Како свое паденіе нынѣ разумѣю [1]? Како ли ся явлю лицу Твоему, Владыко Христе всѣхъ Господи? Чтожъ принесу Ти, ихъже требуеши? Что Ти въздамъ, полонь сый всякыя нечистоты и безаконіа? Кымъ ли образомъ вѣчныа мукы избавлюся? Яко отъ роженіа моего и донынѣ вся злая съдѣяхъ и ни поне [2] въ единъ день истиннаго покаанія показахъ. Аще бо часъ каюся, то время безаконьствую, аки песъ възращаюся на своя блевотыни. И вся благаа временьнаа въсприимъ, къ страстемъ нечестіа уклонихся отъ Тебе; поработихся сквернымъ похотемъ, приложихся неразумнѣ скотѣ. Нѣсть убо никтоже на земли прогнѣваяй Тя, якоже азъ; нѣсмь достоинъ възрѣти на высоту небесную отъ множества безаконій моихъ. Аще и простру безаконніи мои руцѣ, мню убо, яко въздухъ осквернится. Кымъ ли словомъ помолюся злоглаголивымъ языкомъ? А его же не имѣю, то како въздамъ Ти Владыко мой? Ни слезъ, ни терпѣніа не имамъ, кротости же и умиленіа [3] не стяжахъ: чистоту же и правду отъ дѣтьства погубихъ, побѣженъ бывъ сластолюбіемь злокозненаго врага; впадохъ въ плотьскыа грѣховныя похоти: погубихъ образъ первыа доброты и весь умъ свой въ земная уклонихъ. Увы мнѣ, Господи Боже мой, Творче небу и земли, богатый милостію, благый щедротами! Отъидохъ далече изъ Твоего божественнаго дому [4] и волею поработихся похотному бѣсу, и, оставивъ ангельское брашно, весь безаконныхъ ядей исполнихся [5], изолихъ паче свиными рожци временныхъ сластей питатися. Разумѣхъ бридость [6] грѣховнаго вкуса: ибо въ часъ токмо насладитъ, а въ вѣкы мученію предасть; мысленымъ же гладомъ лютѣ изнемогаю и доселѣ не възвратихся, яко древле блудный сынъ; ни стяжахъ мытоимьча [7] покаянія, ни разслабленаго стенаніа, ни блудници слезъ, ни хананѣяныни молитвы [8], ни сотьнича добраго смиренія, ни кровоточивыя вѣры [9], ни разбойнича исповѣданія: но яко Каинъ помыслихъ потаити душа моея убійство, забывъ испытающаго тайныя сердца. Но аще азъ умолчю [10] таковая, имамы клеветника діявола не могущаго молчати. Того ради не жду обличающаго мя, но яко Ламехъ исповѣдаю на мя злаа моя. Се бо время живота моего съкращается; скверны же душя моеа умножишася. Се бо вся прежь закона и въ законѣ чресъ естество съгрѣшившая увѣдахъ и дѣла ихъ нечистая въспріимъ, нечаяніемъ лютѣ потопленъ бывъ, и пріяхъ мщеніе злобы, якоже при Нои блудъ творящеи народи. Оставивъ бо, яко ковчегъ, доброе исповѣданіе [11] и съградихъ, яко столпъ, высокомысленыа глаголы, клеветужъ со лжами боговѣщанными утвердихъ словесы, имиже прогнѣвахъ моего Творца. Размѣшенъ быхъ умомъ, не вѣмъ, что глаголю, отвергъ страхъ Божій, яко содомлянинъ безаконновахъ; ни въсхотѣхъ вѣрою избѣжати якоже Лотъ похотнаго запаленія и пребыхъ и доселѣ любострастіемъ одержимъ и боюся гееньскаго огня, въ немъже ми жжену быти; ни оставихъ обычнаго грѣха, да быхъ пришелъ на землю упокоенія, юже Авраамъ наслѣдовавъ, другъ Божiй наречеся. Но пріидохъ окаанный въ мракъ теменъ невъздержаніа, да тѣмъ осудихся, и всякія добродѣтели чюждъ быхъ, ни единаго нрава праведныхъ не въспріяхъ: ни Исакова послушаніа, ниже Ияковля благовѣріа, ни Осифова въздержаніа, ни Моѵсеовы кротости, ни Иовова терпѣніа [12], ни Финеесовы ревности, иже беззаконіе пронзе, ни Халевовы крѣпости, иже о вѣрѣ не изнеможе, ни Ісуса Наввина разума, имъ же обѣтованную землю наслѣдова, ни Іаилины премудрыя доблести, иже Сисару древомъ пригвозди, ни Самуилова богопріятнаго възношенія; но пребыхъ окаанный, яко Дафанъ и Авиронъ, ко учительству чресъ естество желая [13], и окрадохъ Божіа, яко нечестивый Ахаръ, егоже каменіемь побиша, и скверненъ Богови предстою, якоже Анний и Амбрій и не вѣмъ дни, ни часа, когда зинетъ земля и жива пожреть мя, или по писаному одождить на мя Господь огнь жюпель. Аще ли не въспріиму нынѣ достоиныхъ ми наказаній, ожидающу Богу моего покаянія; страшнѣе ми убо есть, еже впасти тамо въ руцѣ живому Богу, отъ Негоже нѣсть изяти могущаго. Охъ мнѣ отъ моихъ грѣховъ! Коя ложесна изнесоша мя? Почто ли родихся на свѣтъ сій? Добрее ми было, аще быхъ родився и часъ не пребылъ и умеръ. Нынѣ же что первое въсплачю? о мукахъ ли бесконечныхъ, или еже отъ Бога отлученіе? Аще бо восхощу почестѝ злаа моя дѣла, всякаго человѣка разумѣюся грѣшнѣе. О мнѣ постонутъ мукы вся и тля и червіе, ожидающе моего телеси, огнь и гроза объяти ми душю. Ковникъ [14] дияволь о мнѣ хвалится. Да что сътворю, не вѣдѣ, и къ кому прибѣгну, избавленія прося, токмо къ Тебѣ Творче мой! Вѣдѣ бо Твое длъготерпѣніе и безлобіе и человѣколюбіе. Кто исповѣсть яже отъ вѣка чюдеса Твоя и слышаны сътворить похвалы милости Твоея: яко не радуешися о смерти грѣшничи, но о обращеніи живота его веселишися. И того ради покаянія образы исперва на всѣхъ показа [15]: Иезекию отъ смерти къ животу възврати, Манасію оть узъ избави, Іону изъ чрева китова исторжъ и Ниневитяны спасе; Петра верховника апостоломъ показа [16]. И что болѣ покаянія, на неже благоволитъ Духъ Твой? Ибо вся правда человѣческая, яко платище изъ паучины, удобь раздираемо и ни во чтоже вмѣнится. Кто бо похвалится предъ Тобою право имѣти сердце, или уповаетъ быти чистъ отъ грѣховъ? Фарисей, праведенъ сый, похвалився, осуждень бысть. Азъ же окаянный объяхъ множествомъ злыхъ грѣховъ, что сътворю, невѣдѣ, или въ кою пропасть себя ввергу? Не имамъ бо силы слезныя, ни [17] сладкаго покаянія, егоже ради [18] Давыда освяти и пророка показа, мытаря оправда, блудницу очисти и блуднаго сына потщався срѣте и божественныя трапезы причастника сътвори. Того ради и азъ бью ся въ перси и въпію изъ глубины сердца: Владыко Господи Ісусе Христе! легеонъ бѣсовьскый древле умоли Тя, да не въ бездну послеши его, и, получивь Твою милость, въ стадо свиное устремися: и азъ молю Тя, Сыне Божій, да не послеши мя въ дебри огненыя за множество золъ моихъ; недостойна бо сътворихъ себе небеснаго Твоего царствіа, но едину отъ обителей дому Отца Твоего подайждь ми. Ибо не праведныхъ ради на землю сшелъ еси, якоже рече неложный Боже: не пріидохъ звати праведныхъ, но грѣшныхъ на покааніе, ибо не требуютъ здравіи врача, но болящіи. Пріими мя Господи, кающагося о сътвореныхъ ми неподобныхъ дѣлѣхъ; не презри мене въ сквернемь припутіи, въ грѣховнѣй удоліи, въ мысленыя разбойникы впадшася и всякыа добродѣтели отъ нихъ съвлечена и страстьми лютѣ уязвена и неисцѣльно боляща душевнымъ похотѣніемъ преминена іереомъ ума моего [19]. Но Ты Самъ, Ісусе спасеное имя, безначальнаго Отца безлѣтный Сыне, имъже всяческая совершена быша, видимая же и невидимая, Пресвятый Царю, Едине безсмертный и человѣколюбче, насъ ради грѣшныхъ отъ Отческыхъ нѣдръ [20] пришедъ [21], раны же и распятіе претерпѣти изволилъ еси, непорочное Твое тѣло на крестѣ повѣшено нечестно презрѣвъ, многими щедротами и человѣколюбіемъ побѣженъ бывъ во мертвыхъ причтеся, да таковымъ, смотрѣніемъ уловилъ еси мучителя діявола, разорилъ еси имущаго державу смерти и все воиньство демоньское явленіемъ креста Твоего побѣдилъ еси, въ преисподняя вшедъ, адово царство разрушилъ еси [22] и отъ сѣтованія тлѣннаго на веселіе приведе и плѣненыя грѣхомъ на прьвое блаженство възратилъ еси. Единъ бо Ты чисть еси и непороченъ за грѣшникы пострадавъ: азъ же скверненъ душею и тѣломъ. Но очисти мя изъ ребръ истекшею Святою Ти кровію, пригвозди страсѣ Твоемь плоть мою и животворящимъ умерщвленіемъ Твоимъ умертви уды телеси моего на зло подвижающася, взыщи мене заблужшаго, якоже погибшаго овчати, его же на рамо вземъ къ Отцу принеси и ангельскыя чины на радость призови. Все бо можеши, елико хощеши, твориши: якоже велико величество Твое, тако милость Твоя безчислена есть [23]. Осияй ми умъ многою злобою омеркшій, да не до конца обыметь мя темный князь, жаданіемъ плотскымъ къ своему хотѣнію работати нудитъ мя, да не малыя ради сладости вѣка сего отъ святаго Твоего чертога изгнанъ буду и связанъ по руцѣ и по нозѣ и негасиму огню преданъ буду; но обычною Ти милостію на моленіе мое призри и приими молитву раба Твоего. Не осуди мене съ беззаконіи моими, ни по грѣхомъ же моимъ въздаси мнѣ: яко беззаконіа моя азъ знаю, и нынѣ каюся о грѣсѣхъ своихъ. Ты же съвѣси немощь естества моего, Зиждителю мой, дай же ми крѣпость и силу, постави нозѣ мои на камени покааніа [24], очисти душю мою отъ всякыя скверны; отжени нечистыа помыслы отъ страстнаго ми сердца; даруй устомъ моимъ тихоглаголаніе, очима моима источникъ слезъ и весь злобный тернъ отъ моего ума искорени; слухъ же ушію моею да огласится [25] божественными Ти заповѣдьми. Научи мя руцѣ мои къ Тебѣ простирати и всего мя учини своего угодника, дай, да и на мнѣ удивится милость Твоя, и вси увидятъ человѣколюбіе Твое: яко милостивъ спаси мя грѣшника. Всесильне, безлобиве, долготерпѣливе Спасе! Дѣло руку Своею не презри, созданіа Своего не остави [26], ни рци, Господи [27]: не вѣдѣ тебе, ни, Господи, не отвратися со гнѣвомъ Твоимъ отъ мене, не посли мя, Господи, въ огнь, егоже трепещетъ душа моя. Ей Владыко мой Господи, не забуди труда раба Твоего, къ Тебѣ бо прибѣгохъ и очи душа моея возведохъ и руцѣ прострохъ и колѣни приклоняю [28], языкомъ молюся, глаголя: помилуй мя, Боже, по велицѣй милости Твоей, по многымъ щедротамъ Твоимъ очисти безаконія моя, яко не мертвіи въсхвалятъ Тя, ни сѣдящіи въ адѣ исповѣдять Ти ся, но мы, суще недостойніи, благословимъ Тебе и молимся, просяще Твоея милости. Самъ бо рече Господи мой: просяй пріиметъ, яко грядущаго къ Мнѣ не иждену вонъ. Ты бо ни единому человѣку погибнути волиши, но всѣхъ спасти глубиною судебъ Твоихъ [29]. Ты бо еси Богъ мой Пресвятый и азъ рабъ Твой грѣшный. Огради мя силою креста Твоего и спаси мя отъ всякаго зла молитвами Пречистыа Владычица нашеа Богородица и святыхъ Ти страстей, еже за ны претерпѣлъ еси Отчимъ благоволеніемъ и Твоимь сыноявленіемъ и человѣколюбіемъ и Святаго Духа смотрѣніемъ. Яко Тя хвалятъ вся силы небесныя въ Троицѣ Единаго Бога и мы земніи милости просимъ и грѣховъ отпустъ. Тебѣ есть миловати и спасати душа наша всегда, нынѣ и присно и въ вѣкы вѣкомъ. Аминь.

Что Ти въздамъ, Господи Ісусе Христе Сыне Божій, за вся, яже еси сътворилъ роду человѣческому? И какову мзду принесу Твоей благости? Ни небо, ни земля не можетъ Тебѣ достойно въздати даровъ. Яко Самъ изволилъ еси пріити на землю спасти грѣшникы [30]: въплотибося насъ ради, бесплотень сый, и волею обнищавъ богатый. Азъ же отметникъ быхъ Твоихъ щедротъ, паче всѣхъ прогнѣвахъ Тя; но, насъ ради страсть пріимъ, исцѣли страсти сердца моего; изволивый осудитися и терніемъ вѣнчанъ быти, душа моея терніе искорени; связавыйся волею и раны пріимъ, разрѣши узы золъ моихъ, отъ ранъ мя вѣчныхъ избави, поруганіе претерпѣвъ и на крестѣ пригвоздися, страсѣ Твоемъ плоть мою пригвозди; искушающаго [31] мя врага крестомъ Своимъ низложи [32]; на трости губою óцта нужею вкусивъ, заглади рукописаніе страстнаго [33] ми грѣха; въ книгы мя животныа впиши; поколебавый отъ основанія землю и каменіе рассадивъ, утверди мя на камени вѣры Твоея, неподвижима мя прочее сътвори; и солнце въ тьму преложивъ, язву копіемъ въ ребра пріимъ, тьму ума моего просвѣти и великую язву грѣховъ моихъ уврачюй; кровь и воду на очищеніе своего създанія источилъ еси, дай же слезы очима моима, да очищу скверны безаконій моихъ; разбойника оправдалъ еси едино възопивша: помяни мя Господи въ царствіи Своемъ: ей Господи! и мене такоже помяни, безпрестани въпіюща къ Тебѣ и того мя части сподоби; пріимый Петра плакавшася, и мое покаяніе пріими; въ гробѣ плотію полежавъ, умерщвлена мя злыми дѣлы оть гроба нечаянія въздвигни, да чистымъ сердцемъ прославляю креста Твоего силу: тѣмъ бо діявола побѣди и умершая отъ вѣка съ Собою въскреси. И за вся сія что Ти воздамъ окаанный азъ, токмо поклоненіе и слезъ умиленіе [34]? Яко да сія пріемъ, Спасе мой, конецъ благъ даруй ми и сподоби мя одесную Тебе стати въ день судный и слышати Твой Святый гласъ, глаголющь: пріидѣте благословенніи Отца моего, пріимѣте уготованное вамъ царствіе [35]. Ты бо еси Богъ нашъ и Тебѣ славу всылаемъ Отцу и Сыну и Святому Духу, нынѣ, присно, и въ вѣкы вѣкомъ. Аминь.

Владыко Господи Вседержителю, Боже Отецъ нашихъ вѣкомъ Творче и концѣни [36] свѣдителю [37], исчитая лѣта и времена измѣряя, живущимъ на земли животу же и смерти имѣя власть! Не остави мене Господи, отинудь растлѣти въ беззаконіихъ, ни гнѣва, противу дѣломъ достойна, не посли на мя, но услыши гласъ молитвы моея. Благоволивъ превести мя житейскую пучину мнозѣми волнами грѣховными погрязнути хотящаго, иже и сего дне долготу сподобилъ еси сконцати и къ началу нощи приблизитися, ея же не чаю преити, бѣсовьскымъ объятъ мечтаніемъ и тмою грѣховною покрываемь, въ нюже спаси мя отъ всякаго совѣта вражія и всякыя скорби и напасти нужа и печали и скверныхъ мыслей, яже беспрестани стужаютъ окааннѣй ми души. Ты бо еси Богъ мой и всякаго добра податель, иже и преже прошеніа дая, изобилова рабомъ Своимъ благаа, помяни смиреніе мое и отверзи устнѣ мои на славословіе Твое и пріими вечернюю сію молитву и дайже невозбранно ми тещи къ заповѣдемъ Твоимъ, не вотще трудитися маловѣріа моего ради. Ты бо рече: възови Мя и избавлю тя: избави мя, Господи, отъ всякыя козни діявола и управи животъ мой. Се бо съ страхомъ предстою Ти, на множество щедротъ Твоихъ взираю выну и умиленіемъ душа припадаю: отъ неполезныхъ мыслей уклони сердце мое и умъ мой къ Тебѣ впери; дайждь ми, Господи, отнынѣ время покаянія, яко пришлецъ есмь азъ, якоже и всѣ отци мои: се бо яко трава заутра процвѣтохъ и навечеръ отъпаду и исъхну . Исцѣли мя, Милостиве, злѣ уязвеннаго грѣховнымъ жаломъ, преже даже не отъиду и къ тому не буду; яко не мертвіи въсхвалятъ Тя, въ адѣ же кто исповѣсть Тя ся. Ей Владыко, Спасе душь нашихь, даровавый намъ надежу въскресенія вѣрующимъ Тя, покой душу рабъ Своихъ, отецъ и братію нашю (имя рекъ) и всякаго племени Христіяньскаго роду, мужеска полу и женьска, и всѣхъ елико въ Тя вѣроваша Ісуса Христа, Сына Божіа. Ты бо рече: вѣруяй въ Мя не умреть, но имать животъ вѣчный, его же и мене причастника сътвори въ земли кроткыхъ, въ селехъ Святыхъ, въ неразоримыхъ храмехъ, въ горнемъ Еросалимѣ, въ немерчающемъ свѣтѣ и нестарѣющемся блаженномъ ономъ вѣцѣ, въ бесконечнѣй жизни, идѣже нѣсть болѣзнь, ни печали, ни въздыханіа, ни дъявола на зло подвизающа, ни грѣха тлю творящаго, но радость неисповѣдима и веселіе неизреченное, и праведникъ множество, пророкъ чинове, апостолъ ликове, мученикъ полци, страстотерпець хоругви, святитель събори, преподобныхъ толпы, пустынникъ совокупленіе и святыхъ женъ крѣпкодушіе, и святыхъ покоище, отъ вѣка угодившихъ Тебѣ, Единому истинному Богу нашему, Отцу и Сыну и Святому Духу и нынѣ и присно, и во вѣкы вѣкомъ. Аминь.

Отъ нощи, къ Вамъ, утренюющи нынѣ, Святители и Пророци, Апостоли и Мученици Господни, мысль мою прегрѣшеній избавите, смердящую душу мою страстьми Вашимъ заступленіемъ исцѣлите, молю Васъ, и сердце мое, колеблющеся отъ непріязни, утвердите и воздыханіа моя услышите Пророци Господни! Іоанне Пророче Предотече и Крестителю, въ пути заповѣди Христови направи мя ходити благодатно. Моисею, Аароне, Ісаіе, Іереміе, Илья, Енохъ и Елисей, яко столпи церковніи, укрѣпите мя волю Господню дѣяти. Захаріе, Іосіе, Давыде и Наѳане, Науме, дайте ми просвѣщеніе и милость. Авдѣе и Софоніе, Самоиле, Іоно, Аввáкуме, Даніиле, Іоиле, Варуше, молитеся за мя къ Богу. Михее, Малахіе, Іезекіе, Агее, Амосе, Ахіе и вси святіи Господни Пророци, моя мольбы пріимите и побѣдника мя страстѣмъ явите. Славніи Пророци, вѣрнымъ поборници и заступници, Святители блаженніи и Священномученици и Преподобніи Отцы, постници черноризци и пустынници: молитеся за мя, даровати ми прощеніе Вашими молитвами. Святіи Христовы мученицы, изліявши кровь Христа ради и тѣло предавши ранамъ, со Ангелы нынѣ Ему предстоящи, молитеся за мя убогаго. И ликъ святыхъ Мѵроносиць и святая жены Мученици и постници, преподобніи святыя Дѣвы: молитеся къ Богу за мя грѣшнаго. Вси святіи Апостоли, Пророци, Мученици, Святители, Преподобніи и Праведніи молитеся Господеви и преже усопшимъ вѣрнымъ отпущеніе согрѣшеніемъ даровати, и избавити я будущаго онаго огня и червій и вѣчныя мукы, и пищи райскыя приати сподобите. Безначальный Господи, великій Царю и Творче вѣкомъ и всему дыханию! Покажи Твоя многыя щедроты на насъ, да не постыдимся на судищи Твоемъ. Ты бо еси реклъ во истину призывающимъ имя Твое: призови Мя, и избавлю тя. Самъ убо милостивый Единъ Праведный, не отлучи мене стояніа оного Твоихъ овець одесную Тебе. Яко Твоя держава и Твое есть царство Отца и Сына и Святаго Духа, и нынѣ и присно, и въ вѣкы вѣкомъ. Аминь.

Примѣчанiя:
При изданіи молитвъ св. Кирилла, были использованы:

Три рукописи Соловецкой библіотеки
а) сборникъ подъ № 802, состоящій изъ статей разнаго содержанія, написанныхъ въ XV и XVI в., въ 4-ю долю, на 202 стр; здѣсь помѣщены 21 молитва св. Кирилла на л. 171-201: всѣ молитвы названы именемъ Кирилла Туровскаго, или Кирилла преподобнаго, Кирилла священноинока;
б) Большой Требникъ дачи Новгор. Митроп. Макарія подъ № 1085, написаный въ 1505 г., въ листъ, на 712 листахъ: молитвы св. Кирилла, въ числѣ 21, занимаютъ здѣсь 684-712 стр;
в) Слѣдованная Псалтырь, принадлежавшая св. Филиппу Митрополиту, написанная въ XVI в. въ 4 долю на 547 стр: здѣсь помѣщены четыре молитвы св. Кирилла: по одной молитвѣ послѣ каждаго молебнаго канона Святой Троицѣ, св. Крестителю, св. Апостоламъ и всѣмъ Святымъ;

Двѣ рукописи Волоколамскаго Монастыря
г) Сборникъ подъ № 109, состоящій изъ разныхъ молитвъ и написанный въ концѣ XV или началѣ XVI в., въ 4 долю, на 258 стр: здѣсь, на стр. 46-138, находится 50 молитвъ, которыя названы именемъ Кирилла грѣшнаго, мниха недостойнаго, кромѣ 8 молитвъ, не означенныхъ ни чьимъ именемъ;
д) Сборникъ подъ № 413, написанный въ XVI в, въ 4-ю долю, на 788 стр: здѣсь помѣщено 12 молитвъ съ именемъ преподобнаго Кирилла или Кирилла священноинока, на стр. 648-686. За основанiе текста молитвъ мы принимаемъ списокъ ихъ въ сборн. Солов. № 802, какъ болѣе исправный сравнительно съ другими списками и будемъ указывать на замѣчательныя разности, заключающіяся какъ въ этихъ спискахъ, такъ и въ печатномъ изданіи (см. статью «Отъ издателя»). Молитвы же, не находящіяся въ этомъ спискѣ, будутъ напечатаны по рукописи Волокол. № 109.

[1] Въ печатномъ изданіи и въ рукописяхъ Соловецкой № 1085, и Волоколамской № 109: како своего нынѣ восплачуся отпаденія...
[2] Въ печатномъ изданіи: понеже ни...
[3] Слова: не имамъ кротости и умиленія, въ печатномъ изданіи пропущены...
[4] Въ печатномъ изданіи: отъидохъ душею далече Твиеи воля.
[5] Въ печатномъ изданіи: всѣхъ ангельскихъ ядей лишихся...
[6] Бридость – значитъ мерзость.
[7] Т. е. мытарева.
[8] Въ печатномъ изданіи: вѣры.
[9] Въ печатномъ изданіи: ни кровоточивыя вѣры — пропущено.
[10] Въ печатномъ изданіи послѣ слова: умолчу, слѣдуетъ: то дѣла возопіютъ; вмѣсто же слова: таковая, напечатано: такова бо, такъ что рѣчь получаетъ нѣсколько другой смыслъ.
[11] Въ печатномъ изданіи: безмолвіе.
[12] Въ печатномъ изданіи послѣ сихъ словъ пропущено все до словъ: да что сотворю, не вѣдѣ...
[13] Въ печатномъ изданіи вмѣсто словъ: ко учительству чресъ естество желая, напечатано: прекоречествовавъ.
[14] Т. е. злокозненный.
[15] Слѣдующее за симъ мѣсто въ печатномъ изданіи нѣсколько измѣнено; въ началѣ прибавлено: Израиля, древле прогнѣвавшаго Тя въ пустынѣ; покаянія ради помилова. Ниневитяни помилова спасè я. Словъ: Иезекию отъ смерти къ животу възврати, — нѣтъ.
[16] Въ рукописи Соловецкой № 1085 прибавлено: не поносивъ ему отметанія...
[17] Въ печатномъ изданіи: ни покаянія истинна...
[18] Въ печатномъ изданія послѣ сихъ словъ прибавлено: Владыко Господи...
[19] Въ печатномъ изданіи эти слова пропущены.
[20] Въ печатномъ изданіи послѣ этихъ словъ прибавлено: отъ небесныя славы.
[21] Въ рукописи Соловецкой № 1085 послѣ сихъ словъ и до конца текстъ совершенно другой.
[22] Въ печатномъ изданіи прибавлено: и вся связанная вѣчная мертвеца и пророки воскреси...
[23] Въ печатномъ изданіи слова: яко велико величество, поставлены ниже, а здѣсь вмѣсто ихъ: Душелюбче Свѣтодавче.
[24] Въ печатномъ изданіи: исповѣданія...
[25] Въ печатномъ изданіи: оградится...
[26] Словъ: созданія своего не остави, въ печатномъ изданіи нѣтъ.
[27] Въ печатномъ изданіи прибавлено: въ день онъ...
[28] Въ печатномъ изданіи: изъ глубины сердца воздышу.
[29] Слѣдующее окончаніе молитвы не согласно съ печатнымъ изданіемъ.
[30] Въ рукописи Соловецкой № 1085 послѣ сихъ словъ и до конца, кромѣ заключительнаго воззванія, текстъ молитвы совершенно другой, и сама молитва гораздо короче.
[31] Въ печатномъ изданіи: ищущаго.
[32] Вь печатномъ изданіи: посрами...
[33] Въ печатномъ изданіи: сладостнаго.
[34] Въ печатномъ изданіи: токмо покаяніе, воздыханіе и исповѣданіе.
[35] Слѣдуюшее за симъ окончаніе молитвы въ печатномъ изданіи нѣсколько измѣнено.
[36] Кончины міра, Вѣдатель.
[37] Въ рукописи Волоколамской № 109: искони Сьдѣтелю.
[38] Напечатана по рукописи Волоколамской № 109. Она совершенно согласна съ молитвою, помѣщенною въ печатномъ изданіи молитвъ св. Кирилла, но въ рукописи она, подобно другимъ, выше напечатаннымъ вечернимъ молитвамъ, также не означена его именемъ.

Печатается по изданiю: Молитвы на всю седмицу святаго Кирилла Туровскаго. // Журналъ «Православный собесѣдникъ», Казань. – 1857 г. – Книга II. – с. 313-331.