Тебѣ [1] единому благому и человѣколюбцу Отцу щедротъ, Богу всесильному единому милостиву, имѣющему всяку власть и послушающему на всякомъ мѣстѣ молящихъ Ти ся, и подавая всяко прошеніе рабомъ Твоимъ, еже къ спасенію: услыши мя грѣшнаго раба Твоего (имя рекъ), молящаго Ти ся въ сокрушеніи сердца и просяща очищенія грѣховъ отъ Твоея благости; исправи путь мой въ слѣдъ Твоихъ повелѣній ходити ми, бѣжати ми отъ всякого пути лукаваго. Ей Владыко мой Боже, Творче небесе и земли, безначальне, невидиме, неодержиме, неисписанне, неизмѣнне [2], Отче Господа нашего Ісуса Христа! молю Ти ся Твоей воли быти на мнѣ, да не, яко свѣрѣпо животно, пасыйся особѣ, отъ злохитраго врага удобь уловленъ буду. Пастуше добрый! не отлучи мене отъ ограды избранныхъ Твоихъ овець, но, яко благъ, покрый мя Твоимъ заступленіемъ, и вся уды телесе моего честнымъ крестомъ Твоимъ утверди; сердце чисто созижди во мнѣ, Боже, и духъ правъ обнови во утробѣ моей; наполни радости уста моя, соблюди душю мою отъ крамолы льстиваго во вся дни живота моего, да зрѣта зѣници мои свѣта судебъ Твоихъ, да не углебну въ тинѣ злыхъ дѣлъ. Вѣдѣ бо Господи, яко не токмо дѣла, но и словеса и мысли къ Тебѣ приносятся; тѣмъ ужасаюся и трепещу праведнаго Ти испытанія, яко нѣсть ничтоже утаено отъ лица очію Твоею, но того ради дерзаю, понеже Самъ рече пророкомъ своимъ: повѣждь ты первіе грѣхы своя, да оправдишися. Но откуду начну глаголати моихъ грѣховъ множество? Кое ли начало исповѣданія обрящу? О чемъ ли первіе прощеніе испросити дерзну? И нѣсть ниединыя злобы, ни безаконія, егоже азъ окаанный не съдѣяхъ; но надѣюся на Твое великое и неизслѣдимое [3] милосердіе: молю Тя, пришедшаго на взысканіе погыбшаго и възвращеніе заблужшихъ. Пострадавый за мя недостойнаго, не за мое недостояніе, но за Твою великую милость, законъ дасть съгрѣшающимъ, пророкы приславъ [4], апостолы посла, вся призывая въ жизнь вѣчную: Тя молю единого блага и благопослушливаго, отъ Святыа Дѣвы воплощьшагося, и сообразенъ бывъ телеси смиренія нашего, да ны сообразны славы Своея сътвориши, подъ закономъ бывъ и поживъ въ мірѣ закону Творець и всей твари Господь и обративый ны отъ идольскія льсти. Ей Господи мой, Господи! Помяни Святую кровь, юже излія за ны грѣшныя и не предай же мене въ радость ненавидящимъ мене, ни истяжи мене словесы [5] въ день испытанія. Пріими [6] молящуюся за ны Пречистую Свою Матерь, Владычицу нашу Богородицу, и славнаго Предотечю Крестителя Іоанна, и вся ны помилуй и мене молящаго Ти ся не уничижи о всѣхъ и за вся. Помяни Господи архіепискупы и епискупы (имя рекъ) со іереи и діяконы, и четца и всякаго чина церковнаго, яже постави пастухи словеснаго Ти стада. Пріими Господи приносимыя Ти отъ нихъ молитвы за міръ и за вся хрестьяны. Помяни Господи цари Православныя и князи. Помилуй Господи князя нашего (имя рекъ) въ здравіи и спасеніи, и державу его миромь огради, и на супостаты укрѣпи его, и землю угобзи, и людіе въ благочестіи умножи, плененыя възврати въ своя си. Глаголи въ сердци его благая о церкви Твоей и о іереехъ и діяконѣхъ и о всякомъ иноческомъ чину. Помяни Господи всѣхъ любящихъ насъ [7], посли имъ стократное Твое възданіе и даждь имъ въ земныхъ мѣсто небесная [8] и умножи Господи на нихъ милость Свою. Помяни Господи множествомъ щедротъ Твоихъ всякаго инока, и игумены, икономы, и служащая мнихы, и всякаго черноризца, иже въ монастырѣхъ и особныхъ мѣстѣхъ, на лици всея земли и въ островѣхъ морьскыхъ и въ пустыняхъ и пещерахъ и въ вертепѣхъ и въ столпѣхъ и въ затворѣхъ. Облегчи Господи тяготу ихъ и утѣши скорбь ихъ, избави отъ насилья діявола и съблюди въ чистотѣ вся дни живота ихъ и молитвами ихъ очисти съгрѣшенія моя. Помяни Господи живущаа въ дѣвствѣ и пощеніи и въ воздержаніи. Помяни Господи вся христіяны: юноты и старцы, и вдовица, и рабы и свободныя, нищая и сироты и сущаа въ болѣзнѣхъ и печали и въ узахъ и темницахъ и иже въ оклеветаніи озлобленыа и томимы по гнѣву. Помяни Господи, яко благый человѣколюбець, и мене недостоинаго раба Твоего (имя рекъ): отпусти ми Господи всяко прегрѣшеніе вольное и невольное. И еще молю Тя, Господи Владыко Пресвятый, избави градъ сій и ограду сію монастырскую, въ нейже пребываемь, отъ всякаго зла и огня и потопа и отъ напрасныя смерти и отъ глада и усобныя брани [9]. Помяни Господи рабы Своя (имя рекъ ихъ же хощеши) о здравіи и спасеніи, не посрами ниединаго же насъ и подайжь намъ всяко прошеніе душевное и тѣлесное, ни отврати лица Твоего отъ моленіа моего, но вся ны введи въ Царство Небесное. Помяни Господи преставльшаяся отца и братью нашю и всякого возраста мужеска полу и женьска, о упованіи въскресеніа жизни вѣчныя; покой я, идѣже вси праведнiи почивають и неомерзи въздыханіа убогія ми душа безочьствующа предъ Тобою, и дайждь ми до послѣдняго издыханія Тебѣ предстоящи просити отпуста грѣховъ моихъ, и въ страшный день предъ Святымъ престоломъ стати одесную, молитвами Пречистыя Матере, Владычицы нашеа Богородица, и силою честнаго креста и святыхъ небесныхъ силъ Михáила и Гавріила и святаго Крестителя Твоего и Предотечи Іоанна, и святыхъ Преподобныхъ Отець нашихъ, поручникъ нашего спасенія, святаго Василіа, Богопустнаго источника, напоившаго весь міръ Спаса нашего ученіа, и святаго Григорія Богослова, небесныхъ таинъ сказателя, и святаго Николы великаго чюдотворца, и святаго Іоанна Златоустаго, емуже на языцѣ Духъ Святый, яко на Херувими почиваше, и святаго преподобнаго отца Ѳеодосія, всея Руси свѣтильника, обѣщавшагося за насъ слово отдати на страшномъ Твоемъ судѣ, на немъже, Господи, и мене неосуженна съхрани, и въ мирѣ управи жизнь мою, молитвами Его и всѣхъ Святыхъ отъ вѣка угождшихъ Ти честныхъ Пророкъ и святыхъ Апостолъ, прехвальныхъ Мученикъ и Преподобныхъ черноризець, ихъ же ради, Владыко Пресвятый, приими молитву мою и спаси мя отъ всякаго зла. Яко Ты еси Богъ мой и, къ Тебѣ прпадая, молюся и Тебѣ славу всылаю, Пресвятѣй Троицѣ, Отцю безначальному всемогущему, Вседержителю, безсмертну, непрестанну, невидиму, вѣкомъ Творцу, единому Премудрому Богу, землю на водахъ основавшему и человѣка отъ земля създавшему, и Спасу всесильному, пресвятому Слову, небеси Творцу, присносущному начальнону Свѣту, животному хлѣбу, обновителю міру, благому пастырю, преже вѣкъ рожену, Ісусу Христу, спасшему человѣческый родъ и Святому Духу, Господу, Самовластьну, быстрообразну, огненосну, безóбразну тонку [10], невидиму, безначальну [11], животворящему, всеначальнику безплотнымъ Силамъ и неразлучну отъ Божіа существа, почивающему на вѣрныхъ, Емуже покланяніе и славословіе и молитвы всылаемь, Отцу и Сыну и Святому Духу, нынѣ и присно, и въ вѣкы вѣкомъ. Аминь.

Честнѣйши Херувимъ и славнѣйши безъ сравненія Серафимъ, Госпоже Владычице Богородице, рождьши Христа Бога нашего: въ день печали моея услыши мя и помози ми грѣшному и окаянному! Святіи Ангели н Архангели, Херувими и Серафими, Престоли, Господства, Начала, Власти и Силы, Михáиле, Гавриле, Уриле, Рафаиле: подвигните съ собою вся небесныя Силы и молите Бога за мя грѣшнаго, дабы милостивъ былъ въ часъ скорби моея. Святый и великій пророче Іоанне, Предотече и Крестителю Господень — въ день бѣды моея помози ми скверному и безаконному. Святіи первіи праведници и велиціи пророцы Еноше, Ное, Мелхиседече, Аврааме, Исааче, Иякове, Иосифе съ единонадесять Патріархы, Моисею, Аароне, Ісаіе, Давыде, Иліа, Самоиле, Даниле, Іеремею, Іоиле, Захаріе, Науме, Софоніе, Аввакуме, Гедеоне, Иосіе, Михею, Захарие, Авдию, Малахие, Елисею, Аммосе, Іезекіилю, Анание, Азаріе, Мисаиле, Іона, Аггѣю, со всѣми пророкы молитеся за мое окааньство и помилуйте мою душю, осквернившююся многыми злыми дѣлы. Святіи верховьніи велиціи Апостоли, избранніи Божіи, Петре и Павле, Іоанне, Іякове, Аньдрѣю, Филиппе, Матѳею, Луко, Марко, Фомо, Варфоломие, Іякове Алѳѣевъ, Іуда Іяковлю, Симоне Зилотъ, Варнава, Іяковъ, братъ Господень, Прохоръ, Стефанъ Архидіяконъ, Тимоѳѣй: подвигнете съ собою всѣ седмьдесятъ ученикъ Христовыхъ и молитеся за мя грѣшнаго и непотребнаго раба своего къ милостивому Владыцѣ и Господу Ісусу Христу. Святіи страстотерпци и велиціи мученицы и исповѣдницы и безсребренници и чюдотворци и младенци Георгие, Дмитрие, Ѳеóдоре Тиронъ, Никито, Ѳеóдоре Стратилатъ, Гуріе, Самоне, Авиве, Прокопие, Евстратие, Меркурие, Арефо, Мино, Акакие, Андрѣю Стратилатъ, Христофоре, Прове, Тараше, святіи 40 [четыредесять] мученикъ въ Севастіи, Александре, Сергие и Вакше, Борисе, Глѣбе, Михáиле княже, Ѳеодоре, воеводо Трифоне, Нестере, Флоре, Лавре, Михáиле балгаринъ, еже есть святое дѣтя, Козмо, Дамиане, Ермолае, Пантелѣймоне, Кире, Іоане, Кириче трилѣтный, Мамонте, Саво Готѳине, Галактионе, Хрисанѳе, Стратонниче, Василиско, Кондрате, Кóноне, Димитріе, иже въ Даодѣ и вси святіи мученици, ликъ страстотерпець, помолитеся Богу за мя лукаваго и лживаго къ Богу и человѣкомъ, помилуйте мя грѣшнаго раба своего, избавите мя грѣховныя скорби. Святіи Святители и учители вселенней, столпи неподвижимии, утверженіа церковная: Деонисие Ареопагите, Иерофие, Игнатіе, Лазаре, Климянтие, Василей Кесарійскій, Григорей Богословъ, Іоанне Златоустъ, Никóлае, Силиверсте, Спиридоне, Григоріе Митиленскій, Петре Александрьскій, Григоріе Арменьскій, Кирилъ Александрьскій, Афонасей, Евстафіе, Антіохъ, Анфиме, Амъѳилохие, Григорие чюдотворче, Поликарпе, Ипполитъ папа Римскій, Леонтій Ростовьскій, Іона Митрополитъ новый чудотворець – подвигните съ собою вся святыя Святители и весь ликъ богоносныхъ отецъ, молите Бога Спаса за мя недостойнаго и лениваго, разрѣшите мя отъ грѣхъ моихъ великыхъ и тяжкыхъ. Святіи преподобніи Отци и постници и велицыи пустынници, земніи ангели и небесніи человѣцы Антоніе, Ѳеодосіе, Феодоре Студійской, Пимине, Сисое, Арсение, Іоанне Коловъ, Венедикте, Максиме, Ефреме, Ануфріе, Макарие Египтянинъ, Павле Ѳивской, Даниле Скитскій, Паисие Священный, Павелъ подругъ его, Макарие Александрійскій, Павле простый, Агаѳонъ, Висарионе, Пахоме, Паѳнутие, Авраамие, Василие Новый, Григорие ученикъ его, Акакие, иже въ Лѣствицѣ, Архипъ, Агриколае, Ефросине, Ѳилимоне отшельниче, Антоние, Ѳеодосие Печерьскій, Варламе Новгородскій, со всѣми преподобными снемшася подвигнитеся, молитеся за мене грѣшьнаго и худаго смиренаго многыми грѣхы. Святыя праведныя и преподобныя жены и мученицы всѣ вкупѣ: Анна, Еласавета, Маріа, Ѳекло равноапостоломъ, Анно, Анастасие, Ѳетиное, Ирино, Елено, Марино, Маріе, Евѳиміе, Евгение, Ѳедоро, Пелагие, Таисие, Ѳевроние, Евпраксие, Евдокие, Екатерино, Парасковие, Евфросиние, Матрено, Сусано, Домнико, Анфусо, Анастасие, Иулияние, Христино и Улито, Наталие, Епистимие, Зиновие, Агаѳие, подвигните съ собою вся святыя жены избранныя преподобныя и мученицы и преже закона благовѣрно жившая, весь ликъ святыхъ женъ и съ мироносицами молите Бога за мое окааньство и недостоиньство, да быхъ вашими молитвами избылъ мукы вѣчныя и огня вѣчнаго негасимаго. Вси святіи Божіи, преподобніи и праведьніи иже отъ створениа міру подвигомъ великимъ угоди(ша) Богу, и трудомъ многымъ побѣди(ша) дьявола и попрали нивочтоже створьше со всѣми бѣсы его! Азъ грѣшный рабъ Божій припадаю къ вамъ всѣмъ Святымъ, пріимите мя грѣшнаго и сквернаго и сохраните мя во вся дни и нощи и на всякъ часъ на пути и въ дому и въ всякомъ мѣстѣ, и во исходъ душа моея на въздусѣ; помозите ми въ день судный, молитеся за окаянную ми душю Богу Вседержителю, Ему же слава, честь и поклоняніе Отцу и Сыну и Святому Духу, всегда нынѣ и присно, и въ вѣкы вѣкомъ. Аминь.

На множество щедротъ Твоихъ надѣюся, припадаю Ти, Христе Спасе, и на величество чюдесъ Твоихъ взираю выну, прошу милости Твоея великыя! Но не отверзи мене отъ Твоего лица за множество грѣховъ моихъ; зане же прогнѣвахъ святое имя Твое. Рѣхъ бо съхранити законъ Твой и не съхранихъ; и того ради чюжь быхъ всякаго добра. Украдено ми бысть духовное богатство, а душа моя, аки плѣнница, лютѣ уничижена есть. И нынѣ паки къ Тебѣ възвращаюся и отданіа прошу многыхъ ми прегрѣшеній: вѣдѣ бо Твое человѣколюбіе. Аще хощеши, можеши мя очистити: понеже разслабленаго онаго, егоже [13] въ суботу стропомъ [14] низвѣсивше съ великою вѣрою положиша и того словомъ въстави и грѣхы отпусти. Ей, Господи Боже мой! и мене, разслаблена суща многыми грѣхы, отинудь [15] недвижима нечаяніемъ, Твоею милостію въстави. Едине премудре, врачю душамъ и тѣломъ, иже словомъ запрѣтивъ волнамъ морскымъ! Устави бурю страстей моихъ и волны утиши нечистыхъ ми помышленій, запрети бѣсу, всегда стужающему ми, да отступитъ отъ моея немощи, да, яже нечювственно изгубихъ, сіа паки покаяiемъ приобрящу, поминая блуднаго и блудницу, и разбойника и мытаря, хульника и отметника, ихъ же приснопамятны показа покаянія ради, да и мене кающася не презри. Ты бо съвѣси безуміе мое и грѣси мои отъ Тебе не утаишася. Якоже бо велико величество Твое, тако и милостъ Твоя бесчислена есть. Господи! прости, отдай, яже Ти съгрѣшихъ; очисти, избави мя отъ всякаго зла молитвами Пречистыа Владычица нашеа Богородица [16], и всѣхъ Святыхъ, иже отъ вѣка Тебѣ угодившихъ. Яко Ты еси Богъ мой и Тебѣ славу и молитву всылаемъ Отцу и Сыну и Святому Духу, нынѣ и присно, и въ вѣкы вѣкомъ, Аминь.

Господи Ісусе Христе, Сыне Божій, многомилостиве человѣколюбче, не хотяй смерти намъ грѣшникомъ, но всякыми образы ведый ны къ спасенію, презря [17] грѣхы, покааніа ожидаа, егоже [18] на мнѣ долготерпѣлъ еси, снабдя мя по вся дни живота моего и все благодѣяніе подая моему недостоянію: милостивъ бо еси человѣколюбець плоти нашеа обещникъ [19], въ нюже одѣявся, человѣкы обожи, и на первое достояніе позва, насъ ради, за наше спасеніе, на крестѣ распятся, и въ гробѣ полежавъ, и въскресе въ третій день, свободивъ праведныхъ душа, держимыа въ адѣ! Призри, Господи, на смиреніе мое и пріими вечера сего моленіе, еже недостойнѣ всылаю Ти! Яко голубь неразуміемъ поучаюся, или яко вранъ неподобно зовый, не хитростію словесе возвышая гласъ, но горестію душа изъ глубины сердца въздыша, Тебѣ преклоняю сердце [20], Тебѣ на колену припадаю и руцѣ простираю. Ты бо съвѣси безуміе и грѣхы мои отъ Тебе не утаишася. Вѣси бо немощь естества моего, Зижителю мой! Да что принесу [21] на угоженіе Твое, иди что въздамъ вѣчныя жизни подателю? Но ничтоже имамъ, на негоже благоволитъ Духъ Твой. Но не прогнѣвайся на мя, много [22] бо глаголю предъ Тобою; ниже отрини мене отъ Твоего лица, не опасивь языкъ имуща, ни удержи щедротъ Твоихъ оть раба Твоего: безъ Твоея помощи не могу ничтоже творити. Дерзаю умомъ Тебѣ безпрестано молитися и, мыслью раслабѣвъ, ни часа молитвѣ оставихъ, духомъ желаю Тебѣ предстояти день и нощь, и тѣломъ низпадаю въ тинѣ злодѣяній моихъ. Но Господи Господи мой! отъ небытія сътворивый мя, отъ юности же и до сего дне снабдѣвый мя, и нынѣ помилуй мя, избави душю мою отъ сѣти [23] вражiа и помыслы, смущающая [24] отъ сердца моего потреби; утверди нозѣ мои на недвижимемь основаніи, на твердемь вѣры Твоея камени, да не поразить буря грѣховная телесныя ми храмины; но буди ми стѣна твердая отъ лица вражіа. Положи страхъ Твой посредѣ сердца [25] моего, да отражу долу влекущую мя похоть плотьскыми [26] помыслы. Укрѣпи мя, Господи, всемощною десницею Твоею на невидимыя и видимыя враги и дайждь ми послѣдній часъ дне сего богобоязненно преити и на темнаго искусителя вооружитися. Дажь ми честнаго и животворящаго креста знаменіе, его же вся толпы [27] бѣсовьскыя трепещуть и тающеся [28] отбѣгаютъ. И дажь тѣлу моему ложе покойно и очима моима легокъ сонъ. И да не уснетъ, ни въздремлеть храняй мене ангелъ, — да тѣмъ наставляемь, полунощьныя и заутреняя молитвы въздамъ Тебѣ просвѣщеннымъ разумомъ, умомъ неуклоннымъ [29], и на всякъ день Тебѣ угожаю со всѣми любящими Тя въистину. Съ ними же сподоби мя одесную Тебе стати, молитвами Пречистыа Ти Матере, Владычица нашеа Богородица; и силою честнаго и животворящаго креста и святаго [30] въскресеніа Твоего [31], егоже неосуженно мя сподоби видѣти [32], милостію и человѣколюбіемъ безначалънаго Ти Отца, съ Нимъ же благословенъ еси съ Пресвятымъ, благимъ и животворящимъ Ти Духомъ, всегда и нынѣ и присно, и въ вѣкы вѣкомъ. Аминь.

Хвалю Тя Господи Боже мой, пою и величаю Тя Господи и славлю Твою благостыню, благославлю и превозношю Тя Пресвятый и хвалю Твое человѣколюбіе и поклоняюся, славословлю Твое тредневное воскресеніе! Яко отъ бреніа рукою мя создавъ и оживилъ мя еси Духомъ Своимъ, господина всей земли постави мя и яко отець заповѣда ми чистоту хранити бескверну: окраденъ быхъ совѣтомъ зміинымъ, не радихъ Христе закона Твоего, срамляюся моего обоженія [34]. Яко праведенъ сый, и предалъ еси во тлѣние земли разрушитися, отъ нея же зачахся, и возрастити земли повелѣлъ еси терніе отъ сотъ впечали мнѣ; распространихся и въ безаконіихъ моихъ причтыхся скотѣмъ несмысленымъ. Но вся плоть потопивъ въ водахъ, мое обличая нечестие, ненаказа мене ярость гнѣва Твоего и не почюхъ гнѣвающаго Тя, но грѣха моего безуміемъ возрастихъ и безаконіе мое умножихъ, и Твое святое имя Господи въ твари предахъ, Твое отвергохъ божество и бездушнѣй твари послужихъ, и Твое имя святое прогнѣвахъ Владыко. Но Ты пакы щедротами Твоими преклоняяся, великъ въ милосердіи еси, не терпѣ зрѣти созданіа своего отъ дьявола мучима, но преклонь небеса человѣколюбно, мене ради бывъ человѣкъ отъ Дѣвы чистыя, якоже писаше въ законѣ Моисей и пророци, оплеванъ бывъ и поруганъ, долготерпѣливе, и заушенъ и на смерть осуженъ, и на крестѣ пригвоздитися изволилъ еси и въкуси смерть, безсмерътный, и воскресе тредневно. Господи, воздвигни мене осуженнаго на славословіе, и очисти мя отъ соблазнъ моихъ. И сына славы Твоея сотворилъ мя еси, и Отца Тя нарицати сподобилъ мя еси: по пакы преступихъ заповѣдь Твою и грѣхови рабъ быхъ. Тыже, Господи, даровалъ ми еси покоянію время и пакы да слезами моими омыю я. Пріими, Спасе, мое (покаяніе) и очисти мя отъ сквернъ соблазнъ моихъ и потокъ слезами подаждь ми, да угашю огнь вѣчный, рыдание и покааніе подаждь ми, да избѣгну будущаго плача; воздыханіе и обращеніе посли ми, да здѣ плачюся и каюся оного мученіа, и въ первое одѣаніе одѣжи мя, Христе, и въ чертогъ Твой пріими мя, идѣже гласъ Ангелъ Твоихъ и праведныхъ лицы радуются. О, Пресвятая Троице Единосущная! отъ славы Твоея не отверзи мя грѣшнаго. Ты бо божественая Троице: чту и поклоняютися и Тебѣ угожю всѣмъ сердцемъ моимъ, нынѣ и присно и въ вѣки вѣкомъ. Аминь.

Сподоби мя, Господи, сія заря и само то солнце видѣти и безъ грѣха сохранену ми быти Твоимъ заступленіемъ, Владыко, и дайждь похвалити непобѣдимую силу Твою! Яко вельми красну тварь помыслилъ еси быти, на службу насъ ради грѣшныхъ, да и азъ (буду) сподобленъ свѣта сего. Молютися, Господи, дайждь ми, милостиве, немерцающій, безконечьный нетлѣнный свѣтъ лица Твоего нѣкогда видѣти. Нынѣ же, помощію Твоею понуждаемъ, о милости Твоей радуася вопію глаголя: слава Ти, Святая, Единосущная и Нераздѣлимая и Животворящая честная Троице, Отца и Сына и Святаго Духа, и нынѣ и присно и въ вѣки вѣкомъ. Аминь.

Примѣчанiя:
При изданіи молитвъ св. Кирилла, были использованы:

Три рукописи Соловецкой библіотеки
а) сборникъ подъ № 802, состоящій изъ статей разнаго содержанія, написанныхъ въ XV и XVI в., въ 4-ю долю, на 202 стр; здѣсь помѣщены 21 молитва св. Кирилла на л. 171-201: всѣ молитвы названы именемъ Кирилла Туровскаго, или Кирилла преподобнаго, Кирилла священноинока;
б) Большой Требникъ дачи Новгор. Митроп. Макарія подъ № 1085, написаный въ 1505 г., въ листъ, на 712 листахъ: молитвы св. Кирилла, въ числѣ 21, занимаютъ здѣсь 684-712 стр;
в) Слѣдованная Псалтырь, принадлежавшая св. Филиппу Митрополиту, написанная въ XVI в. въ 4 долю на 547 стр: здѣсь помѣщены четыре молитвы св. Кирилла: по одной молитвѣ послѣ каждаго молебнаго канона Святой Троицѣ, св. Крестителю, св. Апостоламъ и всѣмъ Святымъ;

Двѣ рукописи Волоколамскаго Монастыря
г) Сборникъ подъ № 109, состоящій изъ разныхъ молитвъ и написанный въ концѣ XV или началѣ XVI в., въ 4 долю, на 258 стр: здѣсь, на стр. 46-138, находится 50 молитвъ, которыя названы именемъ Кирилла грѣшнаго, мниха недостойнаго, кромѣ 8 молитвъ, не означенныхъ ни чьимъ именемъ;
д) Сборникъ подъ № 413, написанный въ XVI в, въ 4-ю долю, на 788 стр: здѣсь помѣщено 12 молитвъ съ именемъ преподобнаго Кирилла или Кирилла священноинока, на стр. 648-686. За основанiе текста молитвъ мы принимаемъ списокъ ихъ въ сборн. Солов. № 802, какъ болѣе исправный сравнительно съ другими списками и будемъ указывать на замѣчательныя разности, заключающіяся какъ въ этихъ спискахъ, такъ и въ печатномъ изданіи (см. статью «Отъ издателя»). Молитвы же, не находящіяся въ этомъ спискѣ, будутъ напечатаны по рукописи Волокол. № 109.

[1] Въ печатномъ изданіи начало молитвы нѣсколько измѣнено: Едине благій человѣколюбче Боже, Сый со Отцемъ и Святымъ Духомъ, Богъ всесиленъ...
[2] Въ печатномъ изданіи и рукописи Соловецкой № 1085 вмѣсто словъ: неизмѣнне Отче Господа нашего Ісуса Христа — Едина держава сый со Отцемъ и Святымъ Духомъ...
[3] Въ печатномъ изданіи и рукописи Соловецкой № 1085: безчисленное и неисповѣдимое...
[4] Въ печатномъ изданіи и рукописи Соловецкой № 1085: пристави...
[5] Въ печатномъ изданіи и рукописи Соловецкой № 1085: не истяжи отъ мене словесъ...
[6] Въ печатномъ изданіи этого обращенія къ Богоматери и Крестителю нѣтъ, тамъ напечатано: услыши Господи недостойнаго раба Твоего, молящагося Ти о всѣхъ и за вся. Потомъ — помяни и проч...
[7] Въ печатномъ изданіи послѣ этого прибавлено: и творящихъ намъ милостыню и кормящихъ насъ и всѣхъ служащихъ намъ и послужившихъ, и посли имъ...
[8] Въ печатномъ изданіи послѣ этого слѣдуетъ: и во тлѣнныхъ мѣсто нетлѣнная, а дальше все до словъ: помяни Господи рабы Своя... пропущено.
[9] Въ печатномъ изданiи все слѣдующее за симъ мѣсто, до словъ: яко Ты еси Богъ и къ Тебѣ припадая молюся — сокращено; призыванія Святыхъ нѣтъ, а одно краткое прошеніе за живыхъ и усопшихъ.
[10] Въ печатномъ изданіи вмѣсто Словъ: безóбразну тонку, поставлено: крѣпку.
[11] Въ печатномъ изданіи: безпечальну.
[12] Напечатана по ркп. Волокол. № 109, въ которой она не означена именемъ Св. Кирилла.
[13] Въ печатномъ изданіи это измѣнено такъ: иже въ суботу со многою вѣрою положеннаго предъ Тобою, того словомъ и проч.
[14] Т. е. черезъ кровлю (стропила).
[15] Въ печатномъ изданіи: и отнюдь нечаяніемъ одержима...
[16] Въ печатномъ изданіи эта молитва оканчивается иначе. Послѣ словъ: молитвами Пречистыа Владычица нашеа Богородица — слѣдуетъ: и святыхъ Праотецъ и Богоносныхъ Леввитъ и святыхъ Пророкъ и Богоизбранныхъ Іерей и прехвальныхъ Апостолъ и святаго сего (имя рекъ) и всѣхъ Святыхъ, отъ вѣка угодившихъ Тебѣ. Яко Свято и покланяемо есть имя Отца и Сына и Святаго Духа, преблагаго и животворящаго: нынѣ и присно и во вѣки вѣкомъ Аминь.
[17] Въ печатномъ изданіи словъ: презря грѣхи, нѣтъ.
[18] Въ печатномъ изданіи словъ: егоже на мнѣ долготерпѣлъ еси, нѣтъ.
[19] Общникъ.
[20] Въ печатномъ изданіи: выю и сердце.
[21] Въ печатномъ изданіи: сотворю.
[22] Въ печатномъ изданіи вмѣсто словъ: много бо глаголю, напечатано: много зла сотворшаго предъ Тобою...
[23] Въ печатномъ изданіи: отъ лести...
[24] Въ печатномъ изданіи: смущающія сердце мое.
[25] Въ печатномъ изданіи: посредѣ утробы моеа.
[26] Въ печатномъ изданіи и рукописи Соловецкой № 1085: похоть плотскую.
[27] Въ печатномъ изданіи: полки...
[28] Въ печатномъ изданіи: потаящеса; въ рукописи Волоколамской № 109: потающеся.
[29] Въ печатномъ изданіи: умомъ неуклоннымъ, нѣтъ.
[30] Въ печатномъ изданіи: тридневнаго...
[31] Въ печатномъ изданіи молитва оканчивается иначе. Послѣ обращенія къ Богоматери слѣдуетъ: и святыхъ небесныхъ Силъ и святаго Іоанна Предотеча и святыхъ прехвальныхъ Апостолъ и всѣхъ Святыхъ отъ вѣка Тебѣ угодившихъ. Съ ними же и азъ грѣшный Тебѣ славу возсылаю со Отцемъ и Святымъ Духомъ, нынѣ и присно и въ вѣки вѣкомъ. Аминь.
[32] Въ рукописи Волоколамской № 109: достигнути.
[33] Молитва эта и слѣдующая напечатаны по ркп. Волок. № 109. Онѣ не означены именемъ святаго Кирилла.
[34] Обнаженія (?)

Печатается по изданiю: Молитвы на всю седмицу святаго Кирилла Туровскаго. // Журналъ «Православный собесѣдникъ», Казань. – 1857 г. – Книга II. – с. 331-351.