Преосвященнеший от Бога избранный и поставленный архипастырю, и вы Боголюбивейшии архиерее, их же Бог постави пасти Церковь свою в сей православной хриcтианской молдовлахийской земли.

Аз последнейший рaб преосвященств вaших стaвши пред священнолепными лицами преосвященств вaших и всего собора, о мне последнейшем и о oбщем брaтий ко мне и друг ко другу о имени Христовом собрании, и житии кратчaйшим сим и неразумным словом хотя объявити, молю преосвященство вaше, благоутробие Божие и долготерпение подражaюще, долготерпеливно послушати сие мое изъявлeние, презирaюще грубость мою человека проста и невежды вaшею Богодaнною премудростию, аз в юности моей многую рeвность и любовь ко иноческому житию имея, остaвив мир и яже в мире, начaток образа иноческаго в моем отечестве малой россии восприях, тaже рeвность восприим в стрaнствии способнейше работати Богу, остaвив свое отечество приидох во святоименитую афонскую гору, и седох под монастырeм пантокрaтором в некоей колибе на безмолвии, идеже и мaнтию сподобихся прияти, седящу же ми тaмо некое врeмя брaт един дин немул румунескъ рeвностию Божиею пришeдши во святую гору начaт мя нудити зелным своим прошeнием приняти его во ученичество, аз же видя нeмощь души моея и неразумие на мнозе отрицaхся, тaже пaки ово зря его прилежне мя о своем приятии моляща, овоже и святое писaние разсуждaя непохваляющее и возбраняющее стрaстному самому о себе седети, умыслих с онем брaтом яко единомысленным и единодушным, срeдный путь иноческаго жития избрaти, сиречь со единем брaтом или со двема житие, яко и от святaго писaния и от Богодухновeнных оц известны и похвaлны, еже того рaди презрев свою нeмощь и неразумие, всю же мою о моем и брaта исправлeнии на Бога возложив надeжду настaвника незаблудна ко спсeнию мне же и брaту моему предложив писание святое, дерзнух онаго брaта приняти открывaющи ему от писaния стaго якоже особнаго имения ни до тончaйшей вeщи имети, сице ниже волю свою держaти, или последовати своему разсуждeнию, послушaние же со стрaхом Божиим по силе своей душeю и телом совершaти, которому учeнию повинуяся брaт оный всеусeрдне в сaмое произвождай дело, таковым житием живущу мне единодушно с онем брaтом начaша и прочии брaтия зело мне стужaти своим молeнием о своем их в послушaние принятии, аз же на мнозе отрицaхся бояся таковую тяготу попечeния о душах брaтий единем безстрастным прислушающую на себе восприяти, зря же и их прилежное молeние к приятию в послушaние сокрушaхся сердцем сожалея о них, неведый что сотворити, и сице немогий от их прилежнаго молeния избыти, начaх приимaти от онех брaтий по единому в послушaние, и сице умножaющымся брaтиам прейдохом от колибы оныя в скит святaго Константина, идеже собрaвшимся дванaдесяти брaтиям, начaх разсуждaти яко от срeдняго пути сиречь с единем или двема брaтома пребывaния умножeния рaди пременяется житие нaше на oбщее житие, которое по законоположeнию святaго Василия Великаго не менее от дванaдесяти брaтий должно начинaтися, и того рaди невмещaюще в мaлем скитку святaго Константина, создaхом в нов от сaмаго основaния скит святaго пророка Илии иждивeнием христолюбцов пaчеже трудaми брaтий, прострaннейший рaди своего вмещения помышляюще в толиком точию числе брaтий жизнь свою совершити, егда же совершися скит, и увидехом яко еще и пaче начaша многии братия из мира во святую гору от сих стрaн и от отечества моего приходящии таковомужде житию ревнующе в том скиту умножaтися немогущу мне ни единым образом от них избыти моления о своем их в послушaние приятии, яко в неколицех летех умножилося до пятидесяти брaтий, начaх о сeм разсуждaти яко таковому единодушному и единомысленному о имени Христовом собрaнию брaтии святaя горa аще и святое место, но яко зело притрудное не подaсть нaм руки к болшему утверждeнию но крaйних рaди нужд без их же невозможно состоятися общему житию, приведет по врeмени к разорeнию. Того рaди помыслих в сию Богохранимую правослaвную зeмлю со всеми брaтиями преселитися болшаго рaди нaшему общему житию утверждeния, помысл же сeй многажды открывaх святейшему патриaрху кир Серафиму, который о исшeствии нaшем сожалея восхотел был утвердити нaше житие, в единой святогорской обители глаголемой симопетре, обaче и сие его святейшества благое намерение Бог имиже весть судбaми неисполнил, яко и нaм немaлая тщетa зделалася яко должником обители оноя ничтоже неповинны суще принуждены были уплатити до седми сот лeвов, еже все разсуждaюще и боящеся да не будет крaйнее житию нaшему разорeние, которое Божиим поспешеством, немaлыми труды и поты в таковое единодушное и общое друг со другом пребывaние пришло, сотворихом совет oбще вси единомысленне и единодушне изити от святыя горы в сию правослaвную и Богохранимую хриcтианскую зeмлю, во еже житию нaшему приличнаго поискaти места, и сeй совет утвердивше изыдохом от святыя горы, и приидохом в сию Богохранимую зeмлю, всю нaшу о устроeнии жития нaшего на общаго промысленника и создaтеля всех Бога возложивше надeжду, который крaйним своим и неизречeнным милосердием водхнул блгодатию своею в сердца благочестиваго и Христолюбиваго кrтоноснаго и Христоподражaтелнаго в млcти господаря нaшего Григория Иоaнновича воеводу, и преосвященнейшаго великаго господина нaшего кир Гавриила архиепиcкопа митрополита Богохранимыя сея земли, иже Богу подобящеся своим милосердием дадоша нaм прекрaсный монастырь Драгомирну здaние во блажeнной пaмяти преосвященнаго архиепиcкопа и митрополита сочaвскаго кир Анастaсия Кримковича на общое житие нaше, еже причитaем во пeрвых неизречeнному о нaшем oбщем житии особному промыслу Божию, тоже Христоподражaтелному милосердию блGочестивейшаго воеводы и преосвященнаго митрополита, послуживших таковому промыслу и воли бжественной, и во вeлие себе сие вменяем чудо, кто бо от нaс сего надеялся да нaм бедным нищым и стрaнным неимевшым и главы где подклонити дaстся таковое место, и таковый прекрaсный монастырь со всеми своими угодиами приличный к нaшему общежитию, не точию же но еще и уволен и свобод да будет от всех обычных дaней, еже благочестивый господaрь утверди своего величества на сие жaлованною грaмотою. Слaва единому триипостaсному Богу, тройческий свой монастырь нaшему общежитию, чрез благочестивейшаго воеводу и преосвященнейшаго митрополита даровaвшему, блгодарим и благочестивейшему и Христолюбивейшему и премилостивейшему господрю нaшему Иоaнну Григорию Иоaнновичу воеводе, о таковой его величества к нaм превысочaйшей сотворeнной млcти, за которую должни есмы до последняго нaшего издыхaния о его величестве, великаго в млcти молити Бога, да подaст ему млcтию и судом по воле своей бжественной Боговрученную себе держaву управляющи, и в настоящем житии мир, здрaвие, долгодeнствие, на видимыя и не видимыя враги победу имети, в будущем же блажeнстве за мудрое и верное Боговрученныя себе держaвы управлeние, венeц царствия небеcнаго, со благочестивыми цари Богу угодившими, вкупе со благочестивою госпожeю нaшею елeною домною, и Боголюбивими своими чaди, и всем Богопрослaвленным родом восприяти, благодарим и преосвященнейшему нaшему архиепиcкопу и митрополиту великому гдcну кир гавриилу с Боголюбивыми епиcкопи о крaйней их к нaм явленной млcти, за которую при всегдaшних нaших маломощных молитвах желaем да Боговрученное себе словeсных овeц Христовых стaдо, на злaце бжественных его учeний упaсши, сподобятся в будущем блажeнстве от пастыреначaлника великаго архиерeа прошeдшаго небеса Христa Сна Божия со всеми пaстыри и учители церкве святыя уготованная любящым его Бога нaшего в няже и ангели желaют приникнути благая восприяти, благодарим еще и благородным их милостем господaм боляром, и всем благодетелем святыя сея обители, молящеся Богу, да затаковое их кнaм, и ко обители сeй благодеяние, и в настоящей и будущей жизни, воздaсть своим благостинным воздаянием, врeменными и вечными благими. Таковое мое в крaткости, грубости исполненное о начaтце нaшего общаго жития, и о вине изшeствия нaшего от святыя горы в сию Богохранимую зeмлю преосвященству вaшему изявлeние предложивше, еще же и за Богоподражaнную млcть благочестивейшаго и Христолюбивейшаго нaшего господря Иоaнна Григория Иоaнновича воеводы, и преосвященнейшаго нaшего великаго господна кир гавриила архиепcкопа митрополита от Бога постaвленнаго правослaвныя земли сея, с любовию страннолюбно нaс пaче надeжды нашея принявших, и прекрaсную обитель на общее нaше житие даровaвших, еще же и Боголюбивых епcкопов Богохранимыя сея земли, и благородных боляр, и словом и делом в крaйней нaшей нужде помогших и всякое благодеяние и спомоществовaние святой обители нaшей показующих по силе нaшей благодаривше.

Ныне приступaем к сему яковый общежителный чин должно есть общее сие житие по устaву Богоносных оц елико возможно есть соблюсти и хранити непреступно и непремeнно; А понeже Бог нaс сподоби превысочaйшею млcтию благочестивейшаго гдcря нaшего и преосвященнейшаго господна нaшего митрополита, таковую обитель наследити, которая якоже слышим тем намерением и создaся от блажeнныя пaмяти кир Анастaсия архиепиcкопа и митрополита Сочaвскаго да будет по всему в нeй общее по писaнию, а не oсобное житие, зело желaхом и чин от него общему житию предaнный хранити яко отца и ктитора нaшего, но понeже прилежно между книгами которых мaлое число в монастыре от ктитора надaнных обретaется, и повсюду, прилежно поискaвше того чина необретохом, того рaди на Бога и по Боге на молитвы преосвященств вaших, и блажeннаго ктитора нaшего возложивше надeжду, и силу священнаго писaния и общежителныя Богопреданныя устaвы во святых василия великаго и прочиих святых и духоносных оц испитaвше, хощем чин приличествующий общему житию и нужнейший ко спасeнию и в сие последнее время соблюдатися могущий, испитавше предложити преосвященству вашему, и всему Богособранному и Богоизбранному дховному собору, и аще что явится в сeм написанном от нaс общежителном чине Богу угодно и священному соглaсно писaнию, молим преосвященств вaших, и всего духовнаго освященнаго собора вaшего Богодaнною влaстию утвердити, да непреступно соблюдaется, аще же что явится Богу и священному писaнию противно, молим яко овцы пaстырей нaших духом кротости нaше невежество Богодaнною вaшею духовною премудростию испрaвити, и на пaжить Богоугоднаго общежителнаго чина нaс настaвити. Пeрвее убо хощем о нaшем общежителном чине объявити преосвященству вaшему и всему освященному собору не о том, который внов хощет ныне в нaшем общежитии аки прежде не бывший устaвитися, но о оном иже и спрeжде еще во святей горе в нaшем житии устaвися и блгодатию Божиею и вaшими многомощними молитвами по елику есть нeмощи нaшей возможно непреступно соблюдaется.

1. Пeрвый убо устaв и чин в общем нaшем житии егоже и в мaлом и в множайшем числе брaтий опaсно соблюдaхом и до ныне блгодатию Божиею соблюдaем сeй есть: еже ни единому брaту ни единым образом никаковaго движимаго и недвижимаго стяжaния ни в малейшей вeщи не имети, ниже свое что именовaти, но вся от Бога посылaемая к составлeнию общаго жития имети обща, благочиния же рaди, настоятель всякаго брaта нужду в пищи и одeжде и в прочиих потрeбах усмотревая должен есть аки оц о чaдех своих духовных пекийся по Боге устроевати подавaя всякому нужныя противу нужде потрeбы, да и восприятие нужних потрeб будет всякому брaту по послушaнию, и своея воли остановлeнию, а непосамочинному избирaнию, и сeй чин и устaв аки корень и основaние блгодатию Христовою положихом общему нaшему житию, известно ведуще яко от сего произростает во общеживущих брaтиях искренняя ко Богу и ближнему любовь, кротость смирeние мир и единомыслие, воли своея во всем отсечeние, и послушaние таковии брaтия могут проходити не рaди коего приврeменнаго стяжaния, не слaвы рaди и чeсти и упокоeния телeснаго ниже инаго коего рaди помысла человеческаго, но единаго рaди своего спасeния, и от сего может быти в них сердце и душа едина, мирскaя же гордыня, нeнависть на ближняго, зaвисть вражда злопомнение и прочия злобы, во удаляющихся особнаго имения брaтиях не имут где главы подклонити, от oсобнаго бо во общем житии имения всякая злоба, всякое зaповедей Божиих преступлeние раждaется, и дерзaяй же некое и малейшее oсобное стяжaние во общем житии имети, таковый по великому василию вторый иуда бывaет, истины предaтель быв якоже он Господа. Таковую убо злобу и врeд душeвный, от oсобнаго имения во общем житии происходящий, от Богодухновeннаго Богоносных оц писaния видя, зело ужасохся душeю да не кaко таковый душетленный недуг во общем нaшем житии в мещение приимет, и совершeнное ему сотворит запустение, сего рaди пaче всего о сeм прилежное имех попечeние, всякому брaту в общее житие и послушaние себе предающему от священнаго писaния особ открывaти, яко ниединим образом никаковaго oсобнаго имения до последняго своего издыхaния недолжен есть имети, которому учeнию вси брaтия единодушно повинующеся зело опaсно соблюдaют, яко ни во ум ниединому от них когда приходит во еже что особь стяжaти, удовлевaющеся вси нужными к состоянию жития от Бога посилaемыми потрeбами.

2. Вторый чин егоже сему общему житию якоже мним и все монaшеское житие высит, блгодатию Христовою положихом сeй есть: еже всем брaтиам единомысленне и единодушне о имени Христовом в сие общее житие собрaвшимся, должно прeжде всего и пaче всего аки путь к царствию небеcному неуклонно ведущий стяжaти послову послушaние, всякую свою волю и разсуждeние и самочиние оплевaвши, и вне повeргши, волю же и разсуждeние и зaповеди отца своего, аще по силе священнаго писaния будет всеусeрдне тщaтися творити и исполняти, и аки самому Господу а нечеловеком брaтии сострaхом Божиим и сосмиренномудрием посиле своей душeю и телом и всем своим благим произволeнием до смeрти послужити.

3. Настоятель известно ведый яко о душах брaтий хощет истязан быти в дeнь стрaшнаго вторaго Христова пришeствия, должен есть всеприлежно священное писaние и учeние духовных отец испытующи, кроме свидетельства его ни учeние от себе брaтии приносити ни зaповеди предаяти, или что уставляти, но посиле священнаго писaния и учeния святых отец должен есть чaсте брaтию поучaти и наставляти и волю Божию открывaти, и порaзуму зaповедей Христовых послушания монастырская брaтии предавaти, бояся и трепеща от себе что а не порaзуму писaния брaтии во ображaти известно ведый яко писaние святое и учeние святых оц и ему самому и брaтии есть настaвник и путеводитель ко спасeнию незаблудный. Должен есть настоятель собою образ смиренномудрия и во всем соглaснаго и единомысленнаго соуза любве духовныя всему собору во ображaя несaм собою всякую вeщь без совета начинaти и творити, но вомногих нужнейших делех, собирaющи искуснейших в духовном разсуждeнии брaтий, и со их советом, испытующи и писaние, да не будет что Богу и бжественным зaповедем и писaнию противно, тaко начинaти и творити, аще же нужное яковое дело явится егоже и пред всем собором должно обявити, то и вeсь собор собрaвши, и со общим всего собора ведением и разсмотрeнием, таковое дело начинaти и творити, и таковым образом может быти между брaтиею всегдaшний мир и единомыслие и соуз любве духовныя нерешимый.

4. Прaвило соборное святыя восточныя церкве вечeрню повечeрие полунущницу утреню часы и бжественную литургию, тaкожде на вся Господския и Богородичныя и великих святых прaздники всенощная бдения, сочтeниями же намeншия же праздники полиелeй и славословие сочтeниями же и прочий вeсь церковный чин и последование, по соборному устaву якоже во святей горе афонстей навыкохом должно есть в сeй нaшей обители во всем непреступно и без остановлeния без всякия борзости во свое врeмя совершaтися. Нанeм же ктитори и благодетели святыя обители по чину и устaву святыя церкве должни суть поминaтися живии и престaвлшиися непременно. Начaлник же и вси брaтия должни суть всегда на соборное прaвило церковное всяк почину своему в мaнтиях рясах и клобукaх обретaтися, и никогдаже сего кому кроме благословныя вины якоже недуга, или послушaния нужнаго остaвити, аще же который от брaтий необрелся бы на церковном прaвиле, должно есть настоятелю в трапезе привсей брaтии о сeм истязaние творити, и аще не покaжет вины благословныя, должен есть настоятель таковому брaту подобaющий канон поклонами чрез всю трапeзу, или неядением в той дeнь при oбычном своем духовном словeсном наказaнии дaти.

5. В трапeзу должно есть настоятелю и всей брaтии на всяк дeнь собирaтися и от Бога посилaемая иноческому обетовaнию незазорныя oбщия пищи и пития во слaву Божию oбще всем причащaтися, зело наблюдaюще о разрешeнии и неразрешeнии oбщий церкве святыя устaв, и должно на трапезе брaтии по своему чину в мaнтиях рясах и клобукaх седяще с велиим и крaйним молчaнием, и стрaхом Божиим пищи вкушaти зело, внимaющи чтeнию которое должно есть всякаго дне непременно в трапезе быти с житий святых отечееских и учителных книг по устaву церковному, во вся же ндли чрез весь год, господския же великия прaздники и прaзднуемых святых аще же возможно еже и пaче лучше есть и на всяк дeнь должно есть непременно панагии быти, и вeсь чин трапeзи по oбычаю святогорскому должен есть в нaшем oбщежитии совершaтися, и ни единым образом по кeлиям никогдаже ясти ни настоятелю ни брaтии, кроме недуга или крaйния стaрости свободно да не будет, и единыя oбщия пищи всем причащaтися, аще же кто от брaтий повреждeн стомах будет имети и не возможет oбщия пищи вкусити, таковому должно есть по учeнию святых оц и поразсуждeнию дaтися пища ползующая его по таковой крaйной нужде, oбaче и тую oбще со всеми брaтиями в трапезе, а не в кeллии должен есть восприимaти.

6. В кeлиах брaтии должно сидети по предaнию святых оц со стрaхом Божиим пaче всякаго подвига предпочитaющи умную молитву яко любовь Божию, и источник добродетелей в сeрдце умом художне совершaемую, якоже многии Богоноснии оцы o нeй учат, котории суть сии: святый иоaнн златоуст, святый симеoн митрополит солунский, святый кaллист патриaрх царигрaдский, святый исихий иерусалимский, святый симеoн новый Богослов, святый иоaнн лествичник, святый маxим исповедник, святый григорий синаит, пeтр дамаскин, святый нил синaйский и святый диадох епиcкоп фотийский, котории сии вси, и другии Богоноснии святии оцы, учат сего дела духовнаго, сиречь умныя молитвы. И вящшое врeмя на сию изнуряти, по сeм же пение псалмов, вeтхаго же и новаго завета, учителных и отечееских книг чтeние умеренное имети. Пaмяти же смeрти грехов своих, стрaшнаго суда Божия, муки вечныя царствия небеcнаго и самоукорeние, всегда якоже в кeлии, сице и на всяком месте и во всяком деле, должно всякому по силе своей имети, и во определенном себе от настоятеля рукоделии или художестве упражнятися, прaздну же в кeлии несидети, прaздность бо всему злу научaет инока, безврeменнаго же искeлии происхождeния и бесед неполезных яко яда смертоносна бегати и отвращaтися.

7. Должно настоятелю искуса рaди смиренномудрия, истиннаго же послушaния, и во всем своея воли и разсуждeния отсечeния, еже есть лествица к царствию небеcному послушники возводящия, в повaрню пекaрню келaрию и трапезу и просте рещи во все внутрь монастиря послушания не употребляя на таковaя послушания рабов монcтырских, брaтию по пременам уречeнным определяти, брaтиям же взырaющым на подвигоположника и совершителя веры и}са собою образ послушaния и истиннаго смирeния внегда умыти ноги учеником показaвшаго, неотрицaтися и самаго мнящагося последняго послушaния, верующым яко царствию небеcному будет ходaтайственно, аще со смиренномудрием и стрaхом Божиим брaтии не аки человеком, но аки самому послужат Богу, рабов же монастырских настоятель должен есть на таковыя дела определяти, которая брaтии без разсеяния ума и от монастыря исхождeния, и безмолвия разорeния исполняти невозможно.

8. Настоятель якоже сaм должен есть ко всем брaтиям яко прcным своим о Господе духовным чaдом рaвную любовь имети, сице должен зело блюсти опaсно да и брaтия истинную и нелицемерную равномерную духовную любовь яко знaмение ученичества Христова друг ко другу имут. Чaстну же любовь и особное в дружине содружества яко зазору и зaвисти виновно и истинныя любве разорително, всяким образом тщaтися во общине искореняти, и должен есть все немощи и падения немощных чaд своих отечеески носити долготерпеливно, надeждою исправлeния их и истиннаго покаяния, и исправляти их духом кротости, всегда их словом к полeзному наставляющи, а от дружины их за нeмощь душeвную пaчеже аще от сего врeд прочиим непроисходит, не удаляти. Самочинне же ходящым, воле своей и разсуждeнию последующым, и благое иго послушaния отвeргшым, и таковым своим лукaвым образом врeд обществу творящым никaкоже терпети, но по доволном на едине, при двою или трeх, и пред собором дховном словeсном наставлeнии и наказaнии, в том же или еще горшем своем устроeнии пребывaющых и нехотящых испрaвитися, яко губителным недугом повреждeнныя уды от oбщаго телесе брaтства, аще и со многими слезaми и сожалением и болезнию душeвною, да и прочии таковым душетлителным недугом неповредятся, отсецaти и изганяти, пришeдших же в чувство, и обратившихся ко истинному покаянию, с рaдостию аки оцУ чадолюбиву приимaти, и всякую млcть и сострадaние им покaзовати, и согрешения их прощaти, со всеми брaтиями о их обращeнии духовне веселящуся.

9. Настоятель должен есть имети ко управлeнию, моший, рабов монастирских, брaта всем искусна суща, могуща безпреступлeния зaповедей Божиих и разорeния душeвнаго сия дела добре управляти, да сaм свободь от сего сущи, возможет удобнейшее о спсeнии душeвном брaтий, и о всяком церковном и oбщежителном благочинии дховное попечeние имети, тaкожде и в дховном о брaтиях попечeнии должен есть настоятель помощника себе имети, брaта в рaзуме дховном искусна суща, егоже в своем oбщия рaди потрeбы монастырския отходе, должен есть в себе место при брaтиях оставляти, благочиния рaди, и духовнаго брaтий окормлeния, хотя же настоятель oбщия рaди монастырския потрeбы где отити и умeдлети некое врeмя, должен есть собрaвши вeсь собор брaтий в церковь, лобзaвшиже святыя иконы, взeмши молитву о путешeствии от иерeа, всему собору намерение обявити, и вeсь собор брaтний да молится о нeм ко Богу во еже ему к ним здрaво и благополучно возвратитися смирeнно молити, и сице от всех брaтий прощeние испросив, и свое всем благословeние преподaв, в путь отходити, от пути же Божиею помощию возвратившися не абие к кeллии ити, но собрaвши всех брaтий пeрвее ити в церковь и должное Богу о своем в пути сохранeнии млтвами брaтий пред всем собором воздaвши благодарeние, благодаривши же и брaтии за их молитвы, и млcть Божию о oбщей брaтства ползе о нeй же и отхождeние ему было, покaзанную объявивши, тaко в кeллию свою отходити.

Приводимаго Богом брaта от мира во иночество должен есть настоятель пeрвее на едине совесть его испытaти и от писaния доволне сицевому брaту силу иноческаго общаго жития и по Боге послушaния, воли своея и разсуждeния до смeрти отсечeния и умерщвлeния, открыти, и узрев в нeм истинное, а непритворное желaние иночества и рeвность бжественную, тогда и пред всем собором брaтий пaки силу общаго жития иноческаго и послушaния ему открывши, приняти сицевaго брaта, во oбщое житие и послушaние, и не абие во иночество постризaти, но уставленное прaвилы врeмя, оваго три лета, оваго же шeсть мBсяц смотря плод послушaния, и воли своея отсечeния во искусе в мирской одeжде держaвши, постригaти во иночество, оваго врясу, оваго же и в мaнтию, и брaтии сочетавaти, аще же во искусе уставленное врeмя держaв истиннаго во всем повиновeния и воли отсечeния внeм не узрит, таковaго и по трелетнем искусе никaкоже постригaти, но в мир отпускaти да не будет oбщему житию от таковых самочинников смущeния.

Аще случится приходящему брaту от мира во иночество и некое имение внести в монастырь, таковое имение должен есть настоятель во oбщей сосудохранителнице монастырской неиждивaемое хранити до пострига во иночество онаго брaта, по постризе же на oбщия нужды монастырския и брaтий, оное истощевaти, аще же сый во искусе прeжде пострига раскaется о своем из мира изшeствии и восхощет из обители в мир возвратитися, или во иную обитель где отити, таковому и имение с ним в обитель принесeнное в целости все отдaвши отпустити, да небудет и обители и брaту таковому о сeм смущeния.

Болнице внутрь обители должно есть непременно устроенней быти, брaтий рaди в различныя пaдающих, да имать пaдаяй в недуг oсобное о себе в пищи и питии и во всяком упокоeнии прилежaние, в нeй же брaт искусен могий в рaзуме дховном болным послужити, и аще бы обрелся понE отчaсти искус врачeбныя хитрости умеяй, должен есть от настоятеля постaвлен быти, который в рaзуме служя болным должен есть комуждо от них пищу приличествующую и ползующую во их недузе и питие подавaти, и во всем им упокоeние творити со стрaхом Божиим служaщи им аки самому Господви да и служaй от Господа мздУ имать рeкшаго: болен бех и посетисте менE, и болнии во всем приличествующее себе упокоeние обретaюще благодарят Бога, и мздУ за свое в недузе с благодарeнием претерпение от Бога восприимут.

Должно есть настоятелю пещися, да в мнcтрЕ различная художества будут, а наипaче без ихже потрeбы невозможно содержaтися человеческому житию, и на сия брaтию определяти, и неумеющих обучaти, да самым брaтиям таковaя художества за oбщую ползу проходящым, все oбщество брaтий возможет безмолвно в необходимых своих удовлевaтися нуждах, и безврeменнаго в мир сих рaди потрeб происхождeния и от сего прибывaющаго душeвнаго вреда избежaти.

Странноприимныцам двоим, единой внутрь монастыря, приходящих рaди во обытель чтcных дховных и мирских лиц, другой же вне мнcтря должно есть устроенным быти: да приходящии во обитель и себе внутрь мнcтрЯ, и скотам своим вне монастыря приличествующее упокоeние и послужeние обрящут. И надсeю службою должен есть настоятель поставляти искусных брaтий могущих в рaзуме дховном стрaнным послужити, да и мзды от Бога за разумное свое странным послужeние сподоблятся, и oбщество все видяще стрaнных приличное себе угощeние и послужeние приeмлющих, без молвы и без всякаго стужeния пребудут, должен есть настоятель якоже к дховной своей брaтии дховную по Боге любовь имети, тaко и ко всем во обитель приходящим нищым, болным, неимущым где главы подклонити по зaповедем Божиим туюжде любовь покaзовати, приимaти с любовию онаго в странноприимнице, онаго в болнице, и по силе своей о телeсных их потрeбах попечeние имети, и по возможности обители напутствовавши их потрeбным с миром отпускaти.

Сие вся и прочая oбщежителная святых оц устaвы, якоже во святей афонстей горе по силе нaшей хранихом, тaко и зде по елику возможно есть блгодатию Христовою в нaшем житии сохраняются, точию яко еще странноприемниц готовых на угощeние приходящих во обитель, тaкожде и кeллий на упокоeние брaтий доволных не имеем, и в великой тесноте пребывaем, и сего рaди еще всесовершeннаго чина яков должен есть во oбщем хранитися житии не можем имети, но якоже возможно есть и руку нaм подаeт блгодатию Христовою проходим, дондеже и сию нужду нaшу Господь неизречeнным своим промыслом исполнит. Якоже и прочия нужныя потребы к состоянию жития нaшего о нaс устрояет, да всякий брaт по трудех церковнаго прaвила, и различнаго послушaния, умнаго рaди делания, и телeснаго подвига тaкожде и упокоeния, свою oсобную келийцу, аки тихое и небурное пристaнище имать, отчего может лучшее дховное устроeние и успеяние в брaтии быти, тaкожде и во всяком деле лучшее благочиние может uставлено быти. Сей чин и uстроение нaшего oбщежития аще и не все подробну да не стужим благоразумию вaшему нaшим неразумием преосвященству вaшему и всему Богоизбрaнному собору объявихом, и аще есть воля Божия, и слагaется что к ползе душeвной, молим и преосвященств вaших со всем Богоизбрaнным собором, сие вaшею Богодaнною влaстию и грaмотою утвердити. Аще же сие несть соглaсно писaнию, и противно спасeнию душ, то еже угодно есть Богу и священному соглaсно писaнию, оно да бывает.

Присeм же еще молим преосвященств вaших и всего дховнаго собора, да и жeнскому полу вход во обитель вaшею Богодaнною влaстию возбранeн будет, кроме oбщия Христиaном нужды ћже во врeмя брaни и розмира бывaет. Тaкожде и скит который еще прeжде монастыря от всеблажeннаго нaшего ктитора созданый, в чeсть триeх святых еноха илии и иоaнна Богослова никогдаже ни единим образом от монастыря отлучeн и отделeн да не будет, нанeмже брaтия от монастыря, от настоятеля и от всего собора по послушaнию и своея воли оставлeнию на сидение добре чин и устaвы общежителнии блюдущии определенни да будут, и потрeбы своя все нужныя к составлeнию жития от oбщины да имут, стрaннии же некии иноки, и свое oсобное имущии стяжaние тaмо седети попущени ни единим образом да небудут, да не будет собору от сего oбщаго смущeния, от собора же определении тaмо брaтия по послушaнию наседение должни суть и прaвило царковное по устaву и бжественную литургию помяновeния рaди ктиторей и благодетелей всегда совершaти.

з‹.

Ещe же молим преосвященннейшаго нaшего великаго гдcна архиепиcкопа и митрополита, да аще Бог изволит пришeдшей весне своею Богодaнною влaстию повелит рабЫм монастырским на мeтохъ мнcтырский преселитися и тaмо по благословeнию его преосвященства помощию Божиею создaвшейся царкве, мирский иерeй метоканир рaди и рабов мнcтырских определeн да будет, да нуждам их хриcтианству прислушающыя и спсeнию душ тaмо послужит, и монастырь без всякаго о сeм стужения пребудет, и всему собору брaтий в нутрь мнcтря и наскиту тихое и безмолвное устроится житие.

Ещe же молю аз последнейший со всем собором преосвященнаго нaшего великаго господина архиепcкопа и митрополита, Боголюбивых епиcкопов и вeсь освященный собор, да внaшем oбщежитии сeй чин крепок и непоколебим uстaвлен будет, да по смeрти единаго настоятеля другий отинуду на настоятелство присилaем не будет, но посоглaсному единомысленному всего собора избрaнию, и по совету умирaющаго настоятеля, и по благословeнию преосвященнаго митрополита должен есть таковый брaт избран от oбщества брaтий и постaвлен быти, который в рaзуме дховном, и ведении священнаго писaния, и oбщежителных устaвов, тaкожде и в послушaнии и своея воли и разсуждeния отсечeнии, в любви кротости и смирeнии и во всех добродетелех прочую превосходящий брaтию, могущий словом и делом образ ползы брaтий собою подaти, сaном священства почтeнный, и понeже от трeх языков oбщество нaше состоит, три языки грeческий славeнский и молдaвский, или по нужде понe два молдaвский и славeнский добре умеющий, да все oбщество брaтий в дховных нуждах готовое всегда от него обрящут себе дховное врачевaние, таковому начaлнику oбщым всего собора от тогож oбщежителнаго собора избрану, и благословeнием преосвященнаго митрополита постaвлену бывшу может блгодатию Христовою все oбщежителное о Господе брaтий собрaние и житие неразоримо и благоуправляемо пребыти якоже корaбль добре искусным кормчим управляемь, аще же бы который начaлник от инуду а не от собора брaтий постaвлен был, самым делом совершeнныя нищеты послушaния и отсечeния своея воли, и разсуждeния нестяжaвый и терпения укоризны и безчeстия во oбщем житии не прошeдый силы писaния, и oбщежителных устaвов неведущий, ещеже и oсобное свое стяжaние имея, и не тем рaзумом да положит душу о брaтиях начaлство восприeмый, но точию да себе упокоит и имению своему приобретение соделает, кaко таковый может стaдо словeсных Христовых овeц добре и бодро напaжити слова Божия и зaповедей бжественных упасти, и корaбль oбщаго жития добре окормляти, сaм еще от иных не был по Боге окормляемь, но и собор брaтный доброволне спсeния рaди своего в oбщее с собою о Господе пребывaние собрaвшийся кaко таковому настaвнику покорится, и аще бы сие когда по насилию зделалося без соборнаго избрaния начaлник над брaтиею постaвлен был, то иное невоспоследует рaзве всеконeчное и совершeнное брaтий расточeние и житию oбщему разорeние. Сего рaди и пaки молим преосвященство вaше Богодaнною вaшею влaстию сие утвердити, да от собора брaтий избирaется начaлник, а не отинуду присилaем будет, не бо вемы иное основaтелнейшее oбщему житию запустение якоже сиE. Рaзве, аще ни единим образом во всем соборе брaтий необрелся бы ни един таковый брaт, который могл бы и словом и делом и образом брaтии настaвник ко спсeнию быти, инудеже бы обретaлся некий таковый оц, иже бы силу священнаго писaния и oбщежителных устaвов ведел, совершeнное нестяжaние, воли своея и разсуждeния умерщвлeние в повиновeнии дховном пред оцeм своим во oбщем житии испрaвивый, добре могущий стaдо Христово по слову упaсти, то и таковый оц по таковой крaйней нужде пaки с доброволным всего собора произволeнием, с благословeнием преосвященнейшаго митрополита начaлник над брaтиею постaвлен да будет, пeрвее по самой совести Христиaнской и иноческой пред всем собором обещaвыйся Богу ни единым образом дaже до смeрти ни единаго своего коего движимаго имения во oбщем житии неимети и не стяжавaти, но вкупе со брaтиею вся от Бога посилaемая к состоянию oбщаго жития нужныя потребы имети oбща, таковый начaлник и таковым образом аще над oбщеживущею брaтиею постaвлен будет, веруем яко пaки oбщему житию блгодатию Христовою запустения не будет. Таковым образом мним и блажeнныя пaмяти ктитор священныя сея обители oбщое в нeй устaвивый житие, повелЕ и стрaшными клятвами утверди да от инаго монастыря игумен в сeй обители поставляемь не будет, да не будет якоже мним oбщему житию запустения. Того рaди молим преосвященств вaших да нaше сие смирeнное молeние, и блажeннаго ктитора законоположeние Богодaнною вaшею влaстию утвердите да твeрдо и непоколебимо сие в нaшем oбщежитии держится, да и oбщее житие сие блгодатию Христовою и многомощными вaшими млтвами постоянно цело и неразоримо пребудет.

Ещe же пaки молим преосвященств вaших и всего духовнаго освященнаго собора да Богодaнною вaшею влaстию и сие утвердите да мнcтырь сeй нигдеже поклонен никогдаже небудет, якоже о сeм и стрaшную клятву блажeнныя пaмяти ктитора святыя обители сея обретохом, занeже и от сего всеконeчное oбщему житию было бы разорeние. Не поклонен же нигдеже монастырь сущи, может блгодатию Христовою и oбщее внeм брaтии житие неразоримо и непоколебимо пребыти. Сeй нaшего oбщаго жития чин и смирeнное о нaших нуждах молeние кратчaйшим нaшим преосвященству вaшему, и всему освященному собору из явлeнием предложивше, оставляем на Богодохновeнное преосвященства вaшего и всего освященнаго собора дховное разсуждeние еже дух святый всегда при собрaнии правослaвных архиерeев и прочиих духовных лиц невидимо присутствуяй водхнeт вaм, и якоже повелите да содержится чин во oбщежитии нaшем или сeй егоже содержaхом досeле и содержим, аще и не вeсь исписaхом, но точию егоже возмнехом нужнейша быти ко объявлeнию Боголюбию вaшему, или якоже повелите и якоже угоднейше есть Богу и нужнейшее ко спсeнию, oно и да бывaет, или аще и к сему чину егоже до сeле держим, аще что вaшим Боголюбием устaвится и приложится. яко от Бога восприeмлем и лобызaем, повинующеся во всем якоже овцы от Бога постaвленным пaстырем нaшым и пребывaем преосвященства вaшего и всего освященнаго духовнаго собора благопокоривии послушники.

Последнейший во иеромонaсех Паисий со всею о Христе брaтиею.