Къ Вамъ, яко заступникомъ и хранителемъ живота моего, азъ окаянный и многогрѣшный (имя рекъ) припадаю, моляся и прося Вашей милости: видци Божiа величества, святiи Ангели, [2] престолъ честный Пресвятыя Троица страшно обьстояще и не изреченною свѣтлостiю Божественныа славы облистаеми! Молите всемилостиваго и всещедраго человѣколюбца Бога избавити мя отъ всякаго зла, приходящаго на мя. [3] Михáиле святый и великый Архистратиже, первый поклонниче [4] Святыя Троица, приставниче и хранителю роду человѣческому, осiявый чюдесы вселеную! И мнѣ подай дневное пребыванiе преити богоугодно, не искусно [5] отъ злыхъ помыслъ и дѣлъ злокозненыхъ; отверзи ушiю моего слуха, да слышю и разумѣю Божiа словеса благаа и душеполезная и да прозрю внутренима очима и еще тмѣ сущи грѣховной обдержащи мя, въ ней же проходя во вся дни живота моего, прогнѣвахъ благаго и незлобиваго и длъготерпѣливаго Творца моего и Владыку. Ему же предстояще со страхомъ, небесныа Силы не вещественными усты трисвятую всылающе пѣснь, молите за мя, по вся часы съгрѣшающаго. Да не поясть мене мечь ярости Господня: зѣло бо превьзыдоша безаконiя моя главу мою, [6] яко бремя тяжко отяготѣша выи моей. [7] И еще помяну минувшее время живота моего, убо преступника себе свѣдаю: разумѣю бо ся паче всякаго человѣка злая и не подобная и не милая Богу съдѣлахъ дѣла, и боюся, егда како огнь съ небесе съшедъ, сожжетъ мя или преисподняя пропасть жива пожретъ мя. Съвѣдый же долготерпѣнiе и пучину человѣколюбiа Божiа, не отчаю себе, яко не наводитъ казни на достойнаго мученiя, но ожидаеть моего покаанiа. Святый Гаврiиле, радости ходатаю и спасенiю благовѣстниче, скорби премѣнителю и всякаго зла погубителю! Буди мнѣ помощникъ въ годъ, егда побѣжаемь буду отъ страсти, посѣти святымъ ти посѣщенiемъ, освѣти ми душю, омеркъшую многыми грѣхы, укрѣпи мя творити добраа дѣла. Вопiю къ Тебѣ воплемъ великымъ и, моляся, припадаю Ти: не презри мене раба Твоего, но скоро потщися, даже не постыгнеть мене конець, даже смерть не варить и не въсхытитъ окаанныа ми душа, и еще злѣ стражющу въ скверныхъ обычаехъ, и поимеши мя не готова отъ житiя и поставиши мя безъ отвѣта предъ Судящимь по дѣломъ комуждо. [8] Но, яко имѣа къ Богу дерзновенiе о всѣхъ молитися, и мнѣ отпустъ прегрѣшенiемъ испроси. Святый Уриле! Виждь бѣду мою и брань вражiю, ею же побѣжаемь есмь присно, на помощь Тя призываю: вари [9] въ заступленiе мое, да ся ощутить мой умъ отъ сна грѣховнаго. Дивлю бо ся себѣ, како окрадень [10] есмь плотскыми похотьми [11] и обрѣтаюся въ дѣлѣхъ, ихъ же ненавижу, и, не подобная мысля, акы рукама разоряю благодать Божiю, [12] ожидающу моего обращенiя. Увы мнѣ, како не имамъ твердо основанiе покаянiю! Да кто дастъ очима моима слезы, да ся плачю къ милостивому Богу, да послеть Свою милость и исторгнеть мя изъ моря житiйскаго, волнующагося волнами грѣховными, [13] въ немъ же погружаемь есмь, не прiемлю обязанiа и исцелѣнiя скорымъ покаянiемъ. [14] Свѣдый узы моа, и не хощу изрѣшитися изъ нихъ, запинающи ми тѣлесной слабости. [15] Святый Рафаиле! Подвигни легеона [16] святыхъ Ангелъ, да помолять Владыку и Господа за убогую и смиренную ми душю, кающася о прежь содѣянныхъ ми золъ. Вѣдѣ бо свое естество, тлѣнно суще [17] и скоро погыбающее: да како не постигну вечера, и порадуется врагъ мой о мнѣ, глаголя: се человѣкъ суетѣ уподобися и днiе его, яко сѣнь преидоша. Но, Господи Iсусе Христе, Сыне Божiй! Припадаа, молю Ти ся: призри на мя и помилуй мя, изведи душю мою изъ темници беззаконныа, преже даже [18] не отъиду отселе и прiиду на судъ страшный. Прiими Господи молящихъ Тя [19] за ны, святыа Ангелы и Архангелы, Херувимы и Серафимы, Силы и Власти, Престоли и Господьства, Начала высокая, обонадесять легеона [20] иже окрестъ престола Твоего предстояще, за весь миръ молять Тя: тѣхъ молитвами и Пречистыа Матере Твоея Владычиця нашея Богородиця, избави мя студа [21] онаго и тмы кромѣшняя и не усыпающаго червiя ядовитаго, и не угасающаго пламени. Ты бо еси Агнець Божiй, вземляй грѣхы всего мира, распныйся на крестѣ нашего ради спасенiа и принесыйся на жерътву за ны грѣшныя. [22] Вонми молитву мою и посли Ангела свята, хранителя душамъ и тѣломъ: да тѣмъ наставляемь, избавлюся отъ всѣхъ видимыхъ и не видимыхъ врагъ и сподоблюся получити Твою славу [23] со всѣми угодившими Тебѣ отъ вѣка. Яко Ты еси Богъ нашь и къ Тебѣ прибѣгаю и на Тя надѣюся. Аще бо и съгрѣшихъ много паче всѣхъ человѣкъ, [24] но отъ Тебе не отступихъ, ни руку моею къ иному Богу воздѣхъ; но Тебѣ молюся, Господи Iсусе Христе, и Тя благословлю и Тебѣ кланяюся въ Троици Единому Богу Отцу и Сыну и Святому Духу и нынѣ и присно и въ вѣки вѣкомъ. Аминь.

Къ Тебѣ, Вседержителю, Пресвятый Царю припадая, молюся и тружаюся душею, милости прошю! Руцѣ Твои сотвориста мя и животъ даровалъ ми еси; злокозненный же врагъ, безстудiемъ нашедъ на мя, въскрежета на мя зубы [25] своими, и стрѣлою безаконною устрѣли мя, грѣховнымъ же мечемъ злѣ порази мя: много же брався со мною, и преможе мя. [26] Впадохъ въ сѣти прегрѣшенiя, аки звѣрь на уловленiе, и уловиша мя. [27] Ощутихъ язву не исцѣльну, взыскахъ врача на земли, и не обрѣтохъ. Но къ Тебѣ возпущаю глаголы молебныя отъ душа: Владыко Господи Творче всѣхъ, Боже Отче Правителю душъ нашихъ! Съгрѣшихъ на небо и предъ Тобою: не посли гнѣва, достойнаго по дѣломъ моимъ, да не буду, яко риза, молемъ изьядена, или яко желѣзо ржею скончеваемо. Се бо беззаконiа моа нападоша на мя, и грѣси мои покрыша главу мою, и бысть ми полудне, акы полунощи. Первiе брашна въздыханiе ми прiиде, и все житiе мое печалiю въсхыщено бысть, и страхъ же въ сердци ми вселися, яко взыскалъ еси [28] беззаконiе мое, и вся грѣхы моя изслѣдилъ еси, наведе на мя искушенiе, и гнѣвъ великъ възложи на мя. И того ради не могу возникнути [29] къ Тебѣ, ни руку въздѣти на высоту. Но моляся непрестанно, день дне избавленiя прошу: послухъ [30] бо ми есть на небесѣхъ вѣренъ, единочадный Твой Сынъ Господь нашъ Iсусъ Христосъ, Его же посла спасти грѣшныхъ. Той бо рече: просите и дасться вамъ. Господи Боже мой! [31] Да внидетъ предъ Тя молитва моя; приклони ухо твое къ моленiю моему. [32] Помяни Господи, яко персть есмь; измѣренъ ми животъ, положена же лѣта и изочтени мѣсяци; въ преполовенiи [33] днiй моихъ не погуби мене, да не возвращуся въ землю тмы вѣчныа, идѣже нѣсть свѣта, ни жизни [34] вѣчныя человѣкомъ; да не изсушитъ геена крови моей, но дай же ми время покаянiю. Яко не требуеши смерти грѣшника; милостивъ бо еси человѣколюбецъ, имѣяй пучину щедротъ и обрѣтаяся близь скорбящихъ, дая должьнаа [35] прошенiя рабомъ своимъ. Iсусе Благодѣтелю, заре Отча, свѣте не прекосновенный! Просвѣти омраченнѣи ми очи и дай же прощенiе многихъ ми грѣховъ: молитвами святыхъ Твоихъ небесныхъ силъ [36] Ангелъ, Архангелъ, Началъ, Престолъ и Господьствъ, Херувимъ, Серафимъ и Пречистыя Твоеа Матере Госпожи нашеа Богородица и всѣхъ Святыхъ Твоихъ, ихъ же молитвами помилуй Отче и Сыне и Святый Дýше. Яко Ты еси Богъ мой и азъ рабъ Твой, [37] у Тебе милости прошю, всегда нынѣ и присно и въ вѣки вѣкомъ. Аминь.

Владыко Господи, всеа видимыа и не видимыа твари Содѣтелю, Боже силъ, вѣкомъ Творче, сътворивый времена и лѣта, измѣривый день и нощь часами, разлучивый свѣтъ отъ тмы, и видѣвъ яко добро и бысть вечеръ, его же и мене смиреннаго сподобилъ еси достигнути и до послѣдняго часа дне сего, въ онь же вечернюю службу всылаю Ти! Исправи молитву мою, яко кадило предъ Тобою; утверди нозѣ мои въ заповѣдѣхъ Твоихъ и руку моею въздѣяніе освяти; очисти уста моа словесъ Твоихъ чистотою и вложи страхъ Твой въ сердце мое; покрый душю мою сѣнію Святаго Духа; утверди уды моа, на зло подвизающаяся, и не остави мене безъ Твоего заступленіа. Ты бо съвѣси немощь естества моего, яко хуже паучины [39] обрѣтаюся къ Твоему угоженію. Господи Ісусе Христе Сыне Божій, преблагій Господи! Помози моеи худости. Рекый благословесными усты Своими: воззови Мя, избавлю тя, и нынѣ зову и вопію не престаа: не предажь мене желанію сатанину, да не буду причастникъ пагубѣ, да не съвратитъ [40] устъ моихъ отъ славословіа Твоего и да не стану [41] въ радость врагу, и похвалится о мнѣ глаголя: гдѣ есть Богъ твой. Ты еси Богъ мой, имѣя пучину человѣколюбіа и не отлучаяся [42] николиже отъ Своихъ рабъ, по даруа прошенія любящимъ Тя: пріими мое сего часа моленіе, да на всякъ день и часъ приношу Ти пѣніе [43], каяся о прежь мимошедшихъ днехъ живота моего, въ ня же уподобихся не разумнымъ скотомъ яденіемъ и питіемъ и всѣми похотьми скверными, ими же далече быхъ отъ Тебе [44]. Създаніе руку Твоею есмь и тварь, врагу поработихся, иже и донынѣ злохытріемъ крадеть мя, хотя мя потопити въ глубинѣ грѣховнѣй. Вари [45] въ заступленіе мое и рци души моей: спасеніе твое есмь Азъ. Да исповѣдятъ уста моа множество милости Твоеа, яко помилова и спасе мя грѣшника, и въсхвалю има Твое въ вѣкы. И тако мя отпусти отъ телесе моего, ангельскымъ огражаа заступленіемь душю мою, и препроводи не искусну отъ злыхъ мытарь, присѣдящихъ у вратъ небесныхъ: да и десныя Ти страны причастникъ буду [46], со всѣми угожьшими Ти: молитвами и моленіемъ Пречистыа Богородиця и Святаго Пророка Предотечи Крестителя Твоего Іоанна и всѣхъ святыхъ. Яко благословенъ еси и прославленъ съ Отцемъ и съ Святымъ Духомъ и нынѣ и присно и въ вѣки вѣкомъ. Аминь.

Отъ пустаго житіа исходящи, къ Тебѣ прибѣгаю, рабъ Твой (имя рекъ) и Твоея милости прошю: не презри мене, Пророче и Предотече, осквернена. Простираю руцѣ мои: не отрини мене страстнаго, но тихою си милостію на мя человѣколюбне призри. Се бо сластьми осквернихся и, помысливъ прежняя владычества, врага совѣщавающаго послушахъ и гласа Бога моего ослушахся, образа доброту омрачихъ и персть нань воставихъ. Сего ради, молю ти ся Предотече: молебникъ ми теплъ явися къ Христу Спасу Зижителю; достойными плоды покаяніа покажи умиленныа ми молитвы; малое воздыханіе мое пріими и руку моею воздѣяніе исправи; въ день осуженіа избави мя и Судію милостива сотвори. Тебе бо имамъ заступника и молю, яко помощника и надеждю къ Богу: постри ми рабу твоему рубу, крестившую Христа Бога моего. Ужасаюся и трепещю будущаго судища, но подъ Твою милость прибѣгаю и простираю къ Тебѣ очи мои: не отрини мене раба твоего, Предотече! Всенощными си молитвами избави мя присно отъ злыхъ грѣховъ, держащихъ мя; пѣсньми бдяща сотвори славити Христа, Его же крестилъ еси. Тому подобаетъ всяка слава, честь и поклоненіе Отцу и Сыну и Святому Духу и нынѣ и присно и въ вѣкы. Аминь.

Примѣчанiя:
При изданіи молитвъ св. Кирилла, были использованы:

Три рукописи Соловецкой библіотеки
а) сборникъ подъ № 802, состоящій изъ статей разнаго содержанія, написанныхъ въ XV и XVI в., въ 4-ю долю, на 202 стр; здѣсь помѣщены 21 молитва св. Кирилла на л. 171-201: всѣ молитвы названы именемъ Кирилла Туровскаго, или Кирилла преподобнаго, Кирилла священноинока;
б) Большой Требникъ дачи Новгор. Митроп. Макарія подъ № 1085, написаный въ 1505 г., въ листъ, на 712 листахъ: молитвы св. Кирилла, въ числѣ 21, занимаютъ здѣсь 684-712 стр;
в) Слѣдованная Псалтырь, принадлежавшая св. Филиппу Митрополиту, написанная въ XVI в. въ 4 долю на 547 стр: здѣсь помѣщены четыре молитвы св. Кирилла: по одной молитвѣ послѣ каждаго молебнаго канона Святой Троицѣ, св. Крестителю, св. Апостоламъ и всѣмъ Святымъ;

Двѣ рукописи Волоколамскаго Монастыря
г) Сборникъ подъ № 109, состоящій изъ разныхъ молитвъ и написанный въ концѣ XV или началѣ XVI в., въ 4 долю, на 258 стр: здѣсь, на стр. 46-138, находится 50 молитвъ, которыя названы именемъ Кирилла грѣшнаго, мниха недостойнаго, кромѣ 8 молитвъ, не означенныхъ ни чьимъ именемъ;
д) Сборникъ подъ № 413, написанный въ XVI в, въ 4-ю долю, на 788 стр: здѣсь помѣщено 12 молитвъ съ именемъ преподобнаго Кирилла или Кирилла священноинока, на стр. 648-686. За основанiе текста молитвъ мы принимаемъ списокъ ихъ въ сборн. Солов. № 802, какъ болѣе исправный сравнительно съ другими списками и будемъ указывать на замѣчательныя разности, заключающіяся какъ въ этихъ спискахъ, такъ и въ печатномъ изданіи (см. статью «Отъ издателя»). Молитвы же, не находящіяся въ этомъ спискѣ, будутъ напечатаны по рукописи Волокол. № 109.

[1] Въ рукоп. Вол. № 413: преподобнаго Кирила священноинока; въ другихъ рукоп. молитва не означена именемъ св. Кирилла.
[2] Въ печатн. изд.: престоли честнiи Пресвятыя Троица страшно обстоящiи…
[3] Въ печатн. изданiи словъ: приходящаго на мя, – нѣтъ.
[4] Въ печатн. изд.: предстателю.
[5] Въ рук. Вол. № 109: не искусну.
[6] Въ печатн. издан.: на главу мою.
[7] Въ печатн. изданiи вмѣсто: выи моей – на мнѣ…
[8] Въ печатн. изд.: предъ судомъ воздающаго комуждо по дѣломъ.
[9] Въ печатн. изд.: приди.
[10] Въ рук. Вол. № 413: окрадаемь.
[11] Въ рук. Вол. № 413: помысла.
[12] Въ печатн. изд.: лишаюся благодати Божiей.
[13] Въ печатн. изд.: житейскими…
[14] Такъ въ рук. Вол. № 109; въ другой Вол. рук. № 413: не прiемлю покаянiя; въ печатн. изд.: не прiемлю беззаконiемъ исцѣленiя.
[15] Въ рук. Волок. № 109 и печатн. изданiи: сласти.
[16] Въ печатн. изданiи: множество.
[17] Въ рукоп. Волок. № 413: тлѣюще.
[18] Преже даже – прежде нежели.
[19] Въ рук. Вол. № 413: молящихся.
[20] Въ рук. Солов. № 1085 и печатн. изданiи словъ: высокая обанадесять легеона, – нѣтъ.
[21] Въ печатн. изд.: суда…
[22] Въ печатн. изд. словъ: и принесыйся на жертву за ны грѣшныя, – нѣтъ.
[23] Въ печатн. изданiи: милость.
[24] Такъ въ рук. Волок. № 109; въ рукоп. Солов.: паче человѣка.
[25] Въ рукоп. Волокол. № 109 и печатн. изданiи вмѣсто: своими – завистiю…
[26] Въ печатн. изданiи слова: много же брався со мною, и преможе мя, – пропущены.
[27] Въ печатн. изд.: яко звѣрiе на убiенiе уловиша мя…
[28] Въ печатн. изданiи: изыскалъ еси.
[29] Возникнути – показаться.
[30] Послухъ – свидѣтель (ср. Пс. 88: 38 – прим. А. К.).
[31] Въ печатн. изданiи послѣ этого прибавлено: кровь Твоя цѣна души моея да внидетъ предъ Тя…
[32] Вмѣсто словъ: приклони ухо Твое къ моленiю моему – въ рукоп. Волокол. № 109 и въ печатн. изданiи: по словеси Твоему избави мя.
[33] Преполовенiе – половина.
[34] Въ рук. Вол. № 109: радости.
[35] Въ печатн. изд. и рук. Сол. № 1085: довольная.
[36] Въ печатн. изд. и друг. рукоп.: слугъ твоихъ.
[37] Въ печатн. изданiи словъ: азъ рабъ Твой – нѣтъ.
[38] Въ ркп. Волок. № 109: Кирила мниха грѣшнаго.
[39] Паучина — паутина.
[40] Въ печатн. изд.: да не затворю устъ моихъ. Въ рук. Солов. № 1085 и Волок. № 109: да не затворитъ устъ моихъ.
[41] Въ печатномъ изданіи и друг. ркп: да не отстану...
[42] Въ печатн. изданіи: не отлучайся.
[43] Въ печатн. изд.: пѣніе и молитву.
[44] Въ ркп. Волок. № 109: ими же удаленъ быхъ отъ Тебе.
[45] Вари — поспѣши.
[46] Въ ркп. Солов. № 1085 вмѣсто словъ: да и десныя Ти страны причастникъ буду, написано: и сподоби мя свѣта сіянія лица Твоего.
[47] Молитва эта отпечатана по ркп. Волокол. № 109; она не означена именемъ св. Кирилла.

Печатается по изданiю: Молитвы на всю седмицу святаго Кирилла Туровскаго. // Журналъ «Православный собесѣдникъ», Казань. – 1857 г. – Книга I. – с. 248-260.