стр: здѣсь, на стр. 46-138, находится 50 молитвъ, которыя названы именемъ Кирилла грѣшнаго, мниха недостойнаго, кромѣ 8 молитвъ, не означенныхъ ни чьимъ именемъ;
д) Сборникъ подъ № 413, написанный въ XVI в, въ 4-ю долю, на 788 стр: здѣсь помѣщено 12 молитвъ съ именемъ преподобнаго Кирилла или Кирилла священноинока, на стр. 648-686. За основанiе текста молитвъ мы принимаемъ списокъ ихъ въ сборн. Солов. № 802, какъ болѣе исправный сравнительно съ другими списками и будемъ указывать на замѣчательныя разности, заключающіяся какъ въ этихъ спискахъ, такъ и въ печатномъ изданіи (см. статью «Отъ издателя»). Молитвы же, не находящіяся въ этомъ спискѣ, будутъ напечатаны по рукописи Волокол. № 109.

[1] Слова: по канонѣ, въ другихъ рукоп. нѣтъ.
[2] Въ рук. Вол. № 109: Кирила мниха недостойнаго; № 413: преподобнаго Кирила мниха.
[3] Въ рук. Вол. № 109: да разрѣшиши.
[4] Въ печатн. изданiи: вся.
[5] Въ печатн. изданiи: время живота моего.
[6] Въ друг. рук. и печат. изданiи: согласника.
[7] Слова: и духовное дѣло въ чистотѣ совершити повелѣлъ еси, прибавлены по рук. Волок. № 109 и печатн. изд.
[8] Въ рук. Вол. № 109: плотныхъ.
[9] Въ рук. Вол. № 109: въ смрадную тму грѣховную.
[10] Въ печатн. изд. и рук. Сол. № 1085: болѣзнiю душевною.
[11] Поне – по крайней мѣрѣ.
[12] Такъ въ печатн. изд. и друг. рук., кромѣ Солов. № 802, въ которой стоитъ: прогнѣвахъ.
[13] Въ печатн. изд.: отнюдъ.
[14] Въ рук. Вол. № 109: еже показа.
[15] Въ печатн. изд.: по дарованiи пророчествiя.
[16] Въ печатн. изд.: милости.
[17] Въ печатн. изд. прибавлено: нань.
[18] Въ печатн. изд. и друг. рук. слова – печалуя, нѣтъ.
[19] Въ рук. Вол. № 413: прилежю.
[20] Въ печатн. изд.: и много всего Израиля осквернихъ.
[21] Такъ въ рук. Вол. № 109 и печатн. изданiи; въ друг. рук.: нашихъ.
[22] Въ рук. Вол.: глаголъ, иже рече.
[23] Въ рук. Вол. № 413: подасться.
[24] Въ печатн. изданiи: честнаго ти Креста.
[25] Въ рук. Вол.: бѣдѣ.
[26] Въ печатн. изданiи: страстную.
[27] Въ рук. Сол. № 1085: славу возсылаемъ со Отцемъ и проч.
[28] Въ печатн. изд.: всегда и нынѣ и присно и…
[29] Въ рук. Вол. № 109: того же грѣшнаго мниха о исповѣданiи.
[30] Въ печатн. изд. слѣдующiя слова: молимъ отъ ангелъ и отъ всѣхъ небесныхъ силъ покланяемъ, поставлены уже послѣ словъ: Тобѣ горнiи чинове служатъ тысящами.
[31] Въ печатн. изд. слова: душевную – нѣтъ.
[32] Въ печатн. изд.: молящагося въ сiй часъ…
[33] Въ печатн. изд.: чистъ еси.
[34] Въ рук. Вол. № 109 и печатн. изд.: тѣлесную.
[35] Въ печатн. изд. послѣ сего слѣдуютъ слова: устъ моихъ; словъ: раба твоего (имя рекъ), нѣтъ; а послѣ словъ: словесную жертву, прибавлено: яко авелевы дары.
[36] Слова: просяща съгрѣшенiемъ прощенiя но… въ печатн. изд. опущены; вмѣсто: помилуй, напечатано: помилова, такъ что вся рѣчь получаетъ нѣсколько другой смыслъ.
[37] Въ рукоп. Вол. № 109: того же недостойнаго мниха Кирила.
[38] Въ рук. Сол. № 1085: благодарю Тя.
[39] Въ печатн. изд. слова: божественныа, нѣтъ.
[40] Такъ во всѣхъ рукоп.; въ печатн. изд.: тя бо.
[41] Въ печатн. изд. словъ: яко отъ Тебе всяко дыханiе благо подаваеться, – нѣтъ.
[42] Въ печатн. изд.: не исповѣдимыя.
[43] Въ печатн. изданiи слова: въ послѣднiй часъ прешедшаго дне сего отъ суеты възбнувша, – измѣнены такимъ образомъ: пришедша въ послѣднiй часъ дне сего, отъ суетъ возвратившася…
[44] Возбнувша – пробудившагося.
[45] Въ печатн. изданiи: желающа.
[46] Нечаянiе – значитъ: сомнѣнiе, недоумѣнiе.
[47] Въ печатн. изд.: злымъ унынiемъ.
[48] Въ печатн. изданiи слѣдующихъ словъ: Михáила и Гаврiила, Урiила и Рафаила, – нѣтъ.
[49] Напечатана по рукоп. Вол. № 109; она не означена именемъ св. Кирилла.
[50] Здѣсь очевидно ошибка или пропускъ; но, по не имѣнiю другаго списка, мы не могли поправить.

Печатается по изданiю: Молитвы на всю седмицу святаго Кирилла Туровскаго. // Журналъ «Православный собесѣдникъ», Казань. – 1857 г. – Книга I. – с. 235-247.