Не предкновени бывайте и еллиномъ и іюдѣемъ и церкви Божіей, [2] глаголеть божественное и поклоняемое слово апостольское. Сіе же како можетъ инако исправитись нами, аще не правовѣрною и православною вѣрою, и житіемъ честнымъ и богоугоднымъ и прилѣжнымъ храненіемъ божественныхъ заповѣдей Господа и Спаса нашего Ісуса Христа; по божественному бо Іякову, брату Божію, вѣра кромѣ дѣлъ благыхъ мертва естъ, [3] такожде и дѣла кромѣ правыя вѣры не полезна обоя. Подобаетъ бо человѣку Божію совершенну быти въ обоихъ по великому Василію. Но сія убо сице. Понеже убо нѣцыи, не вѣмъ что ся имъ случися, еретика мене неповинна человѣка называти не страшатся, и врага и измѣнника богохранимыя державы русскія, яви ми ся нужно и праведно малыми о себѣ отвѣщати, и яже о себѣ научити оклеветающыхъ мене неправеднымъ сицевымъ оклеветаніемъ, яко благодатію истиннаго Бога нашего Ісуса Христа и правовѣренъ христіянинъ есмь по всему и богохранимыа державы русскыа доброхотѣнъ и прилежнѣйшій богомолець. Молю убо всякаго благочестиваго и православнаго священника же и князя разслушати отвѣта моего съ приличнымъ христіяномъ благоразуміемъ и христоподобною кротостію, отринувши всякъ гнѣвъ неправеденъ и ярость; понеже гнѣвъ мужу въ правду Божію не содѣловаетъ, [4] якоже глаголеть божественный Іяковъ, аделфофеи. [5] Идѣже бо гнѣвъ и ярость обладаютъ, ту и всякое души нестроеніе и безобразіе и безчиніе словесныя части душевныя, уму ослѣпленну уже бывшу и омрачившуся бурею гнѣвною. Обычною убо православною тишиною священныя любве и кротости разумы ваша освѣтивше, подщитесь, аще чимъ гдѣ уклоняются отъ православныя вѣры ли неразуміемъ, ли забвеніемъ, или ненаученіемъ ума своего и разума, исправите мене духомъ кротости [6] по божественному апостолу. Не стыжю бо ся исправленіемь, ниже отреваю è, но и вельми желаю его, и любезне воспріиму è, аки тверде наставляюще мене къ уповаемому благовѣрнымъ небесному царствію.

Вѣрую убо и исповѣдую всею душею и языкомъ единаго Бога вышняго, содѣтеля всѣхъ, безначальна, присносущна, безконечна, въ тріехъ ѵпостасехъ, сирѣчь во Отци и Сынѣ и святѣмъ Дусѣ, нераздѣльне раздѣляема, источника и начало безначальное Сына и Духа Свята; Сыну убо роженнѣ и безначальне и присносущнѣ отъ Него рожаемому и въ своей ѵпостаси покланяемому и славословляемому, и святому Духу отъ того же Отца исходительне происходящу и въ своемъ ѵпостаси вѣруемому и исповѣдуемому, единаго Бога въ трехъ; Тому едино существо, едино божество, едино царьство, едино господьство, не раздѣльне раздѣляемо ѵпостаси, и соединяемо не смѣсне пресущественнымъ божественнымъ существомъ. Сице убо имамъ и мудрствую, якоже вкратце рещи о святѣй и единосущнѣй и нераздѣльней Троицѣ. Такожде вѣрую и исповѣдую ражаемаго безначальне и присносущне Сына и Бога Слова отъ безначальнаго Бога и Отца, благоволеніемъ Отчимь и осѣненіемъ святаго Духа зачята бывша въ пречистыхъ ложеснахъ пресвятыя и приснодѣвы Маріи Божіи Матери, происшедша изъ нея съ пріятою отъ пречистыхъ кровей ея плотію святою своею, человѣка совершенна и Бога совершенна Того же, въ единомъ ѵпостаси и въ двою естеству и дѣйствѣхъ и воляхъ и суща и вѣруема, ниже божеству Его въ человѣчество преложившуся, ниже человѣчеству въ божество премѣнившуся. Такожде вѣрую и исповѣдую Того же нашего ради спасенія и крестъ и страсть и смерть и тридневное погребеніе волею претерпѣвша и изволивша плотію своею, божественвому Его естеству кромѣ страсти всякія пребывшу: божественное бо естество высше отнюдъ всякыя тли и страсти есть, воскресша же изъ мертвыхъ въ третій день силою воздвигшаго Его Бога и Отца, и возшедша ва небеса съ пріятою своею святою плотію, нетлѣннѣй уже бывши и безстрастнѣй, и сѣдяща телеснѣ одесную Бога и Отца своего, и пакы грядуща съ славою судити живымъ и мертвымъ, иже и воздастъ комуждо по дѣломъ его. Такожде вѣрую и исповѣдую всесвятаго Духа, Бога истинна въ своемъ ѵпостаси и суща и покланяема исходяща отъ Отца единаго, якоже божественный гласъ и тайное учительство предалъ есть намъ святымъ евангеліемь божественваго Іоанна. Больши того священнаго тайноучительства, еже о святомъ Дусѣ, ниже мудрствую, ниже учу отнюдъ ни единаго человѣка, но вседушевно пребываю во всѣхъ богословныхъ догматехъ и мудрованіихъ, ихъже предашя намъ самовидци и слугы Бога Слова и яже по нихъ вси вселенстіи собори богодухновенныхъ отець, ниже прилагая что къ нимъ отнюдъ, ниже улагая, [7] или пременяя ни едину іоту, ли черту, но всю православную вѣру и богословіе ихъ соблюдаю въ сердци моемь цѣлу и непремѣнну. Такожде и церковная ихъ преданія, елика уставишя о поклоненіи сирѣчь честныхъ иконъ, постѣхже и о иноческомъ благочиніи же и устроеніи, и елика о божествѳнныхъ пѣніихъ и списанiя и преданiя святѣй и апостольстѣй и соборнѣй церкви, и пріимаю и исповѣдую и облобызаю всѣмь сердцемь моимь. Еще къ симъ исповѣдую и проповѣдую себѣ же и всякому благовѣрному преблагословенную Владычицу мою Богородицу, предстательницу и заступницу всѣмъ православнымъ христіяномъ, по всему быти святую и пречистую и пренепорочную и Приснодѣву, сирѣчь и преже божественнаго и безсѣменнаго рожества воплощшагося изъ нея и въ ней единороднаго Сына Божія, и въ самомъ рожествѣ и по рожествѣ, такожде пребывшу Дѣву пречисту, ниже прежде безсѣмяннаго зачатія Еммануиля искушеніе мужеское пріемшу, ниже по еже изъ нея рожествѣ Его. Никакоже не буди когда христіянину которому сицево что хульно мудрствовати отнюдъ о всесвятѣй оной и пренепорочней приснодѣвѣй дѣвици, честнѣйши херувимъ и славнѣйши безприкладно серафимъ. Толико убо о семъ, и да не многословіемъ стужаю благовѣрнымъ ушесемъ вашымъ.

Таково убо вкратцѣ рещи, еже въ сердци и на языцѣ моемъ имамь и мудрствую о святѣй и непорочней христіянстей вѣрѣ право и неблазнено мудрованіе. Почему убо иному еретика мене называти нѣцыи не ужасаются, да глаголютъ, да доведутъ, исправленія да сподобятъ мене въявѣ да обличятъ; не отрѣваю исправленіе, не стыжуся обличеній, дондеже отъ отеческыя любве съ миромъ и кротостію происходятъ. Азъ благодатію Христовою всѣми моими списаніи и самѣмъ бывшимъ переводомъ и исправленіемъ божественныхъ книгъ вашихъ учю всякаго человѣка прямо мудрствовати о воплощшемся Бозѣ Словѣ, сирѣчь не глаголати Его единаго точію человѣка по вашихъ чясословець, но Бога совершенна и человѣка совершенна въ единомъ ѵпостаси, единого Богочеловѣка. Такожде исповѣдую всею душею Того же Богочеловѣка, воскресша изъ мертвыхъ въ третій день, а не безконечною смертію умерша, якоже проповѣдаютъ Его вездѣ, яже у васъ толкованная евангелія; азъ учу не создаена по Божеству Того же вѣрити и проповѣдати, а не убо созданна и сотворенна, якоже злочестивый Арій хуляше и вашя тріоди проповѣдуютъ Его вездѣ, и правити ихъ не брежете. Азъ Того же единаго мудрствую и исповѣдую отъ Отца безъ матери прежде всѣхъ вѣкъ рожденна, по божественному апостолу и всѣхъ богодухновенныхъ богословцевъ, а не и Отца; Онъ бо [8] безматеренъ святыми писаніи нигдѣже глаголется, ниже бо ражается, или бысть отъ иного коего старѣйшаго себе существа; да исчезнетъ отъ православныхъ сицева хула. Безначаленъ бо Отець и не роженъ и безконеченъ, ниже самъ себе приведе въ божественное свое существо и ѵпостась, якоже нѣцыи безумникы нечестивѣ мудрствуютъ; аще бо дадимъ сіе, послѣдуетъ отъ нужи глаголати, яко не бѣ преждѣ, еже привести самъ себе въ бытіе, и сице возмнитца созданъ, и самъ себе вина и начало, и подъ время и подъ начало и конецъ, [9] Иже единый не созданъ, безначаленъ, присносущенъ, предвѣченъ и безконеченъ вкупѣ съ происходящими отъ Него Сыномъ и Святымъ Духомъ. А яже по васъ [10] часословцы собезматерьня сыну проповѣдуютъ Его втай, и вы таковую хулу презираете и не исправляете. Азъ моими списаніи всякую латынскую ересь и хулу іюдейскую и языческую обличаю, разоряю и развращаю, [11] якоже и самая моя писанія свидѣтельствуютъ. Азъ тѣми же моими списаніи себѣ же и всякому благовѣрному иноку думаю жительствовати, и свое житіе устроити во святыхъ Божіихъ заповѣдехъ и преданіихъ и уставѣхъ, апостольскыхъ же и отеческыхъ , и да отступаютъ отъ всякаго лихоимственнаго рѣзоиманія и неправды и хищенія чюжихъ имѣній и трудовъ, яко сицевая творящіи не въ царство Божіе пріемлются, а въ безконечныя муки отсылаются страшнымъ Судіею по святыхъ евангеліихъ [12] и всѣхъ святыхъ писаній. Аще сихъ ради тяжекъ являюся вамъ и наричюся еретикъ? Разсудите, аще праведно есть сицева страдати мнѣ отъ васъ и слышати, не повинну сущу, сирѣчь елико о православной вѣрѣ. А по житію моему и беззаконіемъ никтоже инъ грѣшнѣйши мене. Послухъ мнѣ Господь нашь Ісусъ Христосъ истинный Богъ, яко кромѣ множества моихъ беззаконій ничтоже ино не свѣмъ себѣ ни хульно что о святѣй и непорочнѣй христіянстѣй вѣрѣ; ниже лукавое что умыслихъ и навѣтное на котораго вѣрна, аще и озлобивъ мене бысть, или озлобляя видится; заповѣдь бо вѣмъ Спасову, глаголющую: любите врагы вашя, благотворите ненавидящимъ васъ, молитесь о напастьствующихъ вамъ и гонящихъ вамъ, да яко сынове Вышняго будете. [13] Явѣ убо, яко супротивная святыя сея заповѣди и творящіи и мудрствующіи не Вышняго сынове, но богоборца и человѣконенавидца, бѣса чяда и угодницы суть. Елма же [14] нѣцыи, враждою ко мнѣ носими, предлагаютъ на оклеветаніе мое рѣчь нѣкую, емше ю изъ нѣгоже азъ сотворихъ превода треоднаго и ею тщатся еретика мене показати; потребно судихъ малыми отвѣщевати о себѣ, да не иніи въ томъ же имъ грѣсѣ увязнутъ неправедно со осуждающими человѣка неповинна. Начну же сице. Въ стихерахъ страшнаго съ плотію на небеса вознесенія Господа и Бога и Спаса нашего Ісуса Христа обрѣтошя клеветникы мои рѣчь нѣкую неподобну, якоже имъ ся мнитъ: сѣдѣлъ еси, и другую: сѣдѣвъ, и глаголютъ: се Максимъ явѣ отлучаетъ еже одесную сѣдалища Бога и Отца сопрестольна и соприсносущна Сына Его; сіе бо: сѣдѣлъ еси и сѣдѣвъ, помимошедшаго времяни есть, глаголють сказательна, а не настоящаго и всегдашняго; явленъ убо Максимъ есть отселе мудрствуя отгнана бывша Единороднаго еже одесную Бога и Отца сѣдалища. Сія убо суть, яже на мене являютъ клеветникы мои умышленія и вины. Азъ же предъ свидѣтелемь Богомь самѣмъ, единемъ сердцевидцемь, предъ нимъже нѣсть ни едина тварь утаена, отвѣщеваю сице вамъ боголюбивѣйшимъ со всею истиною, аще отнюдъ мудрствовахъ когда сицева хульна, или нынѣ мудрствую, или впредь мудрствовати хощу на Господа нашего Ісуса Христа, якоже клеветникы мои неправедно мене клевещутъ, да не дастъ Господь сподобитимися будущаго благовѣрныхъ сообщенія и стоянія еже одесную страшнаго Судіи, егда пріидетъ судити живымъ и мертвымъ, но отлученъ да буду ликостоянія ихъ и вѣчныя славы и веселія, и съ злочестивымъ Аріемъ осужденъ да буду въ огнь кромѣшный. Азъ съ Павломъ божествевнымъ апостоломъ опасно проповѣдаю и глаголю всею душею и языкомъ: Иже сый сiяніе славы Отча и образъ присносуществу Его и нося всяческая глаголомъ силы своея, собою очіщенiе сотворъ согрѣшеній нашыхъ, сѣдѣ одесную престола величествія въ вышнихъ, [15] и прочая; такожде по вся дни и нощы пою и глаголю со всѣми вами благовѣрными: и восшедша на небеса и сѣдяща одесную Отца, и яже по сихъ; такожде и во вседневномъ славословіи пою, благословляю, славословлю и глаголю: Господи Боже, Агнець Божій, Сыне Отечь вземляй грѣхи міра, помилуй насъ, вземляй грѣхы міра, пріими молитвы нашя, сѣдяй одесную Отца, помилуй насъ, и проч. Къ симъ же вѣдомо да есть вамъ, боголюбивѣйшимъ епископомъ и пресвѣтлымъ княземъ и боляромъ, яко егда бываше мною грѣшнымъ исправленіе тріодное, латынскою бесѣдою [16] сказахъ è толмачемъ вашымъ Митѣ да Власу, занеже не у совершеннѣ изучившу ми ся вашей бесѣдѣ; [17] аще убо хульно нѣчто мнится вамъ въ реченіихъ тѣхъ: сѣдѣлъ еси, сѣдѣвъ, имъ праведно есть вмѣнити сицевое нелѣпотное презрѣніе, а не мнѣ; понеже азъ тогда не вѣдахъ различіе сицевыхъ реченій. Аще бы вѣдалъ бы, никакоже бы замолчалъ, но всяко исправилъ быхъ такову нелѣпотную опись. Которая бо польза мнѣ отъ сихъ черныхъ рубищь и молитвъ и иноческаго жительства и многолѣтныхъ сихъ скорбій моихъ, аще обрящуся хуля на Господа и Бога и Спаса моего Ісуса Христа, наньже уповахъ отъ младыхъ ногтей?

Молю убо ваше благовѣріе: не внимайте сицевымъ клеветамъ неправеднымъ, и якоже благовѣрніи подражатели милосердаго и человѣколюбца Христа, разсудите прю мою, и покажите милость свою ко мнѣ бѣдному и нищему богомольцу вашему. Азъ бо благодатію Господа нашего Ісуса Христа просвѣщаемъ и наставляемъ, безпрестани всею душею молюся всѣхъ Владыцѣ и Содѣтелю о милости, животѣ, здравіи и спасеніи и временѣхъ мирныхъ, и пребыти въ соблюденіи богохранимыя державы благовѣрнаго великаго князя русскаго Іоанна Васильевича, и о братѣ его, князѣ Георгіи, десятижды по вся дни прекланяя немолчныя колѣна моя о нихъ предъ царствующимъ на набесѣхъ Господемъ нашимь и Богомъ Ісусъ Христомъ, иже и свидѣтель ми есть, яко истину глаголю. Како убо нѣцыи безъ правды оклеветающе мене измѣнника и врага богохранимѣй державѣ его называютъ? да не поставитъ имъ Господь Богъ сицевое прегрѣшеніе! Не добро ни прилично есть священникомъ сущимъ священствующаго въ вышнихъ Господа Ісуса Христа Сына Божія яростію и гнѣвомъ и памятозлобіемъ побѣждатися и неправедне невавидѣти и гонити враждебне неповинныя, и наипаче молящихся не престанно о васъ и Божіею ревностію отвѣчающихъ и подвизающихся о истинѣ евангельстѣй и благочиніи житія иноческаго. Аще же неугодна вамъ есть яже о истинѣ по Бозѣ ревность нашя и дерзновеніе, имъже дерзаемъ о Бозѣ уповающе на вашу и нашу православную вѣру и любовь, почто и держите силою здѣ насъ? паче же кто васъ силою нудитъ въ чемъ? Но сами произволяете; намъ же нужа належитъ заповѣдію Божіею проповѣдати всѣми усты вопрошающымъ насъ, яже о евангельстѣй и апостольстѣй истинѣ и отцепреданномъ извѣстномъ иноческомъ житіи и узаконеніи. Речено бо есть небеснымъ царемъ Ісусъ Христомъ: вы, еже во тьмѣ слышасте, рцыте во свѣтѣ, и, еже въ ухо речеся вамь, проповѣдите на кровѣхъ: и пакы: иже аще постыдится словесъ моихъ въ родѣ семъ [18] и прочая разумна суть господамъ моимъ. На чтоже и призываете мене здѣ изъ святыя горы? паче же почто и держите здѣ силою, понеже сущаго во мнѣ отчасти искуства святыхъ Писаній не требуете? Но молю вы: не смущайтеся о немъже глаголахъ, силою ми быти удержану отъ васъ; къ благовѣрнымъ бо и православнымъ судіямъ и княземъ творю сій отвѣтъ мой. Вѣсте бо и сами добрѣ уставъ великаго перваго собора никейскаго, яко крѣпко заповѣдуетъ вездѣсущимъ преосвѣщеннымъ святителемъ не судити отнюдь кромѣ своихъ предѣлъ и области, но всякому вѣдати своея области. Аще убо или добръ азъ и правъ есмь о православной вѣрѣ, или развратенъ, судилищу и разсзуду вселенскаго патріарха повиненъ есмь, а не святителю благовѣрныя русскыя земли; грекъ бо азъ и въ гречестѣй земли и родився и воспитанъ и постригся въ иноки. Сего ради и греческыя замли святителемъ повиненъ есмь по Божественнымъ правиломъ и уставомъ святыхъ соборъ. Лѣпо убо есть вамъ правовѣрнымъ сущимъ послушати и повинутися по всему Божественныыъ правиломъ и уставомъ святыхъ соборъ, да во всѣхъ являетеся предъ Богомъ прави, а предъ людьми благохвальнiи и пречестніи. Аще ли же здѣ явихся есмь въ чемъ ни буди обидѣвъ кого, или зла умыслихъ на благовѣрнаго и преславнаго великаго князя русскаго, и доведутъ того клеветницы мои, не отрицаюся всякія смертныя казни, въ сладость воистинну претерплю всякія привременныя казни, да сподоблюся избыти вѣчныхъ мукъ. Но уповаю на неизреченныхъ щедротъ Божіихъ, яко во всѣхъ солгашя на мя, тогда оклеветавше мене; которыи же ни были, Богъ да проститъ ихъ. Но и о семъ толикъ отвѣтъ довлѣетъ. Азъ же, аще и не великъ есмь въ разумѣ и искуствѣ божественныхъ Писаній, обаче посланъ есмь здѣ отъ всесвятыя горы по вопросу и по грамотѣ благовѣрнаго и приснопамятнаго великаго князя Василія Ивановича, всея Русіи, у негоже и преобильныя чести получихъ лѣтъ 9, егоже повѣленіемъ повинуяся не точію толкованіе псалтырное, дѣло нарочито и всякія духовныя пользы и сладости исполнено, преведохъ отъ греческаго языка на русскій, но и ины богодухновенныя книги, различно разстлѣнны отъ преписующихъ я, благодатію Христовою и содѣтельствомъ святаго Параклита, предобрѣйши исправихъ, яко и вамъ чаю господамъ моимъ вѣдомо есть. Аще же нѣгдѣ что или по забвенію, или по иному которому обстоянію, презрѣно бысть мнѣ [19] и не добро преведено бывше видится вамъ, многа бо суть случающаяся на всякъ чась несовершенному сущу уму человѣческому, ибо и забытіе омрачаетъ его и скорбь смущаетъ, есть же егда и ярость и гнѣвъ и пьянство отемнѣваетъ его; толикыми убо треволненіи обуреваемому немощному уму человѣческому, аще что нѣгдѣ презрѣно бысть ему, не подобаетъ дивитися, ниже смущатися, ниже ересію осужати его, но паче ущедрити праведно есть и яже христоподобныя любве показати къ нему, и яже отъ него презрѣнная ли по забвенію или по нѣкоторому иному обстоянію, правити вкупѣ съ нимъ; понеже никтоже въ человѣцѣхъ совершенство когда получилъ есть, вси бо забвенію и невѣдѣнію подлежимъ, овы убо больше, овы же меньше, вси же другъ отъ друга требуемъ и совѣта и помощи. Симъ убо сице ся имущимъ, праведно и преподобно есть вамъ подражати пастыря онаго преблагаго, иже, оставль 99, на горѣ, изыде на взысканіе заблудшаго, егоже и обрѣтъ и вземъ на раму, возвращься, радуяся множае паче о немъ, нежели о 99, незаблудшихъ; оного убо милосердіе и кротость подражавше и вы, якоже честніи священницы его и тайноучители словесныхъ его овецъ, сложивше [20] всякое нелѣпотное движеніе словесныя чясти душевныя, [21] молю ваше преподобіе, разорите еже на мя бѣднаго многолѣтное отвращеніе, [22] да не глаголю враждованіе, и покажите ко мнѣ окаянному яже любве и кротости Бога и Спаса всѣхъ Ісуса Христа, да и вы явитеся во всѣхъ подражатели Его и споспѣшницы Ему во спасеніе заблужающихся, и прилѣжни и тверди хранителіе священныя заповѣди Его, сирѣчь святыя и богоподражательныя и боготворныя любве, яже есть исполненіе всего закона по божественному Апостолу, еюже единою можно получити безконечнаго царствія небеснаго Владыки, Иже пріиде на землю, да спасетъ, а не погубитъ душя человѣческыя: Тому слава въ вѣкы вѣкомъ, аминь.

Примѣчанiя:
[1] Написано пр. Максимомъ въ заточеніи въ тверскомъ Отрочь-монастырѣ послѣ 1534 г.
[2] 1 Кор. 10: 32.
[3] Iак. 2: 20.
[4] Іак. 1: 20.
[5] Братъ Божій — αδελϕός Θεοῦ.
[6] Гал. 6: 1.
[7] отлагая.
[8] Богъ-Отецъ.
[9] Т. е. подчинится.
[10] У васъ.
[11] Отвергаю.
[12] По ученію св. евангелій.
[13] Матѳ. 5: 44.
[14] Такъ-какъ...
[15] Евр. 1: 3.
[16] на латинскомъ языкѣ.
[17] вашему языку.
[18] Матѳ. 10: 27.
[19] мною не досмотрѣно.
[20] укротивши.
[21] т. е. ума.
[22] прекратите нерасположеніе ко мнѣ.

Печатается по изданiю: Сочиненiя преподобнаго Максима Грека, изданныя при Казанской Духовной Академiи. Часть первая: Догматико-полемическiя сочиненiя. – Изданiе второе. Казань: Типо-литографiя Императорскаго Университета, 1894. – с. 19-32.