Древле убо богодухновенымъ органомъ божественніи пророци проявиша намъ о страншѣмъ и вторѣмъ пришествіи Господа Бога и Спаса нашего Ісусъ Христа; такоже и блаженіи апостоли и богоносніи отцы, божественный, небесный пріемля языкъ и мнозѣмъ смотрѣніемъ отъ Божественныа премудрости еѵангельскаа словеса намъ изложиша. Сего же ради, любиміи, хощу и азъ днесь предложити о семъ слово вашей любви, поне [1] бо мнози отъ небреженнаго уныніа впадають въ грѣховъ величество и въ пренемоганіа предмножество (?), Божіе помышляюще человѣколюбіе, сіа вѣщаютъ глаголы: нѣсть, рече, геена рекше родство [2] огненое, и нѣсть мука, вся намъ оставитъ Богъ согрѣшеніа, ихже вразумляютъ святіи, отъ Бога вдохновенни суще. И яко убо по чину въспріимѣмъ вси человѣци, слыши пророка Езекіиля, отъ Господа что глаголюща: въ чемъ тя обрящу, въ томъ тя сужю. И Давыдъ глаголеть: яко Ты воздаси комуждо по дѣломъ его [3]. И Павлу тояже рекшу: въздаси комождо по дѣломъ его [4]. О страшный день онъ втораго пришествіа Христова и будущаго суда! и ужасно намъ оно судище и словоположеніе грознѣйше, егда престоли поставленни будутъ, и книги разгнутся, и Судіа сядеть нелицемѣренъ и тмы тмами ангелъ дароносимъ; тогда трубы възгласять великымъ гласомъ, отъ святыхъ ангелъ вдохновенни бывше, тогда небеса погыбнуть и състави [5] вси изгаряеми изстають, и будеть небо ново и земля нова, и вся земнаа обновятся и единемъ возрастомъ вси будуть, и все естество человѣчьское обнажено, и нелицемѣрному Судіи предстанеть, и ангели Его окрестъ престола страшнаго (со) страхомъ и трепетомъ стояще, пламенни по видѣнію, огнемъ мучительнымъ блистающе, огнь зряще, огнь испущающе, огнь дышуще; и къ симъ вся тварь земнаа и небеснаа; и къ симъ всѣхъ насъ дѣяніа обнажатся и съскровеннаа вся наша открыются, якоже всѣмъ намъ не знати другъ другу грѣхы, якоже кождый своя книгы совѣсти своей прочитати. Но кто истерпѣти можеть страшную ону и праведную Судіи тяготу, полну сущу гнѣву и ярости, исполнь плача и вопля и кричаніа и горести и ужаса и страха и трепета и терзаніа! Тогда бо вся видимыхъ тварь колебляющися будеть. Страшенъ бо, рече, день Господень, горекъ и жестокъ день гнѣва онъ, день скорби и нужди, день тмѣ и невѣдѣніа, день трубный и вопля, и оскорбляеми, человѣци изыдуть, якоже слѣпіи, понеже Господеви согрѣшиша, и въ огни Его изждежена будеть вся земля, яко скончаніе сътворить Господь Вседержитель на вся живущаа на земли. И чтоже сотворимъ тогда иже въ мнозѣхъ грѣсехъ повинніи человѣци, и гдѣ избѣжимъ мукъ, братіе? Тамо бо тма кромѣшнаа и скрежетъ зубный и юзы нерѣшимыа, червь неусыпающь и огнь неугасимый, скорбь и тѣснота, горесть и болѣзнь и въздыханіе едино токмо; тамо языкомъ пряженіе и тамо стражи и мукы вѣчныа. И чтоже сотворимъ тогда, егда отводими будемъ въ таковаа безконечнаа мученіа? Вся бо тогда немилостивна и непрощенна; огнь ихъ не угаснеть и червь ихъ не скончается; и нѣсть тамо покааніе, ниже исповѣданіе, якоже рече блаженный Давыдъ: нѣсть въ смерти поминаяй Тебе, и въ адѣ же кто исповѣсть Ти ся? [6]. Но ужаснемся убо, чада моа възлюбленнаа, и въсплачемся, исповѣдающе грѣхы своа, таковаа слышавше; и да исправимся предъ Господемъ и восплачемся прежде часа оного, яко да не тогда вѣчно имамы плакатися, елици достойнаа огню и тмѣ содѣавшеи и зли дѣемъ; мимоходить бо житіе се наше, и посѣченіе приближается и страшный день онъ ждеть суда и воздааніе. Судіа же есть праведный единый истинный Богъ, не свѣдѣтелей требуеть и ни обличителей, не явленіа дѣломъ, и хощеть судити всѣхъ, и отъ Адама даже и до скончаніа бывшихъ, еллины, іудеа, еретикы и иже въ православнѣй вѣрѣ согрѣшившихъ и не покаявшихся. Всѣхъ бо въскреситъ и съберетъ Богъ въ день онъ страшный, недоумѣніа сихъ преднихъ открыеть глаголаніа, дѣаніа и дѣла лести, ненависти, и о всѣхъ сихъ отдамы слово, и истязаніа пріимемъ. Нѣсть бо тайно, еже не явлено будеть тогда, ниже потаенное, еже не познается. Обличатьбося и представять [7] предъ лицемъ нашимъ вся согрѣшеніа наша, якоже и пророкъ свѣдѣтельствуеть о сихъ. Что убо сътворимъ, егда судище страшное зримо будеть, и мы, предстоаще трепетни, огненнаа же рѣка и мученіа уготовленна и судъ отвѣтный и судъ немздоимный? И что сотворимъ тогда, чада моя, егда нѣсть кто предстательствуяй, ниже поспѣшьствуяй, ни отець, ни мати, ни сынъ, ни дщи, ни внучата, ни мужь о своей женѣ, ни жена о своемъ мужи? Кождый бо имѣеть свою нуждю, и тогда о другомъ пещися не можеть, ниже братъ тамо пособити можеть, ни сестра, ни другъ, ни сродникъ, ни сосѣдъ, ни знаемый. Свидѣтель бо о сихъ пророкъ Давыдъ, глаголяй: братъ не избавитъ, избавитъ ли человѣкъ? не дастъ Богу избавленіе себе [8] и цѣны избавленіе души своей, ни имѣніа богатьства, ниже ино что человѣческое, якоже и о семъ пророкъ глаголеть: надѣющеися силѣ своей и о множествѣ богатьства своего хвалящеися вкупѣ безуменъ и несмысленъ погыбнуть и оставять чуждимъ богатьство свое, но симъ всѣмъ спона [9] будеть съ трепетомъ и ужасомъ великымъ, аще богатъ сый кто, или убогъ, или малъ, или великъ, или владалецъ, или владаемъ, ли мужъ, ли жена, ли старъ, ли младъ, ли славенъ, ли неславенъ, аще кто отъ превеликыхъ и изящныхъ, едино токмо отъ дѣлъ имамы помощь и споспѣшника, или пакы оправданіе и осужденіе. Богъ богомъ Господь глагола, и призва землю отъ востокъ солнцу даже и до запада, Богъ явѣ пріидетъ Богъ нашъ и не премолчитъ, огнь предъ Нимъ възгорится, и пламень окрестъ врагъ Его, яко пріидетъ судити земли, судити вселенней въ правду и люди правостію, глаголетъ пророкъ [10]. Словеса взыщетъ Судіа праведный о яже каждой сдѣлалъ; благыа же, праведныа поставить одесную и яко благословеніе Отца Моего въ наслѣдіе уготованнаго имъ царства предпозоветь, и введеть въ вѣчно радоватися; лукавыа же грѣшныа поставить ошуюю, и яко проклятыхъ я отвратится, и негасимому оному огню, еже бѣсовомъ отлученному, послетъ и осудить вѣчно мучитися. Сего же ради, молю васъ возждѣленнаа чада моа, (со) страхомъ и трепетомъ же послушати вамъ еѵангельское слово, яко Богъ глаголя въ Матѳеи, и сице вѣщаетъ: рече Господъ: егда пріидеть Сынъ человѣчьскый въ славѣ своей, и вси святіи ангели съ Нимъ: тогда сядетъ на престолѣ славы своеа. И зберутся предъ нимъ вси языци, и отлучить ихъ другъ отъ друга, якоже пастырь разлучаеть овца отъ козлищь. И поставить убо овца одесную, а козлища ошую [11]. И тако глаголеть убо Христосъ, сый Богъ нашъ о своемъ вторѣмъ пришествіи. Первое убо пришествіе, възблюбленіи, егда сниде на землю, еже спасти насъ, (бысть) въ смѣреніи и въ нищетѣ, и въ безчестіи и въ поруганіи и въ поношеніи бывъ; сего ради глаголеть: егда пріидеть въ славѣ своей, еже въ второмъ ономъ пришествіи съ славою и съ силою пріидеть отъ ангелъ дориносиму Ему, (со) страхомъ и трепетомъ предстоащимъ Ему. О томъ бо дни пророкъ Даніилъ глаголаше: видѣхъ, дондеже престоли поставишася, и Ветхый деньми сѣде; огненаа же рѣка течеть предъ Нимъ, тысящами тысящь служахуть Ему, и тмами тмы предстоахуть Ему [12]. Судіа сѣде, и книгы отверзошася. И егда убо сіа вся будуть, кто постоитъ, кто дерзновенъ будеть? И аще Даніилъ пророкъ тако устрашися, и ужасенъ бысть о сихъ, и что сътворимъ мы смиреніи и грѣшніи, на сихъ вещехъ приходяще? Первѣе же разлучаетъ святыа Господь отъ грѣшныхъ и поставляеть одесную себе, премѣняеть ихъ страха и подвига, тогда гласить къ нимъ: нынѣ убо смѣшени суть вси праведници и грѣшници, тогда испытно раздѣлятся. Овци убо называеть святыа ради кроткаго и смѣреннаго и незлобиваго ихъ житіа, яко плодъ намъ дають святіи ползу, якоже овци вóлну подають, рекше покровъ Божественный и духовный и млекомъ напояють насъ, еже есть пищу пригодную подають душамъ нашимъ полезну и спасительну. Козлища же, глаголеть грѣшныа, егда къ стремнинамъ идуть на беззаконіе и на пропасти, и безчинни суть и неплодни грѣшници, якоже и козлища. И овци убо и козлища естественное имѣють, еже имѣють, праведници же и грѣшници отъ произволеніа. Сего ради праведници убо почіютъ, грѣшници же мучими бывають, и раздѣляеть ихъ Господь, не требуя свѣдѣтелехъ, но самъ и Свидѣтель сый и Судіа. Тогда речеть Царь сущимъ одесную себе: пріидѣте благословеніи Отца Моего, наслѣдуйте уготованное вамъ Царство, отъ сложеніа міру: взалкахъ бо, и дасте Ми ясти, жаденъ быхъ, напоисте Мя, страненъ бѣхъ, и въведесте Мя, нагъ бѣхъ, одѣасте Мя, боленъ и въ темници, пріидосте ко Мнѣ. И тогда отвѣщають Ему праведници глаголюще: Господи, когда Тя видѣхомъ алчюща и напитахомъ, жаждуща и напоихомъ, когда ли Тя видѣхомъ странна и введохомъ, или нага и одѣахомъ, когда ли Тя видѣхомъ болна или въ темници и пріидохомъ къ Тебѣ. И отвѣщавъ царь речеть имъ: понеже сотвористе единому отъ братій Моихъ меншихъ, Мнѣ сотвористе [13]. Оле гласа святаго! о чести неизреченнѣй и неизглаголаннѣй! благословенніи бо, рече, Отца Моего, иже есть похваленіи и избранніи и иже достойніи суще уготованному Царствію отъ составленія міру, еже преже даже ни человѣци быша, уготованна быша праведнымъ благаа. Къ христіяномъ же убо единѣмъ токмю бесѣду творитъ Господь, къ нимъ же и еѵангельскыа быша заповѣди, къ невѣрнымъ же ни едино слово тогда, понеже вкупѣ вси самоосуждени будуть. И сего ради бо рече [14]: не въскреснуть нечестивіи на судъ, рекше не воскреснуть судитися, но еже мучитися. Глаголеть бо: яко егда явится знаменіе Сына человѣчьскаго на небеси, тогда въсплачются вся племена земнаа, токмо совѣсть свою осуждати имуще. И се же любиміи, сего ради, нынѣ къ христіяномъ слово сіе есть и о единомъ человѣколюбіи глаголеть, явити хотящу, яко се токмо ищеть и се же преже истязаеть, яко нужнѣйшее христіяномъ суще. Поне бо всѣмъ христіяномъ природствена есть и прилична и прехвальна любовь. О семъ бо, рече Христосъ, познаютъ вси, яко Мои ученици есте, аще любовь имате межи собою [15]. Любви же убо крѣпость нищелюбіе и о ближнихъ милосердіе и милованіе. И сія убо о насъ Христосъ, яко и человѣколюбивѣмъ (намъ) быти, требующимъ бо намъ отъ самого того праведнаго Судіи человѣколюбія тогда: ибо немилостивымъ, рече, немилованіе, милостивымъ же милованіе. Явѣ убо есть, яко отъ могущихъ истязаеть Господь человѣколюбіе, отъ немогущихъ же токмо довольно есть хотѣніемъ сердца миловати; и различныа бо тако части [16] человѣколюбія заповѣдуеть Владыка, яко аще возможно есть всегда исправимъ, аще ли ни, поне возможнаа да исправити потщимся. Не преже убо почитаеть Господь милостивыа и праведныа, или мучить согрѣшившаа, но преже убо истязуя всѣхъ, вся дѣла и словеса и помышленіа, и избранныхъ же благословенныхъ нарицаетъ святыхъ, яко отцу пріатныхъ ему сущихъ, и наслѣдникы творить Царствію, и вмѣсто малого исправленіа веліа воздааніа воздасти. Не рече бо: пріимите Царство Небесное, но рече: наслѣдуйте угованное вамъ Царство, якоже отечье намъ и должное нѣкое наслѣдіе глаголеть наслѣдити; братію же меншую нарицаеть своихъ ученикъ и купно всѣхъ нищихъ; всякъ убо нищъ православенъ и благодарнивъ братъ есть Господень. Понеже Христосъ насъ ради себе смири и въ нищетѣ и въ убожествѣ бывъ, да насъ милосердіемъ обогатитъ, и убо братолюбіе и милованіе имѣющеи милостивому и человѣколюбивому Владыцѣ подобятся, немилостивіи же немилостивному, человѣчьскаго рода ненавидящему подобятся. И къ таковымъ речеть сущимъ ошую Господь: отыдѣте отъ Мене проклятіи въ огнь вѣчный, уготованный діяволу и аггеломъ его, алченъ бѣхъ когда, и не дасте Ми ясти, жаденъ и не напоисте Мя, страненъ бѣхъ и не въведосте Мя, нагъ и не одѣасте Мя, боленъ и въ темници и не посѣтисте Меня. И тогда отвѣщають ему и тіи, глаголюще: о Господи, когда Тя видѣхомъ алчюща или жаждуща или нага или немощна или въ темници, и не послужихомъ Тебѣ? Тогда отвѣщаеть имъ, глаголя: аминь, аминь глаголю вамъ: понеже не сътвористе единому отъ братій Моихъ меншихъ, ни Мнѣ створисте, и пойдуть сіи въ муку вѣчную, праведници же въ жизнь вѣчную [17]. И сего ради горе же всѣмъ грѣшнымъ и немилостивымъ! Праведный убо и милостивый наслѣдуеть Царство, яко любовь исправивъ, еже есть всѣмъ добродѣтелемъ главизну, любве же часть милостиня есть. Немилостивый же хищникъ и неправедникъ въ огнь отсылаемъ бываеть, понеже ненависть стяжа, всѣмъ злымъ главизну, и ненависти бо часть есть немилосердіе. Сего же ради сущихъ тѣхъ ошуюю въ огнь отсылаеть Господь, уготованный діяволу и аггеломъ его, понеже бо немилосердни суть бѣсове и жестоко и вражебно прилежатъ къ намъ, и сего ради уготовися имъ огнь вѣчный. О таковому разуму и произволенію! Не уготова бо Богъ человѣкомъ огнь, ниже муку сътвори насъ ради, но ради діявола; мы же сътворяемъ сами себе повинны, ради неисправленій нашихъ. И ужаснемся убо разумѣвше здѣ, любиміи, лукавьствіа вся діяволя, и колики суть сѣти его, еже на насъ пропинаеми [18], и молю же вы, возлюбленнаа, не прелщатися ими всѣми тогда злопрелестными коварьствы и злоухищреніи и запинаньми и нечистотами и лихоимьствы и иными таковыми, и ненавистьми и враждами, по Божественнаго Павла слову: вѣсте еже таковіи, рече, не имѣють части Божіа Царства, но отвѣтъ той грозный пріемлють къ осужденію мукъ вѣчныхъ, праведници же въ вѣчную жизнь. И молю вы и о сихъ всѣхъ, о еже бывшихъ належащихъ на ны Божіихъ прещеній и ярости, предваримъ нынѣ въ исповѣданіи страшнаго того Судіи покаяніемъ и всяческыми благыми дѣтельми; поне бо тое належащее на ны Божіе наказаніе бывшее не новоявленно бысть, по отъ древняго начальства [19] человѣчьскаго рода тако бывающе бысть. Земли убо которѣй согрѣшившей, и по гнѣву своему наводить Богъ таковыа казни, ли смертію, ли гладомъ, ли попущеніемъ нещаднымъ поганыхъ, ли вредомъ, ли гусеницею, или инѣми всяко казньми. Аще ли, покаавшеся, будемъ въ немъже ны Богъ велить быти, якоже глаголеть къ намъ пророкомъ: обратитеся къ Мнѣ всѣмъ сердцемъ вашимъ, постомъ и плачемъ [20], и аще сице таковаа сътворимъ, невозвратно пакы на лукаваа и всѣхъ грѣхъ прощени будемъ и милосердію всякому и милости отъ своего Владыкы будемъ довольни. Аще ли же кающеся и на злаа пакы възвращающеся будемъ, акы свиніа въ калѣ грѣховнѣ валяющеся, и тѣмъже о семъ сего ради пророкомъ пакы глаголеть: вразумѣхъ, рече, яко жестоки есте, и шіа и выа ваша яко желѣзныи. Того ради, удержахъ отъ васъ дождь, предѣлъ единъ одождихъ, а другаго не одождихъ, и поразихъ зноемъ и неплодіемъ нивы ваша, и самѣхъже поразихъ вы различными казньми, и то тако не обратитеся ко Мнѣ, и сего ради и виногради ваши и смоквіе и нивы и дубравы ваша истрохъ, глаголеть Господь, а злобъ вашихъ не могохъ стерти. И сего ради послахъ на вы различныа болѣзни и смерти тяжкы, и на скотѣхъ вашихъ казнь свою послахъ, и тако не обратистеся ко Мнѣ, но яко рѣсте: мужаемься, насыщающеся ласкосердствъ [21] нашихъ до сытости. И вы убо уклонистеся отъ путей Моихъ, глаголетъ Господь, и законы Моа сами не сохранисте, по и соблазнисте многы, и кленущеся именемъ Моимъ въ лжу, и лишающе мьзды наемника, и насилствуа сиру и вдовици, и уклоняюще истинныхъ путей Моихъ и судъ въ неправду възложисте, и усты же токмо есте чтуще, глаголеть Господь, а сердце ваше далече отстоитъ отъ Мене. И того бо ради, егда призовете Мя, и Азъ не послушаю васъ и егда взыщете Мене и не обрящете, не въсхотѣсте бо ходити въ путехъ Моихъ, глаголеть Господь, да того ради отъ злобъ вашихъ, живущихъ на земли и самая та земля вся Ми непотребна сущи бысть, и затворяется имъ небо, ово ли и небо отверзается, но злѣ на вашу пагубу. И сего же ради глаголеть Господь пророкомъ велегласнѣ: отъ всѣхъ злобъ вашихъ обратитеся къ Мнѣ, и Азъ обращуся къ вамъ, и возвращу [22] отъ васъ гнѣвъ Мой и отверзу вы хляби небесныа, и не имуть изнемощи отъ обиліа винограды и нивы ваша, и подамъ вся прошеніа ваша, и прославлю вы пакы и възвеличу вы, и одождю дождь рано и позднѣ, во время его, и наполнятся точиліа виннаа и масленаа, и воздамъ вамъ за лѣта оскудѣніа вся изобильная. Сила Моа великаа, юже послахъ на вы, глаголеть Господь Вседержитель. И сіа вся, любиміи, слышаще, молю вы, въстягнѣмъ себе на вся благыа дѣтели и спасительныа. Припадемъ же всяко на покоаніе, не въздающе никомуже зла за зло, но любовію прилѣпимся вси о Господѣ Бозѣ нашемъ, постомъ и рыданіемъ и слезами омывающе вся прегрѣшеніа наша, не словомъ нарицающеся христіяне, но дѣлы всяко, и яко да благоцвѣтнѣ и милостивнѣ Творець нашь и Владыка Христосъ и належащихъ на ны праведнаго своего гнѣва всякого и навѣта сопротивныхъ съкрушитъ и утолитъ, и не гнѣвомъ и яростію, но милостію и благодатію да накажеть насъ свое достоаніе. И къ сему же, молю вы, къ приходящему посту избранному Божія десятованіа [23], къ спасительному тому времени приходящему, стяжати вамъ покааніе о всемъ чистое съ слезами и съ стенаньми и щедротами, еже къ нищимъ, насыщающе жаждущаа, и яко да на водѣ покойнѣй водворимся, странныа и безпокровныа подъ кровъ въведемъ, и одѣвающе нагіа, и яко да во кровѣ Божіи на небеси водворимся, болныа посѣтити потщимся, и яко да иже болѣзни посѣщаяй Господь исцѣлитъ и наша болѣзни и къ иже въ темници сущехъ тецемъ и да яко избавишся будущіа оная темница и муки. И съ симъ всѣмъ всяческы будемъ, возлюбленніи, благоутробни сильніи и богатіи, иже телѣснымъ потребамъ просящимъ подаати, и да иже сами отъ Владычня трапезы благыхъ напитаемся и съ сущими одесную да счетаемся святымъ и избраннымъ и праведнымъ стоанія и божественнаго и сладкаго слышати да сподобимся гласа, съзывающа благословенныа Отца въ небесное и благасловенное Царство безконечное и присносущное, егоже, молюся, буди получити намъ благодатію и человѣколюбіемъ Господа нашего Ісусъ Христа, Ему же слава въ вѣкы вѣкомъ. Аминь.

Примѣчанiя:
[1] понеже.
[2] Неправильниое объясненіе слова γεεννα.
[3] Псал. 61, 13.
[4] Рим. 2, 6.
[5] составы — стихіи.
[6] Псал. 6, 6.
[7] представятъ ся, т. е. предстанутъ.
[8] У пророка читается: измѣны за ся. Псал. 48, 7.
[9] горе, страданіе.
[10] Псал. 49, 1-3.
[11] Матѳ. 25, 31-33.
[12] Дан. 7, 9-10.
[13] Матѳ. 25, 34-40.
[14] Псал. 1, 5.
[15] Іоан. 13, 35.
[16] виды, степени.
[17] Матѳ. 25, 41-46.
[18] устрояемы.
[19] начала.
[20] Іоан. 2, 12.
[21] лакомствъ плотоугодія.
[22] отвращу.
[23] десятины.

Печатается по изданію: Памятники Древле-Русской духовной письменности: Поученія Фотія, митрополита Кіевскаго: II. Поученіе души полезно, еже почитаемо есть въ недѣлю мясопустную, благороднымъ и благовѣрнымъ княземъ и всему христоименитому исполненію святаго людства, имѣюще сіе великое слово о второмъ и страшнѣмъ пришествіи Господа Бога и Спаса нашего Ісусъ Христа, и о еже, яко аще не съ потщаніемъ имѣемъ другъ къ другу нелицемѣрную любовь, еже есть союзъ всѣмъ добродѣтелемъ, и аще же не стяжимъ нищелюбіа къ единоестественымъ своимъ братіямъ, и ниже сынове и чада Божія наречемся, ниже Царства Небеснаго наслѣдовати можемъ. // Журналъ «Православный собесѣдникъ», Казань. – 1860 г. – Книга III. – с. 97-112.