По благоволенiю Господа Бога Вседръжителя, безначальнаго Отца, и поспѣшенiемъ Единороднаго Его и Събезначалнаго Сына, Господа нашего Iсуса Христа, и съдѣйствiемъ Всесвятаго и Животворящаго Духа — равнопоклоняемыя и славимыя Святые Единосущныа и Животворящiа и Нераздѣлимыя Троица, и моленiемъ Пречистые Преблагословенныя Владычици нашiа Богородици и Приснодѣвы Марiа, общiе всего христiянскаго рода Помощница и Заступница, и силою Честнаго и Животворящего Креста Господня укрѣпляеми и святыхъ непобѣдимыхъ воеводъ и архистратигъ невещественныхъ силъ, Михáила и Гаврiила, и прочихъ Небесныхъ Бесплотныхъ, и предстателствомъ честнаго и славнаго пророка и Предотечи Крестителя Господня Iоанна и великыхъ чюдотворцовъ и всѣхъ святыхъ молитвами, неизреченная [2] намъ своимъ дивнымъ промысломъ устрояющаго человѣчьскому роду полезная, паче же намъ христiяномъ Его Божественною благодатiю съблюдаемымъ и отъ тля на нетлѣнiе преставляемымъ [3], и отъ нижнихъ на вышнее восходящимъ, понеже не отъ земля въ землю плаваемъ, но отъ земля на небо. Благословенiе смиренаго Iева, Патрiарха царствующаго града Москвы и всея Руси, возлюбленному сыну и сослужбнику нашего смиренiа Преосвященному митрополиту Николѣ, Святые Соборные Апостольскiе Церкви всемiрнаго Воздвиженiа Честнаго и Животворящего Креста Господня и священноначалнику Божiего града Цхете, Iверскiе земли Грузинскаго царства, и священноначалникомъ: преосвященнымъ архiепископомъ и епископомъ, и честнѣйшимъ преподобнымъ архимандритомъ, и игуменомъ, и священноинокомъ, и инокомъ и презвитеромъ, и дiякономъ, и всему освященному собору части и жребiя Пречистые Владычици нашея Богородици [4].

Царь вашь Александръ присылалъ бити челомъ пословъ своихъ: князя Каплана, да старца Кирила, да Хуршита [5], для исправленiа вѣры христiянскiа о учителехъ, къ христолюбивому Государю, благочестивому царю и великому князю Феодору Ивановичю всеа Русiи. Благодатiю Христовою сынъ Святыа Съборныя великiя Апостольскiа Церкви и нашего смиренiя, благовѣрный Государь, царь и великiй князь Феодоръ Ивановичъ всея Русiи, богошественный святаго пути, богоуставному закону мудрый изыскатель, святыхъ правилъ богозрачнѣ цвѣтущи исходатай и споспѣшникъ благоразумный, истиннѣ дѣлатель, по добротѣ сердецъ вашихъ и по желанiю истинному царя вашего Александра, спасенiя ради вашего, чтобы вы сынове Божiи сподоблени были, послалъ къ вамъ посла своего, князя Семена Григорьевичя Звенигородскаго, да съ нимъ вмѣстѣ къ вамъ послалъ, по совѣту съ нами, учителныхъ превеликiя Лавры Пресвятыа Живоначалныя Троицы и преподобнаго Сергiа чюдотворца, соборново старца Закхея [6], благовѣрiа ради къ истинному извѣщенiю правыя вѣры, непоколебимо бы вамъ и непревратно соблюдати истинныхъ церковныхъ преданiй и просвѣтити(ся) благоразумiемъ, тернiе посѣчи и лозу благовѣрiя насадити, злорѣчiе посѣчи яко хврастiе, благочестiе исполнити. Яко убо и далече живущимъ вамъ любовными крылы достизаете до благочестиваго царя нашего и до насъ и молите духовнѣ вѣрою истинною Христовою просвѣтити васъ въ недоумѣнiи, чтобы вы съ нами были едина Церковь и едина вѣра, и едино крещенiе, и единство въ всякомъ исправленiи по благовѣстiю Христову и по апостольскому преданiю и по святыхъ отецъ ученiю. Пишетъ бо: волю боящихся его сотворитъ Богъ и молитву ихъ услышитъ и спасетъ я. И самъ рече Господь: просите и прiиме(те), ищете, и обрящете, толцыте и отвръзется вамъ, всякъ просяй прiиметъ и ища обрящетъ, тлъкущему отвръзется. И пакы рече: (иже) вѣру иметъ (и) креститься, спасенъ будетъ, а иже вѣры не иметъ, осуженъ будетъ. Страшно еже впасти въ руцѣ Бога Живаго. Христiяне убо васъ Божiею благодатiю изначала знаемъ, и не вѣмы, откуду возникоша соблазны и возбраниша Божественному пути, завистiю истиннѣ врага и благочестiю сопостата, непрестанно многыми злыми лукавствы прелестными отводя отъ благовѣрiя, нынѣ не во всемъ исполнено христiянскую вѣру вамъ держащимъ, не во мнозѣ съ нами раздѣляетеся. И внемлите же себѣ внятелно отъ святыхъ апостолъ и святыхъ седми Соборовъ Вселенскихъ и отъ всѣхъ святыхъ исповѣдуема истинная благочестивая православная христiянская вѣра. Блюдите убо себе и всего стада, въ немъже васъ постави Духъ Святый стража блюсти церкви Господа нашего Iсуса Христа и пасти стадо его словесныхъ овецъ.

Яко восходя Господь на небеса, вдаде апостоломъ два Завѣта: Ветхiй и Новый. Сiя же прiимше святiи апостоли, та же по нимъ церковные пастырiе и учители: иже вси духомъ божественнымъ наставляеми, ова убо отставиша, ова же узаконоположиша и предаша Святѣй Церкви. И сiя вся церковная преданiя, писаная и не писаная, узаконеная намъ отъ Бога и отъ святыхъ апостолъ и богоносныхъ отецъ нашихъ, непреложно подобаетъ соблюдати. Многа и различна устроенiа, чины же и уставы, правила и законы, отъ Божественныхъ апостолъ прiятъ Святая Церкви. Таже по апостолѣхъ богоноснiи отцы много предаша и навершиша Святѣй Съборнѣй и Апостольсгѣй Церкви. Подобнѣ чины, и устроенiа, и весь уставъ христiянскаго житiа: и на поставленiе Патрiархомъ молитвы, и уставы, и чины, и разчиненiа, и предѣлы когождо ихъ, и мѣста и сѣдалища митрополитомъ, и архiепископомъ, и епископомъ, архимандритомъ и игуменомъ, священникомъ и дiякономъ, иподiякономъ, чтецемъ, и пѣвцемъ и свѣщеносцемъ, молитвы на крещенiя еже отрицатися сатаны и всѣхъ дѣлъ его, и на обрученiе же, и на вѣнчанiя, и на покаянiа, и на причащенiе Животворящего Тѣла и Честныя Крови Господа нашего Iсуса Христа, отрицанiя жъ и обѣщанiа, молитвы на постриженiе иноческаго образа, малаго и великаго, яже глаголется второе крещенiе, и на погребенiе инокомъ и мiрскимъ, уставы и тропари и молитвы, и иже въ Литургiяхъ дивно освященно уставы счетаныя: первая Василiя Великаго, вторая Златоустаго, третiя папы Римскаго, яже въ великiй постъ поется. И молитва на Богоявленiе, на сшествiе Святаго Духа, и въ начало индикта, еже есть начало новаго лѣта, и на освященiе церквамъ, и на освященiа святаго масла, и на освященiе святаго мѵра, и на освященiе водѣ, и на поставленiе православныхъ царей. Пѣсни же, и пѣнiа, и сѣдадьны, тропари и кондакы, и степенны, и всенощныя уставы, и пѣнiа, Господскимъ праздникомъ и прочимъ, другимъ же аллилуiа и посты, иныя же евангельскiа праздники, иныя же славословныя нарекоша, и уставиша чтенiя жѣ тръжественна и обычна, и повѣсти, и словеса, и житiа святыхъ въ праздничныя дни и обычныя узаконоположиаша и предаша Святѣй Церкви посты же и моленiа и поклоненiа Животворящему Кресту, и честнымъ и святымъ иконамъ, начертанiя же письмены и иными вещми въ святыхъ церквахъ и на священныхъ сосудѣхъ и ризахъ, и на стѣнахъ, и на дскахъ, и въ домѣхъ и на путехъ въображенiа Господа нашего Iсуса Христа и Пречистыя Его Матере, и великаго пророка и Предотечи Крестителя Господня Iоанна, и божественныхъ апостолъ, и богоглаголивыхъ пророкъ и всѣхъ святыхъ. Сихъ завѣщаша писати и поклонятися имъ и Божественному Евангелiю, и священнымъ сосудомъ, и священнымъ Божественнымъ храмомъ, за еже въ рукотворенныхъ насъ ради пожити Изволившаго и Того Божественная словеса вещными написатися человѣколюбнѣ даровавшаго. Почитати же и поклонятися мощемъ святыхъ истинныхъ угодниковъ Христовыхъ и яко по истинѣ отъ Бога освятителну и цѣлебную прiимше благодать недуги отгоняти и болѣзни исцѣляти. Въ истинну чюдо преславно, яко кости наги источаютъ исцѣленiа! Слава Единому Премудрому Зижителю Богу, яко же писано есть. И прочiя законы и уставы, яже святая церкви прiятъ и прiемше намъ предаде, непреложно соблюдати подобаетъ. Сiя есть вѣра святыхъ апостолъ, яже научени быша отъ Бога. По святыхъ же апостолѣхъ богоноснiи отцы, яко же и предречеся, многа управленiа и законы предаша Святѣй Церкви вдохновенiемъ Святаго Духа. И убо святiи апостоли о имени Iсусъ Христовѣ, и вѣры, яже въ Онь, и о законѣ благодати многы труды и болѣзни показаша и кровiю скончашася и вседушьно сташа противъ нечестивыхъ царей и мучителей, благочестiе собдюдоша, вѣнцы побѣдными отъ Христа Бога увязъшася, и убо своими о Христѣ болѣзньми и подвигы вселенную укрѣпиша, и бѣсы прогнаша, и нечестивыхъ посрамиша. Презрѣша бо мiръ и яже суть въ мiрѣ, и всяку сладость, и славу, и честь, и высоту, и гордость, и болярство, и возвышенiа престолы, и благородiе преизящное, и гордѣнiе всякое, и царства и княженiа, и предстоящая отроки, и предрыщущая слугы, и безчисленное богатство, грады же и села, кони же и златыя утвари, и сладость ястiя и питiя, и златопрядныя постеля, и прочее плотское услаженiе ни во чтоже вмѣниша, но все свое желанiе и мудрость и разумъ показаша о вѣрѣ въ Господа нашего Iсуса Христа. Яже прiяша мы христiяне отъ священныхъ апостолъ и богоносныхъ отецъ и потомъ не преложно подобаетъ намъ съблюдати.

Вся убо заповѣди Господа нашего Iсуса Христа спасенiа ради бесѣдованы суть [7]. Аще бо удаляемся отъ заповѣдей Его, но Онъ, яко человѣколюбивый Отецъ, терпитъ злобы наша, не хощетъ никого погубити, но желая всѣхъ насъ спасти, ово святымъ Евангелiемъ, ово апостолы, ово святыми отцы, да не впадемся въ ровъ еретичьскiй. Се вѣдый искони врагъ нашъ дiяволъ не престаетъ блазня человѣческый родъ, начатъ отъ Адама даже доселѣ не отстанетъ ища кого бы прелстити отъ вѣры истинныа, да быша были съ ними въ мукѣ, и овы прелсти поклонитися кумиромъ и на прочая грѣхи. Но видѣвъ ихъ дiяволъ, яко въ сѣти грѣшнiи а не суть точни ереси [8], влѣзе прьвiе во Арiа, иже нача хулити Сына Божiя, не творя Его равна Отцю, забывъ Христа глаголюща: Азъ и Отецъ едино есвѣ. Такоже и въ Савелiа, иже нача сливати, глаголя: Божествомъ и плотiю Христосъ пострадалъ есть на крестѣ. Македонiе жъ Святаго Духа хуляше, хужьдша творя Отца и Сына. И прочая единомысленики ихъ наполнишася различныхъ ересей, ихъ же ученiа прокляша святiи отцы и истребиша отъ христiянъ. Пишу жъ богатствомъ Господа нашего Iсуса Христа, яко можетъ и нашь уставити языкъ на обличенiе врагъ Креста Христова о нихъ же Павелъ къ Ѳилиписiомъ пишетъ: блюдитеся песъ, блюдитеся раскола, обличайте жъ словеса ихъ злодѣйствiа. Мню, яко и воздухъ сквернится дѣлы ихъ. Насъ бо ради сниде Господь съ небеси. Заповѣди его соблюдемъ и избавимся лютыхъ мукъ, да не на насъ збудется реченное Господемъ: аще не быхъ пришелъ и глаголахъ, грѣха не быша имѣли. Свинiя бисера обинуется [9] а мотылы [10] беретъ, тако же еретицы свой смрадъ жируютъ, а Божественныхъ ученiй удаляющеся, и къ бѣсомъ приложишася. Но злѣйши суть бѣсовъ: бѣси бо Креста Христова боятся, еретицы жъ посѣкаютъ кресты. Бѣси боятся праведникъ Божiихъ, не смѣяху прикоснутися ковчегомъ ихъ, въ нихже лежитъ безцѣнное сокровище. Еретицы же ругаются и насмѣхаются, видящи насъ кланяющихся имъ, забывше Господа рекша: вѣрующiй въ Мя, дѣла, яже Азъ творю, и тiи сотворятъ. И болши тѣхъ еретицы глаголютъ: не суть апостоли Литургiи и комканiа [11] предали, но Iоанъ Златоустъ. Видите по вочеловѣченiи Христовѣ до Iоана лѣтъ болѣе трехъ сотъ, да толико лѣтъ Церкви Божiя безъ Литургiа ли суть были и безъ комканiа? Петръ апостолъ нѣсть ли Литургiа сотворилъ? Iяковъ братъ Господень по плоти первый епископъ Христомъ самѣмъ поставленъ въ Iеросалимѣ, и Литургiю сотворилъ. Потомъ Великiй Василей, отъ Бога извѣщенiа прiимъ, предавъ намъ Литургiю и о комканiи устроивъ, и научи, якоже повелѣ ему Духъ Святый. И послушаимъ апостола Павла глаголюща: чадо Тите, сего ради тя оставихъ въ Критѣ, да недокончанная наполниши, во всѣхъ градѣхъ попы, яко же ти азъ повелѣхъ. Тимофѳя Павелъ поставилъ въ попы, таже и писаше къ нему: не лѣнись о своемъ дару, иже въ тебѣ возложенiемъ руку на поповство. Прилежащiи добрѣ попове сугубей чести да сподобляются, тружающеся словомъ и ученiемъ. Аще попове упиваются, и сварливiи, злато и сребро — любиви, и такихъ ради дѣлъ апостолу Павлу глаголющю: согрѣшающая предъ всѣми обличай, да прочiи страхъ имѣютъ. Плотская дѣлеса, рече Павелъ, блудъ, прелюбодѣянiе, служба кумиромъ, волшба, вражда, зависть, ревность, ярость, убiйство, пiянство и прочая: таковая Царства Божiа не наслѣдятъ. Гласъ великiй верховный Петръ: глагола Богъ усты святыхъ пророкъ отъ вѣка. Слыши же и Павла повѣдающа: первiе постави апостолы, второе пророки, третiе учители, потомъ же силы, таже дарованiе. И тѣхъ усты Святый Духъ возвѣстилъ есть вся: проклятъ бо, рече, всякъ иже не пребудетъ во всѣхъ книгахъ законныхъ. Еретицы же ни во что же имуть словеса, яже усты святыхъ възвѣща, и всѣхъ отмещутся, и не почитаютъ, ихже звѣри сверѣпiи убояшася и огнь угасе. И еще надъ сѣми окаяннiи творятъ: Преславныя и Преблагословеныа Пречистые Его Богоматери Господа нашего Iсуса Христа не чтятъ, ихъ же рѣчи и мерзскiя гордости неудобно писати, о Ней же пророцы провозвѣстиша: овъ Дверь заключену нарече и никому же проходиму, развѣ единаго Бога, овъ же Лѣствицу разумну, по Ней же вѣрнiи восходятъ на небеса, овъ Гору святую, въ Нюже Богъ вселися, овъ Ручку прозва Ю, манну небесную имущи. Давыдъ же Царицю и Дщерь нарицаетъ Ю, понеже небеснаго Царя Мати бысть, Дщерь же понеже отъ сѣмени его родися. Премудрый и великiй во царѣхъ Соломонъ вопiетъ о Ней глаголя: многи дщери сотвориша силу, мнози стяжаша богатества, Ты же превознесеся и превзыде выше всѣхъ. Иннiи же инакими имены прозваша ю, якоже имъ даяше Духъ Святый и разумъ. Боговидецъ Исаiа велегласно вопiетъ о Ней глаголя: се Дѣвая во чревѣ прiиметъ и родитъ Сына и наречетъ имя Ему Еммануилъ, еже есть сказаемо съ нами Богъ. Къ ней же архистратигъ Гаврилъ глаголетъ: радуйся Обрадованная, Господь съ Тобою. Мы же велегласно вопiемъ: благословенъ Плодъ чрева Твоего, яко родила еси намъ Христа Спаса, Избавителя душамъ нашимъ и всѣхъ видимыхъ и невидимыхъ честнѣйши явися намъ. Мы же правовѣрнiи людiе, видяще образъ Господень на иконѣ написанъ, кланяемся и руцѣ къ нему воздѣвше, изъ глубины сердца воздохнувше, вопiемъ глаголюще: Господи Iсусе Христе, Сыне Божiй, Иже симъ образомъ явися на земли спасенiя ради нашего, изволивый Своею волею пригвоздитися на Крестѣ, давый намь Крестъ Свой на прогнанiе всякого супостата видимыхъ и невидимыхъ. Егда ли паки видимъ святыя Богородицы Марiа икону, такожъ къ ней изъ глубины сердца вопiемъ глагодющи: Пречистая Богородица, не забуди насъ, людiй своихъ, тебе бо имамы Заступницю и Помощницу и Ходатаицу къ Сыну Твоему и Богу нашему, и тобою мы грѣшнiи надѣемся прiяти грѣхомъ прощенiе. Егда ли котораго видимъ святаго образъ, такожъ речемъ: угодниче Христовъ (iмярекъ), имаши дръзновенiе къ Владыцѣ Христу Богу нашему, помолися о мнѣ, да спасуся твоими молитвами. И молящися [12] креститися подобаетъ двѣма прьсты: прежъ положити на чело главы своея, таже на перси, потомъ же на плече правое, таже и на лѣвое. Съгбенiе прьсту именуетъ сшествiе съ небесъ, а стоящiи перстъ указуетъ възнесенiе Господне, а три персты равны держати — исповѣдуемъ Троицу Нераздѣльну, то есть истинное крестное знаменiе. Иже не любитъ Господа нашего Iсуса Христа, да будетъ проклятъ. Иже святаго комканiа Честнаго Тѣла и Крови Христовы не прiимаета, да будетъ проклятъ. Иже не кланяется съ усердiемъ Кресту Господню, да будетъ проклятъ. Иже не молится съ упованiемъ Святѣй Богородици Марiи, да будетъ проклятъ. Иже иконы Господня и Богородицыны и всѣхъ святыхъ со страхомъ и любовiю не цѣлуютъ, да будутъ прокляти. Иже иконамъ Господнимъ и Богородицынымъ усердно съ желанiемъ не покланяются, да будутъ прокляти. Иже словесъ Евангельскихъ и апостольскыхъ не имать въ честь, да будутъ прокляти. Иже святыхъ пророкъ не творятъ Святымъ Духомъ пророчествовавшихъ, да будутъ прокляти. Иже святыхъ всѣхъ не чтутъ и не кланяются съ любовiю и трепетомъ мощемъ ихъ и иконамъ ихъ, да будутъ прокляти. Иже хулятъ святую Литургiю и вся молитвы, преданныя христiяномъ отъ апостолъ и святыхъ отець, да будутъ прокляти. Иже всея твари видимыя и невидимыа не истинствуютъ Богомъ сътворенная, да будутъ прокляти. Иже не творятъ Богомъ даннаго Моисеемъ закона, да будутъ прокляти. Иже не мнятъ церковныхъ сановъ Господемъ и апостолы строено, да будутъ прокляти. Иже женитву чистую хулять и богатыя носящихъ брачныя ризы съ говѣнiемъ и цѣломудрiемъ, да будутъ прокляти [13]. Прежъ распятiа Господня кумиромъ умножившимся на земли и требамъ сквернымъ, и величашеся дiяволъ: еретицы жъ нарицаху властелина князя мiра сего. Егда же изволи Единородный Сынъ, Слово Божiе, и Крестомъ Своимъ разруши силу его, тогда жъ князь и властелинъ не зовется, но врагъ и супостатъ. Глаголетъ же златорѣчивый Iоаннъ: дiяволъ бо аки песъ нападаетъ на человѣки, уясти хотя, но иже узритъ въ руку нашею жезлъ и палицу Божiю, иже есть Честный Крестъ, отбѣгаетъ со страхомъ. Мы же утѣшаемся по пророческому словеси: жезлъ твой и палица твоя та мя утѣшиста [14].

И отвръгшимся мiра и яже въ мiрѣ, сущимъ инокомъ, вземшимъ крестъ Христовъ, и приходящая напасти крѣпце терпѣти, и хранити отъ всякага зла и все хотѣнiе свое отвръгнути и въ повиновенiи быти до смерти по общенiю [15], и чтити игумена, аки Бога, братiю, аки апостолы. Тó есть взятiе креста Господня, тó есть отверженiе себе, тó есть шествiе въ слѣдъ Господа. Красно есть во истину и мнозей хвалѣ достойно, иже видѣти мужа въ мiру отрицагощася мiра и иже въ немъ красныхъ, и бывающа инока, хулно же и проклято, еже видѣти мниха санъ въ мiрѣ прiемлюща и мiрская творяща, и богатство берущи. Отмещетъ обнищанiе, иже Христа ради обѣщася, и бываетъ другъ свѣту сему и врагъ Божiй. Отъ царя и отъ вельможъ власти ищутъ, а отъ бояръ и отъ гостей имѣнiа, а отъ меньшихъ чести и поклоненiя. И таковое видя поганiи поношаютъ и укоряютъ. Блюдитеся лукаваго и высокоумнаго бѣса, да не всѣетъ въ сердце пагубы, еже мнѣтися велику сущу. И угодивъ Богу то помыслилъ бы грѣхы своа прьвыя. Аще и грѣхы простилъ есть милосердъ, но безконечнаго ради Царства Божiа сугубы страсти лѣпо есть прiяти. И аще кто кому воспоменетъ: много еси согрѣшилъ, не можеши прощенъ быти, и вы наставницы поучайте, яко Господь Iсусъ Христосъ прiиде грѣшныхъ помиловати. Инiи же иноцы въ затворь влазятъ, свои воли творятъ, и ту кормящеся, аки свинiя въ хлѣвинѣ, приносимымъ радующеся, монастырскаго же ради законнаго подвига убѣжавше не хотяще потрудитися, ни покарятися игумену и съ братiею миромъ не могуще пребывати, хотяще же на земли честни быти явленiемъ: тацѣхъ возбраняйте. Се же мрьзкое высокоумiе пребываетъ въ нихъ: мнятся велицы суще и святи, и ту сѣдяще, чюжiя домы строяще, своимъ безумiемъ отбѣгше. Таковымъ запрещайте и молите. Мнози уклонившеся непотребни быша, забывше ученiе Павла апостола: еже въ лѣностн живуще чюжый хлѣбъ ядятъ, таковымъ бо Павелъ въ селунстей епистолiи пишетъ: сами бо вѣсте, како подражати насъ: яко не безсчинно ходихомъ въ васъ, ни туне хдѣба ядохомъ у кого, но въ трудѣхъ день и нощь дѣлающе. Егда бо бѣхомъ въ васъ, сiе запрещахъ вамъ: яко аще кто не хощетъ дѣлати да не ястъ.

Видите епископи преданная намъ отъ Бога власти и величества, и его ученики и апостолы. Ничто же бо тако угодно и любезно Богу, якоже священство и царство. Два убо великая начала сiя отъ Бога уставлена суть въ мiрѣ: священство и царство, и подъ тѣми суть князи мiрстiи и прочая власти. Архiерею убо вся церкви и церковная и освященная возложена, и духовная. Царю повиновенiе тѣлесно токмо и урокомъ дани, и человѣческихъ вещей промышленiе мiру возложенныхъ и прочая подобящая. Оба сiа велика начала отъ Бога, отъ Божественныя Его благодати сходяще, устрояютъ и украшаютъ человѣческую жизнь. И подобаетъ со страхомъ слушати ихъ и повиноватися, яже Божественныя Писанiя и священная правила повелѣваютъ. Архiереемъ же душевное купно и тѣлесное, яко прiимникомъ ангельскимъ [16] бывшимъ, и образъ Христовъ имущемъ, и сѣдящимъ не на Моисѵовѣ сѣдалищѣ, но на Христовѣ, и Его заповѣди и ученiа возглашающе людемъ. Сего ради и имя архiереово на Литургiахъ Божественныхъ возглашати повелѣно есть. Преступающихъ же таковая преданiа, священныхъ изверженiю предати, иноковъ же и мiрскихъ отлучати всячески отъ Церкви. Понеже епископи убо прiимницы суть апостольскiи и наслѣдницы, яко образъ Христовъ суще и Христово прiяша ученiе и святыхъ Его ученикъ и апостолъ, и честь имъ даде велiю Богъ, якоже писано есть: уставиша ихъ князей по всей земли: не ангеломъ [17] убо даде власть вязати и рѣшити, но апостоломъ и иже по нихъ прiимникомъ и ихъ наслѣдникомъ и архiереомъ отъ Бога убо установлено есть и утвержено. Богъ бо есть утвержая и связуя и разрѣшая ими вся. Церкви же и пресвитеры и прочая причетники и люди, за ними живущiи, и вся освященная и вся возложенная Богови, подъ епископы мѣстными да суть. Такоже и монастыри и молитвенныя храмы и нищепитательницы подъ епископы мѣстными да суть. И того есть всяческое попеченiе о нихъ и судъ и разсуженiе и устроенiе и уничиженiе и наказанiе. Всею силою и всею крѣпостiю д'лъжни суть епископи имѣти стражбу о священныхъ и божественныхъ канонѣхъ, сирѣчь правилѣхъ. Поручено бысть намъ съблюдати, да не что преступаемо будетъ забытiемъ, или нерадѣнiемъ преминуемо, или неизысканiемъ оставляемо. Въ день онъ въ мукахъ оныхъ изыскано будетъ. Хранящiи бо священныя каноны, отъ Бога помощи сподобляются, преступающiи же въ конечное осуженiе себе влагаютъ Божественнымъ бо канономъ не сохраняемымъ и не исправляемымъ, и того ради Божiй гнѣвъ приходитъ на насъ и многiа казни и послѣднiй судъ. Или преступающе по нѣкоей страсти, или по неразумiю, а не трепещуще вышняго страха, иже суть клялися сохранити судбы и законы правды Божiа и предъ цари не стыдитися. О горе и лютѣ! каковъ судъ тѣмъ и по дѣломъ воздаянiе будетъ, иже умолчатъ обидящимъ святыя церкви и восхищающимъ отъ нихъ неподвижимыя вещи, вданыхъ Богови въ наслѣдiе благъ вѣчныхъ: земли и села, и винограды и езера, и прочая церковная устроенiа. Не малъ бо есть гнѣвъ Божiй на таковыхъ, еже восхищати отъ церкве возложенная Богови: или сосуды, или книги, или ризы, или земли, или села, или винограды, или люди, или суды, или пошлины, или уставы и чины, преданыя отъ Бога и отъ апостолъ и отъ святыхъ отецъ архiереомъ. Възложи нѣкогда Iсусъ Наввинъ возложенiе Господу Богу, и отъ таковаго возложенiа восхити нѣчто Ахаръ, и бысть гнѣвъ Божiй на вся люди, и побѣжени бываху отъ враговъ. И растерза Iсусъ Наввинъ ризы своа и паде на землю съ рыданiемъ и плачемъ и со слезами възопи къ Господу Богу. И рече Господь къ нему: согрѣшиша людiе твои, восхитиша отъ возложенныхъ, и не возмогутъ стати предъ лицемъ врагъ твоихъ, дондеже измете отъ васъ самѣхъ восхитившаго возложенiе. И извѣщено бысть, и обрѣтеся. Ахаръ взя отъ возложенныхъ Богови ризу пестру и обручъ златъ и двѣсти дидрахмъ и языкъ златъ. И побиша его каменiемъ со всѣмъ родомъ его. И тако преста гнѣвъ Божiй на всѣхъ сынѣхъ Израилевыхъ. Аще быша таковая отмещенiа тогда, множае паче нынѣ подобаетъ боятися. Егда убо святые и божественные безъ пакости немятежно въ мирѣ пребываютъ, тогда намъ вся благая устроенiа отъ Бога бываютъ подаема, миръ и умноженiе плодомъ и врагомъ одолѣнiе. Егда же будутъ церкви обидимы и церковныя уставы и законы разоряеми и презираеми: и тогда да слышатъ Исайю велегласно глаголющи къ нимъ: Азъ, рече, предамъ вы въ оружiе и вси заколенiемъ падете, и чада ваша въ гладъ и въ плѣнъ предамъ: яко звахъ васъ и не отзвастеся, и глаголахъ и ослушастеся, повелѣнiе Мое отринусте и сътвористе злое предо Мною: ихъ же не хотѣхъ Азъ, вы возлюбисте. Сего ради тако глаголетъ Господь: се работающiи Ми ясти имутъ, вы же вжаждете и взалчете. Се творящiи волю Мою возрадуются зѣло въ веселiи сердца, вы же восплачете и возрыдаете съ болѣзнiю сердца, яко остависте законъ Мой, исполнисте волю свою. Тако убо подобаетъ православнымъ царемъ и священнымъ архiереомъ исполняти Божественное повелѣнiе и святыхъ апостолъ преданiе и богоносныхъ отець безсоблазненно. Нѣсть бо ино ничтоже, яко же правило церковное крѣпко держати и не преходити предѣлъ святыхъ отецъ своихъ. Сего бо ради мiрстiи князи же и люди приразящися ко священнымъ и вземлюще на себе таковая возложенiа Богови или восхищающи таковая священная владѣнiа ради славы прелестныя и прибытковъ ради суетныхъ, осужаются Божественными Писанiи и священными правилы въ нынѣшнемъ вѣцѣ и въ будущемъ, яко же глаголетъ Великiй Афонасiе и Великiй Василiе и божественный Iоаннъ Златоустый, и инiи мнози. Подобаетъ же къ сему благочестнѣ живущимъ и православнѣ вѣрующимъ повѣсти нѣкiа послѣдству на ползу приносити: якоже первозданный [18], не сохранивъ, заповѣди, пострадавъ. Якоже при Аронѣ приразившiися священничеству возложеннымъ Господу Богу освященнымъ вещемъ страшно Божiимъ судомъ мучими быша. Даѳана убо и Авирона и Корреа и иныхъ многыхъ совѣтниковъ ихъ, приразившихся священничеству, овыхъ убо разсѣдшися земля поглоти, овѣхъ же огнь, съ небесе пришедъ, пожже, память тверду будущимъ родомъ устрои. Ахаръ же онъ не явѣ приразися возложеннымъ Богови, и того ради Божiимъ судомъ мученiе страшно прiятъ и со всѣми его сущими. Озiя же царь колико многодобродѣтеленъ бѣ, и потомъ разгордѣся и восхотѣ не данная ему взяти, восхотѣ власти священическiа, восхотѣ честѣйши быти, и бысть безчестнѣйшiй, восхотѣ богатство священическое, и погуби царство, и страшно Божiимъ судомъ мученiе прiятъ. Озанъ же онъ многодобродѣтельный, единъ отъ преимущихъ и славныхъ и отъ почитаемыхъ первый, видѣвъ кивотъ завѣта Господня, хотящь пàстися, простеръ руку свою, хотя удръжати кiотъ, да не падетъ, и въ той часъ Божiимъ судомъ страшну смерть прiятъ. И аще сей, не корысти ради, но хотя бреженiе сотворити, прикоснуся къ неповелѣннымъ ему, страшно пострада: много наипаче осуженiе прiемлютъ страшно, иже корысти ради и властованiа прикасающеся священнымъ и вземлюще возложенная Богови. Августъ и Тивирiй, Гайе, и Клавдiе, и Неронъ, и друзiи мучителiе и царiе, ратовавшiи Святую Церковь и святыя апостолы и святыхъ апостолъ прiемниковъ и наслѣдниковъ не страшно ли осуждены быша и погибоша! И по сихъ Константiе и Галла такожъ возмездiе прiяша злыхъ своихъ. Iюлiанъ же царь корысти ради и суетныхъ прибытковъ для приразися священнымъ, страшно отъ Бога осуженъ бысть и злѣй смерти преданъ. Евдоксiа же царица любовластнымъ и корыстнымъ нравомъ приражатеся священнымъ Божiимъ вещемъ и епископы во свою волю нуждаше и устрояюще, такожъ и монастыри и игумены и инокы, таже и къ блаженному Iоанну Златоустому приразися во многихъ священныхъ вещехъ и съвратися въ конечное зло и судъ гнѣва Божiа прiа. Левъ же царь, иже отъ Саврiа, и сынъ его, царь Копронимъ, вся епископiа и монастыри во свою власть восхитиста, такожъ и игумени и прочая клирики, сирѣчь причетники и ереси умножидши, погибоша. И по сихъ прочiя цари и князи и мучители такожъ сотвориша и погибоша.

Понеже убо святiи апостоли, яко отъ Бога научени суще, не царемъ и княземъ Святыа Церкви и вся правленiа ихъ и вся власти ихъ и съдержанiа предаша. И заповѣдаша имъ твердо съблюдати ихъ, а еже отъ поспѣшества мiрскихъ князей и людей прiяти кому священничество и держати церкви, възбраниша и запретиша, якоже писано есть въ завѣщанiи святыхъ апостолъ. Такожъ и въ тридесятомъ правилѣ глаголетъ: аще который епископъ мiрскихъ князей помощiю прiиметъ церковь, да извержется и отлучится, и вси прiобщающiися ему. Такожъ и Седмаго Собора, иже въ Никѣи второе събравшагося, правило третiе глаголетъ, яко всякому избранiю, бываему отъ князей, епископа или прозвитера или дiякона, не тверду быти, по канону глаголющему святыхъ апостолъ: аще кто епископъ мiрскихъ князей помощiю церковную власть получитъ, отъ Церкви отверженъ будетъ и отлученъ и вси прiобщающеися ему. Подобаетъ бо хотящему взыти на епископство, отъ епископьи избрану бывати и поставлятися, якоже отъ святыхъ отець нашихъ, иже въ Никѣи уставлено есть въ каконѣ глаголющемъ: епископу подобаетъ наипаче отъ всѣхъ областныхъ епископовъ поставлятися: аще ли же не возможно будетъ таковое, или находящiа ради нужди, или долготы ради пути, да всяко отнудь тремъ собравшамся вкупѣ и совѣтомъ всѣхъ прочихъ и съ согласными грамотами тогда поставленiе творити. Власть же бываемыхъ дастся въ коейждо области митрополиту, понеже той глава есть и отець и мати всѣмъ иже въ области его сущимъ. Отъ Собора, иже въ Лаодикiи: яко не подобаетъ попущати мiрскимъ властемъ и народомъ избранiе творити хотящимъ поставленнымъ быти въ священничество. Вѣсте явѣ, яко Божественными Писанiи и священными правилы воспитани суще, какову подобаетъ быти сподобляемому святительства. Яко не словомъ токмо но и житiемъ подобаетъ устрояти начальствуемыхъ, и всякiа добродѣтели образъ себе предлагати и свидѣтедьство добро имѣти учительству, житiе благо и незазорно. Таковаго убо и нынѣ на архiерейскихъ престолѣхъ посажайте да яко имъ царство управляюще честнѣ ему главы подклоняйте, и радостнѣ ему повиновенiе и послушанiе творите и бываемая отъ него обличенiа, яко врачевное прiимати исцѣленiе. Человѣци бо есмы и страстьми всюду связани бываемъ, и къ грѣху скоро уклонителни. Сего ради отъ священныхъ пастырей должны суть наказанiе и обличенiе прiимати съ радостiю и съ многимъ смиренiемъ и благодаренiемъ, безо всякаго гнѣва и злопамстства, явѣ вѣдяще, яко по истинѣ сiе есть духовное врачеванiе и исцѣленiе душамъ и тѣлесемъ. Сiа къ священному собору самому царю явѣ изгласивщу, соборъ же моляше его, яко да общекупно со всѣми съ ними совѣтовавъше, избирати достойнаго. Яко многоразумну и премудру сущу царю и добрыхъ дѣлъ исподнену и благовѣрiемъ украшену. Царь же рече: больши насъ начинанiе есть: вы убо, о священнiи отцы, божественныя благодати сподоблени, и сiанiе оно въ себѣ прiимше, апостольстiи намѣстницы суще: вамъ бо сiе повелѣно есть, яко Богу возложенымъ и Божiа возложенiа устрояющимъ и поставляющимъ, а не намъ мiру возложенымъ и мiрская устрояющимъ, и благословенiе же и связанiе и разрѣшенiе и прощенiе отъ васъ прiемлющимъ намъ. Сице отъ Бога уставлено есть и утвержено. И кто сице безуменъ, таковая можетъ поколебати и подвигнути, великiа паче инѣхъ, иже въ человѣцѣхъ еста два раба Божiа отъ вышняго дарована человѣколюбiа: священничество и царство. Священничество убо божественнымъ служа и промышляя и пекiйся, отъ единого того же начала обоя происходяща, человѣчьское украшаютъ житiе. Яко ничтоже тако поспешенiе бываетъ царству, якоже святительское величество и честь. Сего ради о обоихъ самѣхъ тѣхъ дву началѣхъ Богови молятся. Аще убо они непорочни будутъ во всемъ, и къ Богу имутъ дерзновенiе, и праведно и благоподобно украшати грады начнутъ, и сущая подъ ними будетъ съгласiе, нѣкое благо все иже многая благая человѣчестей даруя жизни [19]. Сему же быти вѣруемъ, аще священныхъ правилъ блюденiе сохранится, ихъ же праведно похваляемiи и покланяемiи самовидцы Божiю Слову предаша апостоли, и святiи отцы сохраниша и заповѣдаша.

Златорѣчивый же Иванъ, глаголеть, яко церковь небеси честнѣйши есть. Но хотя показати яко аще и церкви съжижемъ [20] и всяческы украсимъ, грѣхы жъ и страстьми и скверными дѣлы себе оскверняемъ: тогда ни святыхъ церкви, ни своего воображенiя, ни Пречистыхъ Таинъ щадитъ Богъ, въ страхъ и цѣломудрiе хотя обратити съгрѣшающая. Аще бо святаго ковчега не пощадѣ, но предасть его иноплеменникомъ съ священникы беззаконными. И Соломону глаголеть: аще съхраниши заповѣди Моя, вознесу престолъ твой во Израили во вѣки, аще отвержеши повелѣнiа Моя, потреблю Израиля отъ земли, и церковь, юже освятихъ имени Моему, отрину отъ лица Моего. И будетъ на погубленiе и смѣхъ во вся языки, еже и бысть. При Ехонiи и при Седекiи предаде градъ и церковь, и домъ царевъ пожже. Прочая же вся, священiа херувимъ, славы, одежды и пророчествiа, и явленiе и священные сосуды съ людьми возбѣсившимися въ попранiе и оскверненiе отдаде. При Зоровавелѣ жъ и Iсусѣ Оседековѣ и Ездрѣ пакы церковь и градъ создашася. Яко егда людiе съ царемъ развратишася, тогда людiе и церковь въ попранiе и оскверненiе предашася, егда же Зоровавель и иже съ нимъ умилосердиша Божественное, тогда церковь и люди Богомъ наздани бывша. Егда же пакы возвратишася въ скверная дѣла, и паки при Антiосѣ церковь и люди въ попранiе и оскверненiе предашася. И не токмо тогда бысть сiе, но и до конечнаго дни тако творится, якоже въ Старчествѣ писано есть: яко старецъ святъ бѣ въ Iеросалимѣ, видѣ себе въ церкви святаго Христова Въскресенiа. И смраду велику бывшу во церкви, глагола ангелу: откуду исходатъ смрадъ сей, и что не очистиши его? Онъ же глагола: смрадъ сей исходитъ отъ беззаконiй церковникъ, живущихъ здѣ, очистити же не мощно сего, но точiю огнемъ. И по малѣ прiидоша Перси, церковь и иже въ ней недостойнѣ живущихъ огнемъ пожгоша. Егда же паки отвратишася злобы своея, и умилосердися Господь Богъ и поможе благочестивому царю Ираклiю, иже Перси побѣди и церкви раскопанныя пакы созда, яко добрѣ глаголетъ Златоустъ: церкви не стѣны, но народъ благочестивыхъ людей. Подобаетъ убо дѣлы благими Богу угождати и церкви Божественныя созидати, страхомъ же и трепетомъ стояти въ нихъ и почитати Божественная вѣрою и любовiю. Аще бо кто обезчеститъ образъ царевъ, главною казнiю мучится: кольми паче Небеснаго Царя или святыхъ Его подобнѣ, или церковь кто обезчеститъ, которые муки достоинъ есть. Но по Божественныхъ правилѣхъ и здѣ главною казнью да казнится и проклятiю вѣчному предастся; по смерти же съ дiяволомъ и съ распеншими Христа Iюдеи, рекшими: кровь Его на насъ и на чадѣхъ нашихъ, во огнь вѣчный осудятся. А иже вѣрою и любовiю, страхомъ и трепетомъ, покланяется и почитаетъ всечестныя иконы и Честный и Животворящiй Крестъ и Святое Евангелiе и Пречистыя Божiя Тайны, и освященныя съсуды, въ нихъ же Божественная Таинства совершаются, и всечестныя святыхъ мощи и Божественныя церкви, въ нынѣшнемъ вѣцѣ, яко добронравiи и блазiи раби добрѣ и благочестнѣ живутъ, въ будущемъ же вѣцѣ блаженный и славный гласъ услышатъ, еже благый рабе и вѣрный, вниди въ радость Господа своего. Подобаетъ намъ всегда въ заповѣдехъ Божественныхъ ходити: не дати злымъ мыслемъ царствовати въ сердцехъ нашихъ. Не будите яко мдаденцы, плавающе порѣваеми всякыми вѣтры, будете въ заповѣдехъ Божiихъ и другъ другу блази и милосерди, якоже возлюби насъ Христосъ. Блуженiе жъ, и нечистоты, и лихоиманiе и всякое злодѣянiе не буди въ васъ. Аки чада свѣту ходите, не примѣшайтеся дѣломъ неподобнымъ, но паче обличайте, все бо обличаемо свѣтъ есть. Жены бы покарялись мужемъ своимъ, аки Богови, яко мужъ глава есть женѣ, якоже Христосъ есть глава Церкви. И мужемъ любити жены своя, якоже и Христосъ возлюби Церковь, тако суть мужи длъжны любити жены своя, аки своя тѣлеса. Чада слушайте родителей своихъ. Раби слушай(те) господiй своихъ, да не на васъ збудется реченное пророкомъ: человѣкъ въ чести сый не разумѣ, уподобися скоту не смысленному.

Родъ же Фряжскiй, въ Божественныхъ Писанiихъ Германи глаголются, искорениша древняя Римляны языкъ. Избраша же отъ различныхъ ересей и мнящеся, яко премудри, и безумiемъ высокымъ исполнени суще и наполнишася различными ересми. Образу Господню и Богородицыну и святымъ не покланяются, и постятся въ субботу. А святыхъ апостолъ и святыхъ отецъ правила возбраняютъ въ субботу постъ имѣти, точiю кромѣ великiе единыя субботы. Якоже сего ради и армени отъ безкваснихъ приносятъ и жидовствуютъ. Латына же безквасная сотворяюще и жидовствуютъ и въ службѣ во время причащенiя единъ отъ служащихъ ядый опрѣсноки, а прочихъ цѣлуетъ и глаголетъ, яко Христосъ на вечери безквасная яде. Почто же и не обрѣзуются? Се ложная ихъ ересь. Истина же въ благовѣстiи речена: прiимъ хлѣбъ, даяше ученикомъ. А о опресноцѣ не глаголеть ни Господъ, ни апостоли. И Божественное крещенiе сотворяютъ, въ едино погруженiе крещаютъ, и крещаенымъ уста солiю исполняютъ. Аще бескваснымъ причащаемся явѣ, яко еще сѣнь Моѵсейскаго закона держимъ и трапезу жидовскую ямы, а не Божiю словесную живую плоть. Не бо есмя подъ закономъ, но подъ благодатiю. Нова бо есмя тварь о Христѣ, понеже древняа мимоидоша. О святѣмъ же крещенiи Богомъ узаконено есть и апостоломъ повелѣ: шедше научите вся языки, крестяще я во имя Отца и Сына и Святаго Духа, учаще и блюсти вся, елика заповѣдахъ вамъ. И апостоли возградиша и научиша со многымъ трудомъ. А яко отъ святыхъ Вселенскихъ Соборъ во Святыхъ Тайныхъ жрътвахъ во церквахъ нашихъ воспоминанiе римскаго папы отсѣчено бысть многыхъ ради ересей. А Моамефово бѣсовское ученiе святыми отцы проклято.

Видите, учители, како апостоли трудишася, и како святiи отцы подвизашася, и како о пастусѣхъ словесныхъ овецъ Божiихъ писано, иже млеко и вóлну вземлюще отъ стада, а о овцахъ не пекущеся. Како отвѣтъ имамы дати на судѣ Божiи, и кое слово въздамы Великому Пастуху, рекше(му) пророческими усты: аще нисходящаго въ ровъ грѣховный не извлечеши, кровь его отъ руки твоея взыщу. Подобаетъ убо епископу быти яко Божiю приставнику, не себѣ угожающе, пособствующе по вѣрнемъ словеси въ здравемъ ученiи, и противныхъ вѣрѣ обличати. Пастырь добрый душу свою полагаетъ за овцы, а иже есть наимникъ, а не пастырь, ему же не суть овца своа, аще видитъ волка грядуща, то бѣжитъ отъ овецъ; расхититъ я и распудитъ овецъ. Видите, откуду исходятъ волцы и змiи, пси, еретичьская ученiа: не отъ лѣности ли и грубости пастушьски? Откуду ли разбойницы и татiе, грѣси и неправды, не отъ ненаказанiа ли епископьска? Паки глаголю: пастуси, блюдите стада, порученаго вамъ, учите кротостiю и наказуйте съ любовiю. Слышите Господне благовѣстiе: и ины овцы (имамъ), яже не суть отъ двора сего, но и тѣхъ подобаетъ привести ми, да не на насъ збудется реченное: о горе вамъ вожеве слѣпiи, яко затворяете Царствiе Божiе предъ человѣкы, ни сами въходяще, ни иному дасте внити. Внемлите пастушьскiя старѣйшины: подражайте святымъ отцамъ, не почивайте, учаще порученныя вамъ люди. И не погребайте таланта въ тицахъ, и не скрыйте бисера Господня въ пiянствѣ. Разумѣйте: рабъ онъ, прiемъ сребреникъ единъ, и того не погуби и принесе господеви и рече: убояхся тебѣ, яко яръ еси, жнеши идѣже не сѣявъ, събираеши, удуже и не расточивъ; и рече рабу: почто убо не дадяше сребра моего купцемъ, да быхъ пришелъ взялъ свое съ прибыткомъ. Послушайте, пастуси, страшнаго онаго отвѣта: и не погубивый сребреника Господня кольми мученъ будетъ. Видите, архiепископи и епископи, попове и дiакони, дѣлатели непостыднiи, правяще слово исьтинное, вводяще ко спасенiю. Святители земнiи, серафими плотяни небеснiи, священноначальницы, послѣдуйте заповѣди первому Пастырю, Священноначальнику, Архiерею и Учителю Христу, Спасителю нашему и апостоломъ Его и святымъ отцемъ и святымъ седми Соборомъ Вселенскимъ, еже поспѣшити и направити ноги наша на путь заповѣдей Господнихъ. Помяните прьваго человѣка Адама, рукою Божiею създана. И отъ Бога наречется господинъ на земли, Богомъ почтенъ и въ рай введенъ, Богу собесѣдникъ бысть. Едину заповѣдь преступивъ и многа блага лишися, толикiа чести и славы царствiа и всѣхъ благыхъ даровъ. Видите Владычне милосердiе на не хранящихъ заповѣди непощаженiе, а на сотворшихъ милость. Послушайте верховнаго апостола Петра, како васъ учитъ: пасите, еже въ васъ стадо Божiе, не нужею, но волею, ни мздою, но любовiю. Подражайте плодящая винограды, како тiи бдять день и нощь округъ ходяще, плещуще и кричуще, не дадуще ни звѣрю, ни татю, ни птицамъ озобати винограда. Тако и вы творите учители, да не дивiй вепрь дiяволъ озобяетъ Господня винограда. Аще и молитвы продлъжающе, а обидимыхъ сиротъ не исторгнуще отъ печали, вся та мрьзка суть. Стенанiа бо и слезы убогихъ и безъ правды стражущихъ кровь наричютъ книги. Се же вся видящи предъ очима нашима пастуси, что обѣща Господь добрымъ и злымъ и кацѣмъ образомъ лѣпо быти. Подражайте бывшихъ преже васъ святыхъ отецъ, ихъ же имена помявувше боятся бѣси. Не рцы никтоже: не мощно есть вся лѣта такому быти, бѣша святiи велицы и крѣпцы и лѣта ихъ добра. Нынѣ же зла насташа. Христолюбцы, не помышляйте и не глаголите сего, Той бо бывый Богъ и тогда и нынѣ Той же есть и во вѣки на всѣхъ мѣстѣхъ милуетъ призывающихъ Его.

Святительству твоему благодать и благословенiе и всему освященному собору и съ твоею паствою православною и христоименитымъ людемъ. Соблюдайте порученiе и обѣты и отъ дiявола отврьженiе, и ко Христу обѣщанiе, да цѣломудреннѣ и праведнѣ и благочестнѣ живемъ въ нынѣшнемъ вѣцѣ, ждуще блаженныя надежди и явленiе славы великаго Бога Спасителя нашего Iсуса Христа. Поминайте же мя присно, и держите заповѣди, яже прiясте блаженныхъ мужъ, пророкъ, апостолъ и святыхъ отецъ, и Владыки всѣхъ. Слышите Владычне человѣколюбiе, глаголюще: небо и земля преити имать, а словеса Моа не имутъ преити. Единою кляхся святымъ Моимъ: не хощу смерти грѣшникомъ, да того ради и азъ васъ позываю: идите, чада, послушайте мене, дондеже время имамы, варимъ лице Его исповѣданiемъ. Пойдемъ, поклонимся предъ Господемъ, сотворшимъ ны, яко Той есть Богъ нашъ, просвѣтитъ лице Свое на ны и помилуетъ ны, Той бо есть Богъ кающихся, Той насъ имать спасти въ вѣкы вся, Тому слава и дръжава и всяка похвала и поклоненiе Отцю и Сыну и Святому Духу, нынѣ и присно и во вѣкы вѣкомъ, аминь.

Примѣчанiя:
[1] Посланiе печатается по рукописному сборнику XVII в. Новгородской Софiйской библиотеки (№ 1475).
[2] Въ рук. неизрѣченнаго.
[3] Въ рук. преставляемыхъ.
[4] «Части и жребiя Богородици». Извѣстно преданiе Восточной Церкви, записанное Стефаномъ Святогорцемъ, что когда, по Вознесенiи Iсуса Христа на небо, апостолы, вмѣстѣ съ Богоматерью, собрались въ Сiонской горницѣ ожидать обѣтованнаго Утѣшителя, то при этомъ «метнуша жребiи, которая коемуждо отъ нихъ страна будетъ, еже бы тамо проповѣдати Евангелiе. Рече же Пресвятая: хощу и Азъ съ вами метнути жребiй... и паде ей жребiемъ Иверская земля... Ангелъ же Божiй рече: не отлучайся Iеросалима, жребiй же твой просвѣтится въ послѣдняя дни...» (Четiи-Минеи, подъ 15 августа).
[5] Карамзинъ, между посланными царя Александра, вмѣсто Каплана называетъ священника Iоакима (т. X, примѣч. 114).
[6] По другимъ указанiямъ, кромѣ бывшаго казначея Троицкой Лавры Закхея, отправлены были iеромонахъ Лавры Iероѳей, Чудова монастыря дiаконъ Ѳеодосiй, да иконописцы Успенскiй священникъ Богданъ, архангельскiй священникъ Димитрiй и дiаконъ Ѳеодоръ. См. Исторiю Рус. Церкви пр. Филарета, перiодъ 4, стр. 60; откуда пр. Филаретъ ваимствовалъ эти свѣдѣнiя — неизвѣстно, такъ какъ ни у Карамзина, ни у Iосселiани, которыхъ онъ цитуетъ, объ упоминаемыхъ лицахъ ничего не говорится.
[7] Вся убо заповѣди... Съ этихъ поръ начинаются выдержки изъ слова пресвитера Космы, отчасти буквальныя, отчасти съ пропусками, съ незначительнымъ перифразомъ и небольшими вставками. Сличи «Православный Собесѣдникъ», 1864 г. апрѣль, май, iюнь.
[8] Вѣроятно слѣдуетъ читать: но видѣвъ, яко всѣ ти грѣси не суть точни ереси и пр.
[9] Обиноваться — сомнѣваться, опускать.
[10] Мотыло — навозъ, пометъ.
[11] Комканiе — Святая Евхаристiя, вѣроятно отъ лат. communicatio; cлово, часто встрѣчающееся въ древнихъ паматникахъ.
[12] До этаго мѣста — выдержки изъ Козьмы.
[13] Это мѣсто начиная со словъ: иже не любитъ Господа Iсуса... взято, съ незначительнымъ пропусками изъ слова Козмы см. «Православный Собесѣдникъ», 1864 г. т. 2, стр. 324.
[14] См. там же слово Козьмы, т. 2, стр. 99.
[15] По обѣщанiю?
[16] Вѣроятно слѣдуетъ читать: «апостольскимъ».
[17] Въ рук. не ангелъ.
[18] Въ рукописи ошибочно: первозванный.
[19] Подлинный текстъ посланiя здѣсь очевидно испорченъ переписчикомъ.
[20] Созиждемъ.

Печатается по изданiю: Изъ неизданныхъ памятниковъ Древней Русской литературы. Посланiе Патрiарха Iова къ Грузинскому Митрополиту Николаю. // Журналъ «Христiанское чтенiе, издаваемое при Санктпетербургской Духовной Академiи». – 1869 г. – Часть II. – с. 867-893.